મધ્યપ્રદેશના દેવાસ જિલ્લામાં ફટાકડાની એક ફેક્ટરીમાં ભયાનક બ્લાસ્ટની ઘટના બની છે, જેમાં 10 લોકોના મોત થયા છે. મળતી માહિતી મુજબ, ફેક્ટરીમાં અચાનક થયેલા વિસ્ફોટ બાદ આગ ફાટી નીકળી હતી, જેના કારણે વિસ્તારમાં અફરાતફરી મચી ગઈ હતી. આ દુર્ઘટનામાં 20થી વધુ લોકો ઈજાગ્રસ્ત થયા છે, જેમને તાત્કાલિક નજીકની હોસ્પિટલમાં સારવાર માટે ખસેડવામાં આવ્યા છે. ગંભીર રીતે ઈજાગ્રસ્ત 7 લોકોને વધુ સારવાર માટે ઈન્દોર રિફર કરવામાં આવ્યા છે.

વિસ્ફોટ એટલો જોરદાર હતો કે આસપાસના વિસ્તારોમાં ગભરાટ ફેલાઈ ગયો હતો. ઘટનાના ફોટો અને વીડિયોમાં જોઈ શકાય છે કે સ્થાનિક લોકો ઘાયલોને પોતાના હાથમાં ઉઠાવીને ફેક્ટરી સાઈટથી દૂર લઈ જઈ રહ્યા હતા અને મદદ કરી રહ્યા હતા. ઘાયલોને તાત્કાલિક સારવાર માટે જિલ્લા હોસ્પિટલમાં ખસેડવામાં આવ્યા છે.

ઘટનાની જાણ થતા જ પોલીસ, સ્થાનિક વહીવટીતંત્રના અધિકારીઓ અને બચાવ ટીમો ઘટનાસ્થળે પહોંચી ગઈ હતી. હાલમાં રાહત અને બચાવ કાર્ય પુરજોશમાં ચાલી રહ્યું છે. વિસ્ફોટનું ચોક્કસ કારણ હજુ સુધી જાણી શકાયું નથી. સત્તાવાળાઓ દ્વારા બચાવ કામગીરી પૂર્ણ થયા બાદ આ મામલે સઘન તપાસ શરૂ કરવામાં આવશે તેવી અપેક્ષા છે. જોકે, સત્તાવાર રીતે હજુ સુધી મૃત્યુઆંક અથવા ઘાયલોની ચોક્કસ સંખ્યાની પુષ્ટિ કરવામાં આવી નથી.

દિલ્હીમાં વર્ષ 2012ના નિર્ભયા કાંડ જેવી ઘટનાની યાદ તાજી કરતો વધુ એક શરમજનક કિસ્સો સામે આવ્યો છે. 13 વર્ષ અને 5 મહિના પહેલા બનેલી તે ઘટનાએ સમગ્ર દેશને હચમચાવી દીધો હતો, છતાં આજે પણ મહિલાઓની સુરક્ષા અંગે પ્રશ્નો યથાવત્ છે. હવે દિલ્હીના રાની બાગ વિસ્તારમાં ચાલુ સ્લીપર બસમાં 30 વર્ષીય મહિલા સાથે સામુહિક બળાત્કારની ઘટના સામે આવતા ફરી એકવાર ચકચાર મચી ગઈ છે.

પીડિતાની ફરિયાદના આધારે પોલીસે તાત્કાલિક કાર્યવાહી હાથ ધરી છે. આ મામલે કેસ નોંધવામાં આવ્યો છે અને બે આરોપીની ધરપકડ પણ કરવામાં આવી છે. જે બસમાં મહિલાની સાથે દુષ્કર્મ આચરવામાં આવ્યું હતું તે બસને પણ પોલીસે જપ્ત કરી છે.

માહિતી મુજબ, આરોપીઓએ મહિલાને જબરદસ્તી બસમાં બેસાડી હતી. ત્યારબાદ ચાલુ સ્લીપર બસમાં લઈ જઈ તેની સાથે સામુહિક દુષ્કર્મ આચર્યું હતું. કોઈ રીતે આરોપીઓના કબજામાંથી છૂટ્યા બાદ પીડિતા સીધી પોલીસ પાસે પહોંચી હતી અને સમગ્ર ઘટનાની જાણ કરી હતી. મહિલાની ફરિયાદના આધારે પોલીસે આરોપીઓ વિરુદ્ધ FIR નોંધાવી છે.

