ચીનના હુનાન પ્રાંતના લિયુયાંગ શહેરમાં એક મોટો ઔદ્યોગિક અકસ્માત સામે આવ્યો છે, જ્યાં સોમવાર સાંજે લગભગ 4:40 વાગ્યે ફટાકડાની ફેક્ટરીમાં થયેલા ભયાનક વિસ્ફોટમાં ઓછામાં ઓછા 21 લોકોના મોત થયા છે અને 61થી વધુ લોકો ગંભીર રીતે ઘાયલ થયા છે.
આ વિસ્ફોટ હુઆશેંગ ફટાકડા ઉત્પાદન અને પ્રદર્શન કંપનીની વર્કશોપમાં થયો હતો, જે મોટા પાયે ફટાકડાંના ઉત્પાદન માટે જાણીતી છે. વિસ્ફોટ એટલો પ્રચંડ હતો કે આસપાસના વિસ્તારોમાં ધ્રુજારી અનુભવાઈ અને ઘટનાસ્થળ પરથી ઘન ધુમાડાના ગોટાળા ઊઠતા જોવા મળ્યા.
ઘટનાની ગંભીરતા ધ્યાનમાં લઈ ચીનના રાષ્ટ્રપતિ શી જિનપિંગે તાત્કાલિક રાહત અને બચાવ કામગીરી તેજ કરવાની સૂચના આપી છે, સાથે જ ગુમ થયેલા લોકોની શોધખોળ અને ઘાયલોને તાત્કાલિક સારવાર મળે તેની ખાતરી કરવા માટે અધિકારીઓને આદેશ આપ્યો છે.
સરકારી એજન્સીઓ મુજબ ઘટનાસ્થળે આશરે 500 બચાવકર્મીઓને તૈનાત કરવામાં આવ્યા છે અને રાહત કામગીરી સતત ચાલી રહી છે, જ્યારે નજીકમાં આવેલા બે બારૂદના ગોડાઉનને ધ્યાનમાં રાખીને જોખમી વિસ્તારોમાંથી લોકોને સલામત સ્થળે ખસેડવામાં આવ્યા છે. હાલ સ્થાનિક અધિકારીઓ વિસ્ફોટના ચોક્કસ કારણોની તપાસ કરી રહ્યા છે અને આ દુર્ઘટનાએ ઔદ્યોગિક સલામતી અને દેખરેખ અંગે ફરી ગંભીર સવાલો ઉભા કર્યા છે.
