ભારતીય ક્રિકેટના ભગવાન તરીકે ઓળખાતા સચિન તેંડુલકર ક્રિકેટમાંથી નિવૃત્તિ લીધા બાદ પણ રમત પ્રત્યેનો તેમનો પ્રેમ યથાવત્ છે. તાજેતરમાં સચિને સોશિયલ મીડિયા પર એક રમૂજી વીડિયો શેર કર્યો છે, જેને ચાહકો તરફથી જબરદસ્ત પ્રતિસાદ મળી રહ્યો છે. ખાસ વાત એ છે કે આ ક્રિકેટ મેચ કોઈ મેદાનમાં નહીં, પરંતુ આકાશમાં ઉડતા પ્રાઇવેટ જેટની અંદર રમાઈ હતી.
વીડિયો શેર કરતાં સચિને લખ્યું, “No matter what the altitude, the attitude shouldn’t change”, એટલે કે ઊંચાઈ કેટલી પણ હોય, ક્રિકેટ પ્રત્યેનો જુસ્સો ક્યારેય બદલાતો નથી.
વીડિયોમાં સચિન પ્રાઇવેટ જેટની કેબિનમાં બેટિંગ કરતા જોવા મળે છે, જ્યારે તેમના પુત્રવધૂ સાનિયા ચંદોક સોફ્ટ બોલથી બોલિંગ કરતી જોવા મળે છે. બીજી તરફ તેમની દીકરી સારા તેંડુલકર ફિલ્ડિંગમાં મદદ કરતી નજરે પડે છે.
વીડિયોનો સૌથી મજેદાર ક્ષણ ત્યારે આવે છે જ્યારે સારા મજાકમાં સચિનને આઉટ કરવાની અપીલ કરે છે. તેના જવાબમાં સચિન હસતાં કહે છે, “તું મને ક્યારેય આઉટ નહીં કરી શકે… ક્યારેય નહીં!” આ સાંભળીને જેટમાં હાજર તમામ લોકો હસી પડે છે.
આ પછી સચિન બેટને ઊંધું પકડીને બેટિંગ શરૂ કરે છે અને મજાકમાં કહે છે કે હવે કદાચ તેમને આઉટ કરવાની થોડી શક્યતા છે. થોડા સમય બાદ સારાને સચિનનો કેચ લેવાની તક મળે છે, પરંતુ તે કેચ છોડી દે છે. જોકે આગામી જ બોલ પર તે શાનદાર કેચ પકડી લે છે અને જોરદાર “Yay!” બોલીને પોતાની ખુશી વ્યક્ત કરે છે. આખરે સચિને પણ પોતાની હાર સ્વીકારી લીધી હતી.
સચિનના સરળ સ્વભાવનો વીડિયો થયો વાયરલ
સચિનનો આ વીડિયો સોશિયલ મીડિયા પર ઝડપથી વાયરલ થઈ રહ્યો છે. ચાહકો તેમના સરળ સ્વભાવ, પરિવાર સાથેની મસ્તીભરી પળો અને ક્રિકેટ પ્રત્યેના અતૂટ પ્રેમની પ્રશંસા કરી રહ્યા છે. ઘણા ચાહકોનું માનવું છે કે ક્રિકેટ સચિનના જીવનનો એવો અભિન્ન હિસ્સો છે, જે તેઓ ક્યારેય છોડવાના નથી.
