લોકસભામાં મહાકુંભ પર બોલતા, વડાપ્રધાન મોદીએ કહ્યું કે મહાકુંભનું સફળતાપૂર્વક આયોજન કરવામાં આવ્યું હતું. તેની સફળતામાં લોકોએ ફાળો આપ્યો છે. હું દેશભરના ભક્તોનો, યુપીના લોકોનો, ખાસ કરીને પ્રયાગરાજના લોકોનો આભાર માનું છું. તેમણે કહ્યું કે મહાકુંભમાં આપણે રાષ્ટ્રીય ચેતનાના જાગૃતિના સાક્ષી બન્યા. વિશ્વએ મહાકુંભના રૂપમાં ભારતનું ભવ્ય સ્વરૂપ જોયું. દુનિયા આપણી સંસ્કૃતિને આત્મસાત કરી રહી છે.

વડાપ્રધાને મહાકુંભમાંથી ઘણા અમૃત નીકળ્યા હોવાનું જણાવીને ઉલ્લેખ કર્યો કે,એકતાનું અમૃત તેનો સૌથી પવિત્ર પ્રસાદ છે. મહાકુંભ એક એવો કાર્યક્રમ હતો જેમાં દેશના દરેક ક્ષેત્ર અને દરેક ખૂણાના લોકો ભેગા થયા હતા. પ્રયાગરાજમાં લોકો “હું નહીં પણ આપણે” એવી લાગણી સાથે એકઠા થયા. જ્યારે સંગમના કિનારે વિવિધ ભાષાઓ અને બોલીઓ બોલતા લોકો હર હર ગંગેનો નારા લગાવે છે, ત્યારે ‘એક ભારત શ્રેષ્ઠ ભારત’ ની ઝલક દેખાય છે અને એકતાની લાગણી વધે છે. વડાપ્રધાને કહ્યું કે, પરંપરા સાથે આપણે મોટા લક્ષ્યો પ્રાપ્ત કરી શકીએ છીએ. આપણે નદી ઉત્સવની પરંપરાનો વિસ્તાર કરવો પડશે. નદી મહોત્સવ નદીઓનું સંરક્ષણ કરશે.

મહાકુંભમાં આપણે જોયું કે, નાના અને મોટા વચ્ચે કોઈ ભેદ નહોતો. આ ભારતની એક મોટી તાકાત છે. આ દર્શાવે છે કે એકતાનું અદ્ભુત તત્વ આપણી અંદર વણાયેલું છે. આપણી એકતાની શક્તિ એટલી પ્રબળ છે કે તે આપણને વિભાજીત કરવાના તમામ પ્રયાસોને નિષ્ફળ બનાવ્યા છે.એકતાની આ ભાવના ભારતીયોનું મોટું સૌભાગ્ય છે. આજે દુનિયામાં પ્રવર્તી રહેલા અવ્યવસ્થાના સમયમાં, એકતાનું આ પ્રદર્શન આપણી સૌથી મોટી તાકાત છે. વિવિધતામાં એકતા એ આપણી વિશેષતા છે. તેનું વિશાળ સ્વરૂપ પ્રયાગરાજ મહાકુંભમાં અનુભવાયું છે.

આપણી જવાબદારી છે કે આપણે વિવિધતામાં એકતાના આ લક્ષણને સમૃદ્ધ બનાવતા રહીએ. મહાકુંભમાંથી આપણને ઘણી પ્રેરણા મળી છે. આપણા દેશમાં ઘણી નાની-મોટી નદીઓ છે, જેમાંથી ઘણી નદીઓ સંકટનો સામનો કરી રહી છે. કુંભમાંથી પ્રેરણા લઈને આપણે નદી ઉત્સવની પરંપરાને નવો વિસ્તાર આપવો પડશે. આપણે આ વિશે ચોક્કસ વિચારવું જોઈએ. આનાથી વર્તમાન પેઢી પાણીનું મહત્વ સમજશે. નદીઓનું રક્ષણ કરવામાં આવશે. મને વિશ્વાસ છે કે મહાકુંભમાંથી ઉત્પન્ન થતું અમૃત આપણા સંકલ્પોની સિદ્ધિ માટે એક મજબૂત માધ્યમ બનશે.

