સવારમાં તેજીની દોડ અને થોડા જ કલાકોમાં ભારે ધડામ! આજે ભારતીય શેરબજારમાં એવો અચાનક પલટો આવ્યો કે રોકાણકારો ચોંકી ગયા હતા. સેન્સેક્સ અને નિફ્ટીએ સકારાત્મક શરૂઆત કરી હતી, પરંતુ બાદમાં ભારે વેચવાલી શરૂ થતાં સેન્સેક્સ દિવસના ઉચ્ચ સ્તરથી 1,400થી વધુ પોઈન્ટ નીચે સરકી ગયો હતો. અંતે સેન્સેક્સ 777.36 પોઈન્ટ એટલે કે 1.04% ઘટીને 74,003.82 પર બંધ થયો હતો, જ્યારે નિફ્ટી 280.90 પોઈન્ટ ઘટીને 23,118.60 પર પહોંચ્યો હતો. નિફ્ટી માટે આ લગભગ પાંચ મહિનાનું સૌથી નીચું ક્લોઝિંગ લેવલ રહ્યું હતું.લગભગ સાત એક લાખ કરોડ રૂપિયાનું ધોવાણ થયું હતું.
આ અચાનક ઘટાડા પાછળ વૈશ્વિક બજારોની ચિંતા, મોંઘું કાચું તેલ અને વધતા બોન્ડ યીલ્ડ જેવા પરિબળો મુખ્ય રહ્યા છે.
પહેલું કારણ: મોંઘું ક્રૂડ ઓઈલ
મધ્ય પૂર્વમાં વધતા તણાવ વચ્ચે બ્રેન્ટ ક્રૂડના ભાવમાં ઉછાળો આવ્યો અને તે આશરે 107.8 ડોલર પ્રતિ બેરલ સુધી પહોંચ્યું. ભારત જેવા મોટા ક્રૂડ આયાતકાર દેશ માટે મોંઘું તેલ મોંઘવારી, કંપનીઓના ખર્ચ અને અર્થતંત્ર પર દબાણ વધવાની ચિંતા ઊભી કરે છે.
બીજું કારણ: અમેરિકી બોન્ડ યીલ્ડનો ઉછાળો
અમેરિકાની 10-વર્ષીય ટ્રેઝરી યીલ્ડ 5%ના સ્તરને પાર પહોંચી હતી. ઊંચી યીલ્ડ વૈશ્વિક રોકાણમાં જોખમ અંગે સાવચેતી વધારે છે અને ભારત જેવા ઉભરતા બજારોમાંથી વિદેશી નાણાં પર પણ અસર કરી શકે છે.
ત્રીજું કારણ: બજારમાં વધેલી અસ્થિરતા
India VIX, જે બજારની અપેક્ષિત અસ્થિરતાનો સંકેત આપે છે, શરૂઆતના સત્રમાં 3.74% વધીને 12.76 થયો હતો. ક્રૂડ, રૂપિયા અને અમેરિકી વ્યાજદર અંગેની અનિશ્ચિતતાએ રોકાણકારોને વધુ સાવચેત બનાવ્યા.
રસપ્રદ વાત એ રહી કે સમગ્ર બજાર તૂટ્યું હોવા છતાં IT શેરોએ રાહત આપી અને Nifty ITમાં તેજી જોવા મળી. બીજી તરફ નાણાકીય અને ઓટો સેક્ટર પર વધુ દબાણ રહ્યું.
નોંધ:શેરબજારમાં રોકાણ પહેલાં તમારી જોખમક્ષમતા મુજબ પ્રમાણિત નાણાકીય સલાહકારની સલાહ લેવી.
