બ્રાઝિલના શહેર બેલો હોરિઝોન્ટેમાં એક એવી ઘટના બની છે જેણે અમદાવાદ પ્લેન ક્રેશની ઘટનાની યાદ અપાવી દીધી છે. અહીં એક નાનું પ્લેન અચાનક એક રહેણાંક ઇમારત સાથે અથડાયું. થોડી જ પળોમાં બધું બદલાઈ ગયું – ધુમાડો, આગ અને ચીસોથી આખો વિસ્તાર ધણધણી ઉઠ્યો. આ અકસ્માતમાં ઓછામાં ઓછા 3 લોકોના જીવ ગયા અને ઘણા ઘાયલ થયા. જો વિમાન થોડું પણ અલગ દિશામાં ગયું હોત, તો નુકસાન વધુ થઈ શક્યું હોત.
શું હતી ઘટના?
સોમવારે બ્રાઝિલના મોટા શહેર બેલો હોરિઝોન્ટેમાં એક નાનું વિમાન એક રહેણાંક ઇમારત સાથે અથડાયું. આ દુર્ઘટનામાં ત્રણ લોકોનાં મોત થયા અને અન્ય બે લોકો ઘાયલ થયા. એએફપીના અહેવાલ મુજબ, મિનાસ જેરાઇસ રાજ્યના ફાયર વિભાગે જણાવ્યું કે પાઇલટ અને કો-પાઇલટનું ઘટનાસ્થળે જ મોત થયું. વિમાનમાં હાજર અન્ય ત્રણ લોકોને તાત્કાલિક હોસ્પિટલ લઈ જવામાં આવ્યા.
સ્થાનિક હોસ્પિટલ ફાઉન્ડેશન અનુસાર ઘાયલોમાંથી એક વ્યક્તિનું બાદમાં મૃત્યુ થયું, જ્યારે બાકીના બે લોકો હોસ્પિટલમાં દાખલ છે અને તેમની હાલત સ્થિર છે. ફાયરફાઇટર્સે જણાવ્યું કે વિમાન સીધું ઇમારત સાથે અથડાયું, પરંતુ તેમ છતાં ઇમારતની અંદર હાજર કોઈ પણ વ્યક્તિને ઈજા થઈ નથી અને ઇમારત પડવાનું કોઈ “સ્પષ્ટ જોખમ” હાલ દેખાતું નથી. ટીવી ગ્લોબો ચેનલના હેલિકોપ્ટરે આ ઘટનાનો વીડિયો રેકોર્ડ કર્યો. તેમાં જોવા મળ્યું કે વિમાન ધીમે ધીમે નીચે આવી રહ્યું હતું, પછી ઊંચી ઇમારતોથી બચવા માટે ડાબી બાજુ વળ્યું અને અંતે ત્રણ માળની ઇમારત સાથે અથડાઈને પાર્કિંગમાં પડી ગયું.
