ભગવાન શ્રીકૃષ્ણ અંગે ધીરેન્દ્ર શાસ્ત્રીની ટિપ્પણીથી વિવાદ, વીડિયો વાયરલ થતાં સોશિયલ મીડિયા પર ઉઠ્યા સવાલો

બંસી વગાડવી રમત છે, પરંતુ ધનુષ ચલાવવું રમત નથી: ભગવાન રામ અને શ્રીકૃષ્ણની સરખામણી કરતાં ધીરેન્દ્ર શાસ્ત્રીએ કરી ટિપ્પણી, વીડિયો ચર્ચામાં

મધ્યપ્રદેશના બાગેશ્વર ધામના પીઠાધીશ્વર ધીરેન્દ્ર કૃષ્ણ શાસ્ત્રી ફરી એકવાર પોતાના નિવેદનને કારણે ચર્ચામાં આવ્યા છે. ભગવાન શ્રીરામ અને ભગવાન શ્રીકૃષ્ણની સરખામણી કરતાં તેમણે કરેલી કેટલીક ટિપ્પણીઓનો વીડિયો સોશિયલ મીડિયા પર ઝડપથી વાયરલ થઈ રહ્યો છે. આ નિવેદનને લઈને કેટલાક લોકો નારાજગી વ્યક્ત કરી રહ્યા છે, જ્યારે કેટલાક તેને હળવી મજાક ગણાવી રહ્યા છે.

મળતી માહિતી મુજબ, મધ્યપ્રદેશના શિવપુરી જિલ્લાના કરેરા ખાતે યોજાયેલી શ્રીરામ કથા દરમિયાન ધીરેન્દ્ર શાસ્ત્રીએ ભગવાન રામ અને શ્રીકૃષ્ણ વચ્ચેના તફાવતની વાત કરી હતી. આ દરમિયાન તેમણે ભગવાન શ્રીકૃષ્ણની ત્રિભંગ મુદ્રા, વાંસળી વગાડવાની શૈલી અને વૃંદાવન ધામનો ઉલ્લેખ કરતાં ટિપ્પણીઓ કરી હતી.

‘અમારા ભગવાન સીધા, તમારા ભગવાન વાંકા’

વાયરલ વીડિયોમાં ધીરેન્દ્ર શાસ્ત્રી કહેતા સંભળાય છે કે ભગવાન શ્રીકૃષ્ણની તસવીરોમાં તેઓ ક્યારેક એક તરફ જોતા, તો ક્યારેક ત્રણ જગ્યાએથી વાંકા ઊભા જોવા મળે છે. તેમના પગ એકબીજા પર હોય છે, કમર લચકેલી હોય છે અને ગરદન વાંકી કરીને વાંસળી વગાડતા હોય છે.

ત્યારબાદ તેમણે ભગવાન શ્રીરામનો ઉલ્લેખ કરતાં કહ્યું કે અમારા ભગવાન એકદમ સીધા ઊભા રહે છે, તેમનું નામ સીધું છે અને તેમનું ચાલવું પણ સીધું છે. તેમણે અયોધ્યા અને વૃંદાવનનો ઉલ્લેખ કરીને બંને ધામ વચ્ચે પણ સરખામણી કરી હતી.

‘બંસી વગાડવી રમત છે, ધનુષ ચલાવવું નહીં’

ધીરેન્દ્ર શાસ્ત્રીએ ભગવાન શ્રીકૃષ્ણની વાંસળી અને ભગવાન શ્રીરામના ધનુષની પણ સરખામણી કરી હતી. તેમણે કહ્યું કે વાંસળી વગાડવી તો રમત જેવી બાબત છે, પરંતુ ધનુષ ચલાવવું દરેકના વશની વાત નથી.

આ દરમિયાન તેમણે કથાના મંચ પર હાજર વાંસળી વગાડતા કલાકાર તરફ ઈશારો કરીને કહ્યું કે અહીં પણ એક વ્યક્તિ વાંસળી વગાડી રહ્યો છે. ત્યારબાદ તેમણે શ્રોતાઓને પૂછ્યું કે અહીં ભગવાન શ્રીરામના ભક્તો કેટલા છે?

પોતાના નિવેદનને મજાક ગણાવ્યું

આ ટિપ્પણી બાદ વિવાદ વધતાં ધીરેન્દ્ર શાસ્ત્રીએ સ્પષ્ટતા કરી હતી કે તેમની વાતનો અર્થ ભગવાન શ્રીકૃષ્ણનો વિરોધ કરવાનો નથી. તેમણે કહ્યું કે તેઓ ભગવાન શ્રીકૃષ્ણના વિરોધી નથી અને આ વાત માત્ર વિનોદના ભાગરૂપે કહી હતી.

સોશિયલ મીડિયા પર મિશ્ર પ્રતિક્રિયાઓ

વીડિયો વાયરલ થયા બાદ સોશિયલ મીડિયા પર લોકો અલગ-અલગ પ્રતિક્રિયાઓ આપી રહ્યા છે. કેટલાક યુઝર્સે ભગવાન શ્રીકૃષ્ણ અંગેની ભાષા સામે વાંધો ઉઠાવ્યો છે અને ધાર્મિક કથાકાર તરીકે આવી ટિપ્પણીની યોગ્યતા પર સવાલ કર્યા છે. જ્યારે કેટલાક લોકોએ દલીલ કરી છે કે આ નિવેદનનો સંદર્ભ સમજ્યા વિના ટૂંકા વીડિયોના આધારે વિવાદ ઊભો કરવામાં આવી રહ્યો છે.

ભગવાન રામ અને શ્રીકૃષ્ણ બંને પ્રત્યે શ્રદ્ધા ધરાવતા લોકોમાં પણ આ મુદ્દે ચર્ચા શરૂ થઈ છે.