મહારાષ્ટ્રમાં ઔરંગઝેબની કબર મુદ્દે ચાલી રહેલો વિવાદ નાગપુરમાં હિંસક બન્યો છે. જેમાં હિંદુ સંગઠનો વિશ્વ હિન્દુ પરિષદ અને બજરંગ દળ કબરને દુર કરવાની માંગ કરી રહ્યા છે. જેનો વિરોધ કરવા સોમવારે નાગપુરમાં વિરોધ પ્રદર્શન કરવામાં આવ્યું હતું. આ વિરોધ પ્રદર્શનમાં કેટલાક સંગઠનોએ પ્રતીકાત્મક રીતે ઔરંગઝેબની કબરનું દહન કર્યું. જ્યારે ત્યારબાદ થયેલી હિંસામાં કેટલાક પોલીસકર્મીઓ પણ ઘાયલ થયા હતા. નાગપુરમાં 163 ધારા લાગુ પાડી પોલીસ પ્રશાસને અને લોકોને ઘરની બહાર નહીં નીકળવાનો અનુરોધ કર્યો છે.

ઔરંગઝેબની પ્રતીકાત્મક રીતે કબર દહન દરમિયાન ઉપયોગમાં લેવાતી ચાદર પર વિવાદ ઉભો થયો હતો. જેના કારણ કે મુસ્લિમ સમુદાયે દાવો કર્યો હતો કે ચાદર પર ધાર્મિક વસ્તુઓ લખેલી હતી. જેનાથી તેમની લાગણીઓને ઠેસ પહોંચી હતી. જેના લીધે નાગપુરના મહલ વિસ્તારમાં શિવાજીની પ્રતિમા સામે મુસ્લિમ સમુદાયના લોકો એકઠા થયા અને વિરોધ પ્રદર્શન કર્યું.

તમને જણાવી દઈએ કે, મહલમાં અશાંતિ બાદ, સીઝ ઓપરેશનમાં ડેપ્યુટી પોલીસ કમિશનર નિકેતન કદમ ગંભીર રીતે ઘાયલ થયા હતા જ્યારે અન્ય બે પોલીસકર્મીઓ પણ પથ્થરમારાના શિકાર બન્યા હતા. અધિકારીઓએ જણાવ્યું હતું કે, ચિટનીસ પાર્કથી શુક્રાવરી તાલાબ રોડ હિંસાથી સૌથી વધુ પ્રભાવિત થયો હતો, જ્યાં તોફાનીઓએ કેટલાક ફોર-વ્હીલર વાહનોને આગ ચાંપી દીધી હતી. તેમણે કહ્યું કે લોકોના ઘરો પર પણ પથ્થરમારો કરવામાં આવ્યો હતો.

પોલીસ કમિશનર રવિન્દ્ર સિંઘલે જણાવ્યું હતું કે શહેરમાં BNSની કલમ 163 (IPCની કલમ 144ની જેમ) લાગુ કરવામાં આવી છે. તે જ સમયે, મીડિયા રિપોર્ટ્સ અનુસાર, શાંતિ પુનઃસ્થાપિત કરવા માટે 20 પોલીસ ટીમો બનાવવામાં આવી છે.

બીજી તરફ, મુખ્યમંત્રી દેવેન્દ્ર ફડણવીસે મોડી રાત્રે રાજ્ય ભાજપ પ્રમુખ અને કેબિનેટ મંત્રી ચંદ્રશેખર બાવનકુલે સાથે બેઠક યોજી હતી. આ પછી બાવનકુલે નાગપુર જવા રવાના થયા. મુખ્યમંત્રીએ તેમને ઘટનાનો અહેવાલ રજૂ કરવા કહ્યું છે. છત્રપતિ સંભાજીનગરમાં ઔરંગઝેબના મકબરા પર સુરક્ષા વધારી દેવામાં આવી છે. એ.સી.પી.એ જણાવ્યું હતું કે જિલ્લામાં એક કંપની અને SRPFની બે પ્લાટૂન તૈનાત કરવામાં આવી છે.

