દક્ષિણ પશ્ચિમ ચીનના ગ્વીઝોઉ પ્રાંતમાં અચાનક આવેલા તેજ તોફાનને કારણે વૂ નદીમાં ચાર પ્રવાસી નૌકાઓ પલટાઈ ગઈ હતી. આ દુર્ઘટનામાં 9 લોકોના મૃત્યુ થયા છે અને 1 વ્યક્તિ હજુ લાપતા છે. ચીનની સરકારી મીડિયા દ્વારા સોમવારે આ માહિતી આપવામાં આવી છે.
સરકારી ન્યુઝ ચેનલ CCTV અનુસાર, રવિવારના રોજ બપોરના સમયે ગ્વીઝોઉના એક પ્રસિદ્ધ પ્રવાસન સ્થળે અચાનક ભારે પવન શરૂ થતાં નદીમાં તોફાની પરિસ્થિતિ સર્જાઈ. પહેલાં બે નૌકાઓ પલટાયાની જાણ થઈ હતી, પરંતુ ત્યારબાદ CCTV અને શિન્હુઆ સમાચાર એજન્સીએ પુષ્ટિ કરી હતી કે કુલ ચાર નૌકાઓ પલટાઈ છે.
હજી સુધી સ્પષ્ટ નથી થયું કે અન્ય બે નૌકાઓમાં કોઈ વ્યક્તિ ઘાયલ થયો છે કે નહીં. વૂ નદી, ચીનની સૌથી લાંબી યાંગ્ત્ઝી નદીની સહાયક નદી છે. ગ્વીઝોઉની પહાડીઓ અને નદીઓ સ્થાનિક અને વિદેશી પ્રવાસીઓને આકર્ષે છે. હાલમાં પાંચ દિવસના રાષ્ટ્રીય રજાના કારણે ત્યાં ભારે ભીડ જોવા મળી હતી.
ચીનના રાષ્ટ્રપતિ શી જિનપિંગે આ દુર્ઘટનાને લઈને દુઃખ વ્યક્ત કર્યું છે અને લાપતા વ્યક્તિની શોધખોળ તથા ઈજાગ્રસ્તોના સારવાર માટે તમામ પ્રયાસો કરવા આહ્વાન કર્યો છે.
અગાઉની વાર્તાઓમાં એવું જણાવાયું હતું કે પલટાયેલી નૌકાઓમાં અંદાજે 40-40 લોકો સવાર હતા. નૌકાઓમાં ક્ષમતા કરતાં વધુ લોકો ન હતા. એક ચશ્મદીદે ‘બેઇજિંગ ન્યૂઝ’ને જણાવ્યું કે નદીની ઊંડાઈ વધારે હતી છતાં કેટલાક લોકો તરીને કિનારે પહોંચી ગયા હતા. તોફાન અચાનક આવ્યું અને ઘના ધુમ્મસથી નદીની સપાટી પણ દેખાતી નહોતી.