આ સમગ્ર મામલાને ગંભીરતાથી લઈ દિલ્હી પોલીસે ઝડપી કાર્યવાહી કરતાં બે આરોપીની ધરપકડ કરી છે. પોલીસ અધિકારીઓના જણાવ્યા અનુસાર હાલ આરોપીઓની પુછપરછ ચાલી રહી છે. તપાસ દરમિયાન એ જાણવા પ્રયાસ કરવામાં આવી રહ્યો છે કે આ ગુનામાં અન્ય કેટલા લોકો સામેલ હતા.

પોલીસ હવે એ દિશામાં પણ તપાસ કરી રહી છે કે ઘટના સમયે બસ કયા રૂટ પર ચાલી રહી હતી અને બસમાં અન્ય કોણ હાજર હતું. ઘટનાસ્થળ અને બસમાંથી મહત્વના પુરાવા એકત્રિત કરવામાં આવ્યા છે. ફોરેન્સિક ટીમે પણ બસની તપાસ કરી છે જેથી વધુ ટેકનિકલ અને વૈજ્ઞાનિક પુરાવા મેળવી શકાય.

આ સાથે પોલીસે આસપાસના વિસ્તારોમાં લાગેલા સીસીટીવી કેમેરાની ફૂટેજ પણ ચકાસવાની કાર્યવાહી શરૂ કરી છે. પોલીસ અધિકારીઓએ જણાવ્યું હતું કે મહિલાને કયા સંજોગોમાં બસમાં બેસાડવામાં આવી અને આખી ઘટના કેવી રીતે બની તે જાણવા માટે તમામ પાસાઓની ગંભીરતાથી તપાસ ચાલી રહી છે. પીડિતાના નિવેદન અને ટેકનિકલ પુરાવાના આધારે કેસને વધુ મજબૂત બનાવવા માટે તપાસ એજન્સીઓ કામ કરી રહી છે.

જમ્મુ-કાશ્મીરના કિશ્તવાડ જિલ્લામાં પોલીસે આતંકવાદીઓ સામે મોટી કાર્યવાહી કરતા સૈફુલ્લાહ ગ્રુપ સાથે જોડાયેલા બે કથિત ઓવરગ્રાઉન્ડ વર્કર્સ (OGWs)ની ધરપકડ કરી છે. પોલીસના જણાવ્યા મુજબ બંને આરોપીઓ વિદેશી આતંકવાદીઓને મદદ પહોંચાડવા અને તેમને સુરક્ષિત ઠેકાણા ઉપલબ્ધ કરાવવામાં સામેલ હતા. સમગ્ર આતંકી નેટવર્કને ખતમ કરવા માટે સતત અભિયાન ચલાવવામાં આવી રહ્યું હોવાનું પોલીસે જણાવ્યું છે.

પોલીસે માહિતી આપી કે સિંહપોરા-ચતરું વિસ્તારમાં ચલાવવામાં આવેલા વિશેષ ઓપરેશન દરમિયાન આ કાર્યવાહી હાથ ધરવામાં આવી હતી. આ મામલે FIR નોંધવામાં આવી છે અને આરોપીઓ સામે ભારતીય ન્યાય સંહિતા (BNS)ની વિવિધ કલમો ઉપરાંત UAPA અને આર્મ્સ એક્ટ હેઠળ પણ ગુનાઓ દાખલ કરવામાં આવ્યા છે. પોલીસના જણાવ્યા મુજબ ધરપકડ કરાયેલા આરોપીઓ આતંકવાદીઓને દરેક પ્રકારની મદદ પહોંચાડી રહ્યા હતા.

