સુરતમાં જાણીતા ઉદ્યોગપતિ અને ભાજપના રાજ્યસભા સાંસદ ગોવિંદ ધોળકિયાના પુત્ર શ્રેયાંશ ધોળકિયા સાથે રૂ.76.44 લાખની છેતરપિંડીનો ગંભીર મામલો સામે આવ્યો છે. જમીનના દસ્તાવેજ માટે ઈ-સ્ટેમ્પ ખરીદવાના બહાને અધિકૃત સ્ટેમ્પ વેન્ડર દંપતીએ મોટી રકમ મેળવી હોવાનો આક્ષેપ છે. રકમ લીધા બાદ લાંબા સમય સુધી ઈ-સ્ટેમ્પ ન આપતા અને પરત આપવાનો ચેક પણ બાઉન્સ થતાં મામલો પોલીસ સુધી પહોંચ્યો છે.
મળતી માહિતી મુજબ, કતારગામ સ્થિત શ્રી રામકૃષ્ણ એક્સપોર્ટ્સ (SRK)ના મેનેજર કનુ માલવિયાએ રાંદેરના શિલ્પી સોસાયટીમાં રહેતા રામકૃષ્ણ કિરીટકુમાર મેવાવાલા અને તેમની પત્ની સલોની મેવાવાલા સામે ફરિયાદ નોંધાવી છે. શ્રેયાંશ ધોળકિયાને પલસાણા વિસ્તારમાં ખરીદેલી જમીનના દસ્તાવેજ માટે રૂ.76,44,900ના ઈ-સ્ટેમ્પની જરૂરિયાત હતી.
ફરિયાદ અનુસાર, SRK કંપની વર્ષ 2020થી વકીલ મારફતે આ જ સ્ટેમ્પ વેન્ડર પાસેથી સ્ટેમ્પ પેપર ખરીદતી હોવાથી દંપતી પર વિશ્વાસ રાખવામાં આવ્યો હતો. ડિસેમ્બર 2025માં ઈ-સ્ટેમ્પ ખરીદવા માટે આરોપીઓના બેંક ખાતામાં RTGS મારફતે સંપૂર્ણ રકમ ટ્રાન્સફર કરવામાં આવી હતી.
જોકે, સમયસર સ્ટેમ્પ ન મળતા શ્રેયાંશ ધોળકિયાએ રકમ પરત આપવા માંગ કરી હતી. ફરિયાદમાં આક્ષેપ છે કે આરોપીઓએ વિવિધ બહાના બતાવી સમય પસાર કર્યો અને બાદમાં અન્ય લોકોને સ્ટેમ્પ આપીને મળેલી રકમનો અંગત ઉપયોગ કર્યો હતો.
વારંવાર ઉઘરાણી બાદ દંપતીએ રૂ.76.44 લાખનો ચેક આપ્યો, પરંતુ ખાતામાં પૂરતું બેલેન્સ ન હોવાથી ચેક બાઉન્સ થયો હતો. ત્યારબાદ પોલીસ કમિશનરની મંજૂરીથી ડીસીબી ક્રાઈમ બ્રાન્ચે ફરિયાદ નોંધી તપાસ હાથ ધરી છે.