વડા પ્રધાન નરેન્દ્ર મોદીએ અમેરિકાના પ્રસિદ્ધ પોડકાસ્ટર લેક્સ ફ્રિડમેન સાથેના પોડકાસ્ટમાં ગુજરાતના ગોધરા કાંડ અંગે મહત્ત્વના ખુલાસા કર્યાં હતા. 3 કલાકના આ પોડકાસ્ટમાં વડા પ્રધાન નરેન્દ્ર મોદીએ અનેક પ્રશ્નોનો અંગે ખાસ ચર્ચાઓ કરી હતી. 2002માં થયેલા ગોધરાકાંડ વિશે પણ પીએમ મોદીએ ચર્ચા કરી હતી. જ્યારે આ અંગે લેક્સ ફ્રિડમેને પીએમ મોદીને અનેક બાબતના ધારદાર સવાલો કર્યા ત્યારે વડા પ્રધાને તેનો જવાબ પણ શાનદાર આપ્યો હતો.

પીએમ મોદીએ તે સમયની કેન્દ્ર સરકાર પર આક્ષેપ લગાવતા કહ્યું હતું કે, “તે સમયે કેન્દ્રમાં વિપક્ષની સરકાર હતી અને તેમણે ગુજરાત રમખાણો દરમિયાન અમારી સામેના ખોટા કેસોમાં અમને સજા કરાવવાનો પૂરો પ્રયાસ કર્યો હતો.” જો કે, તેમણે ઉમેર્યું કે તેમના તમામ પ્રયત્નો છતાં, ભારતના ન્યાયતંત્રએ સમગ્ર ઘટનાનું ખૂબ જ વિગતવાર વિશ્લેષણ કર્યું અને ત્યારબાદ આરોપીઓને કાયદેસરની સજા થઈ છે.

2002ના રમખાણો પહેલાની પરિસ્થિતિ વર્ણવતા પીએમ મોદીએ કહ્યું હતું કે, “તમે 2002ના રમખાણો વિશે વાત કરો તે પહેલાં, હું તમને એ સમયની પરિસ્થિતિનો યોગ્ય ખ્યાલ આપવા માટે પાછલા વર્ષોની કેટલીક ઘટનાઓ યાદ કરાવવા માંગુ છું. 24 ડિસેમ્બર 1999ના રોજ કાઠમંડુથી દિલ્હી જતું વિમાન હાઇજેક કરીને કંદહાર લઈ જવામાં આવ્યું હતું. વર્ષ 2000માં લાલ કિલ્લા પર આતંકવાદી હુમલો થયો હતો અને ઓક્ટોબર 2001માં જમ્મુ-કાશ્મીર વિધાનસભા પર આતંકવાદી હુમલો થયો હતો.”

વડા પ્રધાન નરેન્દ્ર મોદીએ આ હુલ્લડના કારણની વાત કરતા કહ્યું કે, ટ્રેનમાં આગની ઘટનાએ કેટલાક લોકોએ હિંસા માટે પ્રેરિત કર્યા હતાં. કેન્દ્રમાં સત્તામાં રહેલા વિપક્ષે અમારી સરકાર પર આરોપો લગાવવાનો પ્રયાસ કર્યો. પરંતુ કોર્ટે પરિસ્થિતિ જોઈ અને અમને નિર્દોષ જાહેર કર્યા. અમારા રાજકીય વિરોધીઓ ઇચ્છતા હતા કે અમારા પરના આરોપો સાચા સાબિત થાય. જે લોકો જવાબદાર હતા તેમને કોર્ટમાંથી ન્યાય મળ્યો.