કિશ્તવાડના SSPએ જણાવ્યું કે તપાસ અને ગુપ્તચર માહિતીના આધારે પોલીસે મશ્કૂર અહમદની ધરપકડ કરી હતી. મશ્કૂર અહમદ મોહમ્મદ રમઝાનનો પુત્ર છે અને સિંહપોરાના બેઘપોરા વિસ્તારનો રહેવાસી છે. તે શાળા શિક્ષણ વિભાગમાં શિક્ષક તરીકે ફરજ બજાવતો હતો. પોલીસના જણાવ્યા મુજબ તે આતંકવાદીઓ માટે સુરક્ષિત ઠેકાણા તૈયાર કરાવવા અને તેમને સહકાર આપવા સીધો સંકળાયેલો હતો.

પોલીસનું કહેવું છે કે મશ્કૂર અહમદની ધરપકડ બાદ આતંકવાદીઓને મળતું મહત્વપૂર્ણ લોજિસ્ટિક સપોર્ટ નબળું પડ્યું છે. તપાસ દરમિયાન એ પણ સામે આવ્યું છે કે આરોપી લાંબા સમયથી આતંકી નેટવર્કના સંપર્કમાં હતો. હવે પોલીસે તેના અન્ય સાથીદારો અને સંપર્કોની તપાસ પણ શરૂ કરી છે, જેથી સમગ્ર મોડ્યુલનો પર્દાફાશ કરી શકાય.

આ પહેલા આ જ કેસમાં મનીર અહમદ નામના બીજા એક આરોપીની પણ ધરપકડ કરવામાં આવી હતી. મનીર અહમદ બાંદેયાન નૈડગામ વિસ્તારનો રહેવાસી છે. પોલીસના જણાવ્યા મુજબ તેના પર પણ વિદેશી આતંકવાદીઓને મદદ કરવાનો અને તેમને સુરક્ષિત સહયોગ પૂરો પાડવાનો આરોપ છે. બંને આરોપીઓની પૂછપરછના આધારે આગળની કાર્યવાહી હાથ ધરવામાં આવી રહી છે.

નવસારી જિલ્લાના જલાલપોર તાલુકાના મગોબ ભાઠા ગામ નજીક આજે ઈન્ડિગો કંપની સાથે સંકળાયેલા એક હેલિકોપ્ટરનું ઇમરજન્સી લેન્ડિંગ કરવું પડ્યું હતું. ઉડાન દરમિયાન અચાનક ટેકનિકલ સમસ્યા ઉભી થતાં પાયલોટે સાવચેતીના ભાગરૂપે હેલિકોપ્ટરને ખુલ્લા મેદાનમાં સુરક્ષિત રીતે ઉતારવાનો નિર્ણય લીધો હતો.

ઉડાન દરમિયાન ટેકનિકલ ખામી જણાતા પાયલોટે તાત્કાલિક પરિસ્થિતિ પર કાબૂ મેળવી નજીકના વિસ્તારને પસંદ કરી સલામત લેન્ડિંગ કર્યું હતું. બંને પાયલોટની સતર્કતા અને સમયસૂચકતાને કારણે મોટી દુર્ઘટના ટળી હોવાનું માનવામાં આવી રહ્યું છે.

હેલિકોપ્ટર અચાનક ગામ નજીક ઉતરતાં સ્થાનિક લોકોમાં ઉત્સુકતા સાથે થોડો ભયનો માહોલ પણ સર્જાયો હતો. ઘટનાની જાણ થતાં જ મરોલી પોલીસની ટીમ તાત્કાલિક સ્થળ પર પહોંચી હતી અને આસપાસ સુરક્ષા વ્યવસ્થા ગોઠવી હતી, જેથી લોકોની ભીડને નિયંત્રિત કરી શકાય.

સદનસીબે આ ઘટનામાં કોઈ જાનહાનિ કે ઇજાના સમાચાર સામે આવ્યા નથી. હાલ ટેકનિકલ નિષ્ણાતોની ટીમ હેલિકોપ્ટરમાં આવેલી ખામીનું ચોક્કસ કારણ શોધવા માટે તપાસ કરી રહી છે. પ્રાથમિક તપાસમાં ટેકનિકલ ફોલ્ટને કારણે ઇમરજન્સી લેન્ડિંગ કરાયું હોવાનું સામે આવ્યું છે.