વિપક્ષ સંસદમાં મુખ્ય ચૂંટણી કમિશનર જ્ઞાનેશ કુમાર વિરુદ્ધ મહાભિયોગ પ્રસ્તાવ લાવવાની તૈયારી કરી રહ્યું છે. એક અખબારની ઈન્વેસ્ટીંગ સ્ટોરી મુજબ ચૂંટણી કમિશનર સુખબીર સિંહ સંધુ અને વિવેક જોશીએ છેલ્લા 10 મહિનામાં ચૂંટણી કમિશનના નિર્ણયો અને કામગીરી સામે ઓછામાં ઓછા 14 લેખિત વાંધાઓ ઉઠાવ્યા છે. આ અહેવાલ બાદ, ઘણા વિપક્ષી પક્ષોએ સંસદમાં મુખ્ય ચૂંટણી કમિશનર જ્ઞાનેશ કુમાર વિરુદ્ધ મહાભિયોગ પ્રસ્તાવ લાવવાની માંગ કરી છે.
વિપક્ષનું કહેવું છે કે મતદાર યાદીના સ્પેશિયલ ઇન્ટેન્સિવ રિવિઝન સહિત અનેક મુદ્દાઓ પર ચૂંટણી કમિશનની પ્રક્રિયા અને પારદર્શિતા અંગે પ્રશ્નો ઉભા થયા છે. વિરોધ પક્ષો કુમારને પદ પરથી હટાવવાની અને સમગ્ર મામલાની તપાસની માંગ કરી રહ્યા છે. દરમિયાન, ચૂંટણી પંચનું કહેવું છે કે તાજેતરના તમામ નિર્ણયો સર્વાનુમતે લેવામાં આવ્યા છે અને અધિકારીઓ દ્વારા ઉઠાવવામાં આવેલા વાંધાઓ સામાન્ય નિર્ણય લેવાની પ્રક્રિયાનો ભાગ છે.
કોકરોચ જનતા પાર્ટી (CJP)એ મુખ્ય ચૂંટણી કમિશનર જ્ઞાનેશ કુમારના રાજીનામાની માંગ સાથે 48 કલાકનું અલ્ટિમેટમ આપ્યું છે. પાર્ટીએ ચેતવણી આપી છે કે આ સમયગાળામાં રાજીનામું નહીં આપવામાં આવે તો દેશવ્યાપી આંદોલન શરૂ કરવામાં આવશે અને ત્યારબાદ દિલ્હીમાં વિરોધ પ્રદર્શન યોજાશે.
દિલ્હીમાં યોજાયેલી પ્રેસ કોન્ફરન્સ દરમિયાન CJPના સ્થાપક અભિજીત દીપકેએ જ્ઞાનેશ કુમાર પર ગંભીર આક્ષેપો કર્યા હતા. તેમણે દાવો કર્યો કે SIR પ્રક્રિયા મારફતે દેશમાં 13 કરોડથી વધુ મતદારોના નામ મતદાર યાદીમાંથી દૂર કરવામાં આવ્યા છે અને આ રીતે લોકોના મતાધિકાર પર અસર થઈ રહી છે.
