ચીન હવે માત્ર રૉકેટને અવકાશમાં મોકલવા નહીં, પરંતુ ઉડાન બાદ તેને ફરી જમીન પર ઉતારવાની દોડમાં પણ ઝડપથી આગળ વધી રહ્યું છે. આજે ચીની ખાનગી કંપની લેન્ડસ્પેસના Zhuque-3 રૉકેટના પ્રથમ તબક્કાને સફળતાપૂર્વક જમીન પર પાછો ઉતારવામાં આવ્યો. આ ચીન માટે મોટી સિદ્ધિ છે, કારણ કે પહેલીવાર ઓર્બિટલ-ક્લાસ બૂસ્ટરને લેન્ડિંગ લેગ્સની મદદથી નિયંત્રિત રીતે જમીન પર ઉતારવામાં આવ્યું છે.
અહેવાલો મુજબ, આ લેન્ડસ્પેસનો બીજો લેન્ડિંગ પ્રયાસ હતો અને તેની સફળતા બાદ કંપની SpaceX તથા Blue Originની સાથે ફરી ઉપયોગ કરી શકાય તેવી ઓર્બિટલ રૉકેટ ટેક્નોલોજી ધરાવતી ખાનગી કંપનીઓના જૂથમાં સામેલ થઈ છે.
66.1 મીટર ઊંચું Zhuque-3 સ્ટેનલેસ સ્ટીલથી બનેલું છે અને મિથેન તથા લિક્વિડ ઓક્સિજનથી ચાલે છે. કંપનીનું કહેવું છે કે તેનું બૂસ્ટર 20 વખત સુધી ફરી ઉપયોગ કરી શકાય તે રીતે બનાવાયું છે. તેની ક્ષમતા 14.2 ટન સુધીનો પેલોડ લો અર્થ ઓર્બિટમાં એક વખતના ઉપયોગમાં પહોંચાડવાની છે, જ્યારે SpaceXનું Falcon 9 લગભગ 22.8 ટન સુધી પહોંચાડી શકે છે.
આ પહેલાં 10 જુલાઈએ ચીને Long March-10Bના પ્રથમ તબક્કાને સમુદ્રમાં પ્લેટફોર્મ પર નેટ-કૅપ્ચર સિસ્ટમથી સફળતાપૂર્વક પાછો મેળવ્યો હતો. એટલે જમીન અને સમુદ્ર—બંને પદ્ધતિથી રૉકેટ બૂસ્ટર રિકવર કરવાની ચીનની ક્ષમતા હવે દેખાઈ રહી છે.
આવી ટેક્નોલોજીનો મુખ્ય હેતુ રૉકેટના મોંઘા ભાગો ફરી વાપરી લોન્ચિંગ ખર્ચ ઘટાડવાનો છે. આ પ્રયાસ ચીનની ચોથી ઓર્બિટલ બૂસ્ટર રિકવરી કોશિશ હતી. લેન્ડસ્પેસે મળેલા બૂસ્ટરને આગામી છ મહિનામાં ફરી મિશનમાં ઉપયોગ કરવાની યોજના જાહેર કરી છે. જોકે SpaceXની સરખામણીમાં ચીન હજુ લોન્ચિંગની સંખ્યા અને અનુભવમાં પાછળ છે.