ભારતમાં વક્ફ બોર્ડને લઈને લાંબા સમયથી વિવાદ ચાલી રહ્યો છે. મીડિયા રિપોર્ટ્સ પ્રમાણે ભારતમાં રેલવે અને ડિફેન્સ બાદ સૌથી વધારે જમીન વક્ફ બોર્ડ પાસે છે. દેશમાં વક્ફ બોર્ડ પાસે 8 લાખ એકરથી વધુ જમીન હોવાનું કહેવાય છે. એટલું જ નહીં પરંતુ વકફ એસેટ મેનેજમેન્ટ સિસ્ટમ ઓફ ઈન્ડિયાના ડેટા દર્શાવે છે કે, દેશમાં વકફની 8 લાખ 72 હજાર 321 સ્થાવર અને 16 હજાર 713 જંગમ મિલકતો છે. હવે બોર્ડને લઈને વિવાદ ચાલી રહ્યો છે. વક્ફ બોર્ડની જમીન સરકાર હસ્તક લેવા માટે વિચારણા ચાલી રહી છે. જેનો મુસ્લિમો સાથે કોંગ્રેસ દ્વારા પણ વિરોધ કરવામાં આવી રહ્યો છે.

AIMPLBના ધરણા પર પ્રતિક્રિયા આપતાં વક્ફ JPC અધ્યક્ષ અને ભાજપ સાંસદ
જગદંબિકા પાલે દાવો કર્યો કે, આ બિલ ગરીબ મુસ્લિમ અને પસમાંદા મુસ્લિમ માટે છે. જ્યારે બેઠક થઈ રહી હતી તો તેમાં ઑલ ઇન્ડિયા મુસ્લિમ પર્સનલ લૉ બોર્ડના લોકોને પણ બોલાવવામાં આવ્યા હતા, તમામ સ્ટેઇક હોલ્ડર સામેલ હતા, તેમ છતાં વિરોધ કરવો યોગ્ય નથી. આ મુદ્દે રાજકારણ કરવામાં આવી રહ્યું છે. આ કાયદાને લઈને ભ્રમ પેદા કરવામાં આવી રહ્યો છે. દેશના લોકોને ભ્રમિત કરવામાં આવી રહ્યા છે. દેશ અને રાજ્ય કાયદાથી ચાલે છે. 370 સમયે પણ લોહીની નદીઓ વહેવાની વાત કરવામાં આવી હતી પરંતુ, જમ્મુ-કાશ્મીરમાં એવું કંઈ ન થયું. ત્રિપલ તલાકના સમયે પણ જંતર-મંતર પર વિરોધ કરવામાં આવ્યો હતો. જેમ પહેલાંના સંશોધન દેશના ભલા માટે કરવામાં આવ્યા હતા તેમ વક્ફ પણ દેશના ભલા માટે કરવામાં આવી રહ્યું છે.

એક મુસ્લિમ નેતાએ કહ્યું કે, દરેક ધર્મિક બાબતોનું રક્ષણ કરવું એ ભારતીય બંધારણનો અધિકાર છે. જે આપણાં માટે નમાઝ અને રોજા જરૂરી છે, તેવી જ રીતે વક્ફની રક્ષા કરવી પણ જરૂરી છે. સરકારે વકફ જમીન પર અતિક્રમણ કરનારાઓ સામે કાર્યવાહી કરવી જોઈતી હતી, પરંતુ સરકારે વકફ જમીન પર કબજો કરવા માટે કાયદો બનાવ્યો. આપણે ભારતને ગુલામીના આધારે નહીં પણ વફાદારીના આધારે સ્વીકાર્યું છે.

મોટાભાગના મુસ્લિમ નેતાઓ દ્વારા વક્ફ બોર્ડ સુધારા બિલનો વિરોધ કરવામાં આવી રહ્યો છે. અહી માત્ર વક્ફ બોર્ડ જ નહીં પરંતુ હોળી પર મસ્જિદોને ઢાંકવામાં આવી હતી તેનો પણ ભારે વિરોધ કરવામાં આવ્યો હતો. એક મુસ્લિમ નેતા ઉબૈદુલ્લાહ આઝમીએ કહ્યું કે, આઝાદ ભારતમાં આટલી નફરત ક્યારેય નથી જોઈ. કહ્યું કે, તમે શાસન કરી રહ્યા છો અને નફરતની જ્વાળાઓને ભડકાવી રહ્યા છો. હિન્દુનો ‘હ’ અને મુસ્લિમનો ‘મ’ સાથે મળીને ‘હમ’ બને ​​છે, જેનાથી દેશને આઝાદી મળી છે. તેમ તેમણે ઉમેર્યું હતું.