ગણપતિ બાપ્પાની મૂર્તિ તો તમે અનેક પ્રકારની જોઈ હશે, પરંતુ પુણેના FC રોડ પર સ્થાપિત આ બાપ્પાને જોઈને કદાચ તમારી નજર પણ થંભી જશે! કારણ કે અહીં 21 હજાર પાણીપુરીની પૂરીનો ઉપયોગ કરીને 11 થી 12 ફૂટ ઊંચી ગણપતિની અનોખી મૂર્તિ તૈયાર કરવામાં આવી છે. ગણેશોત્સવના માહોલમાં આ અનોખી કલાત્મક રચના હવે લોકો માટે ખાસ આકર્ષણનું કેન્દ્ર બની છે.
પુણેના પ્રખ્યાત FC રોડ, નામદાર ગોખલે પથ પર આવેલા ગણેશ ભેલના આઉટલેટની બહાર આ વિશાળ મૂર્તિ સ્થાપિત કરવામાં આવી છે. રિપોર્ટ મુજબ મૂર્તિ તૈયાર કરવાની કામગીરી લગભગ બે મહિના સુધી ચાલી હતી. કલાકાર પ્રશાંત સાળુંખેએ આ અનોખા વિચારને મૂર્ત સ્વરૂપ આપ્યું છે.
આ મૂર્તિ તૈયાર કરવામાં ઉપયોગમાં લેવાયેલી પાણીપુરીની પૂરી ગણેશ ભેલની પોતાની ઉત્પાદન સુવિધામાં બનાવવામાં આવી હતી. મૂર્તિનું માળખું વાંસ અને કાગળ જેવી સામગ્રીથી તૈયાર કરાયું છે. ગણેશ ભેલ દ્વારા સતત ચોથા વર્ષે અલગ થીમ પર અનોખા બાપ્પા બનાવવામાં આવ્યા છે.
અનોખી કળા સાથે પર્યાવરણમૈત્રી વિચારને જોડતી આ મૂર્તિ અનંત ચતુર્દશી સુધી લોકોનું ધ્યાન ખેંચશે.
