અમદાવાદમાં આજે (12 જૂન) બપોરે બનેલી એર ઇન્ડિયાના વિમાન દુર્ઘટનામાં ક્રૂ મેમ્બર્સ સહિત 91 લોકોના મોત નીપજ્યા છે. વિમાન દુર્ઘટના જાણ થતાં મુખ્યમંત્રી ભૂપેન્દ્ર પટેલ સુરતથી સીધા અમદાવાદની અસારવા સિવિલ હોસ્પિટલ પહોંચ્યા હતા અને ઇજાગ્રસ્તોની મુલાકાત લઇ તેમના ખબર-અંતર પૂછ્યા હતા. મુખ્યમંત્રી ભૂપેન્દ્ર પટેલે આ ઘટનાને અત્યંત દુર્ભાગ્યપૂર્ણ અને દુઃખદ ગણાવી હતી અને ઊંડો શોક વ્યક્ત કર્યો હતો.

આ ભયાનક અકસ્માત બાદ તેમણે તાત્કાલિક ધોરણે બચાવ અને રાહત કાર્યને વેગ આપવા સૂચનાઓ આપી હતી. તેમણે ઘાયલ મુસાફરોને ઝડપથી સારવાર માટે હોસ્પિટલ પહોંચાડવા માટે ગ્રીન કોરિડોરની વ્યવસ્થા કરવા અને હોસ્પિટલોમાં યુદ્ધના ધોરણે તમામ તબીબી વ્યવસ્થા સુનિશ્ચિત કરવાના પણ નિર્દેશ આપ્યા હતા.

ગુજરાત સરકારે અમદાવાદ પ્લેન ક્રેશ દુર્ઘટના સંદર્ભમાં સ્ટેટ ઈમરજન્સી ઓપરેશન સેન્ટરમાં કંટ્રોલ રૂમ કાર્યરત કર્યો છે. આ કંટ્રોલ રૂમના ફોન નં. 079-232-51900 અને મોબાઈલ નં. 9978405304 ઉપર સંબંધિતો સંપર્ક કરી શકશે.

તાજેતરમાં બૅન્ગલોરમાં બનેલી નાસભાગની ઘટના પરથી બોધપાઠ લઈને આગામી રથયાત્રા દરમ્યાન લોકોની સલામતી માટે અમદાવાદ ક્રાઇમ બ્રાન્ચે આવકારદાયક પગલું ભર્યું છે. અમદાવાદમાં યોજાનારી રથયાત્રામાં આવનારા લાખ્ખો ધાર્મિકજનોની સલામતી માટે જો તમારી પાસે ભીડનિયંત્રણ અને ભાગદોડ રોકવા માટે કોઈ નવી ટેક્નિક કે આઇડિયા હોય તો અમદાવાદ ક્રાઇમ બ્રાન્ચમાં એનું ડેમોન્સ્ટ્રેશન બતાવવા આવી શકો છો.

અમદાવાદમાં 27 જૂને ભગવાન જગન્નાથજીની 148મી રથયાત્રા યોજાવાની છે ત્યારે અમદાવાદ શહેર ક્રાઇમ બ્રાન્ચ દ્વારા આધુનિક સાધનો અને સૉફ્ટવેરના ઉપયોગથી અમદાવાદ શહેરની સુરક્ષાવ્યવસ્થાને વધુ મજબૂત બનાવવા પ્રયત્નશીલ છે અને એના ભાગરૂપે તમામ ટેક સ્ટાર્ટઅપ્સને જાહેર સલામતી અને સુરક્ષા ક્ષેત્રે તેમના નવા આઇડિયા બતાવવા માટે જાહેર આમંત્રણ આપવામાં આવ્યું છે.

ક્રાઇમ બ્રાન્ચના પોલીસ-ઇન્સ્પેક્ટર જે. કે. મકવાણાએ કહ્યું હતું કે ‘રથયાત્રા દરમ્યાન ભીડનિયંત્રણ, ભાગદોડ રોકવાના ઉપાયો તેમ જ મોટા પાયે જાહેર સમારંભો માટે ઉપયોગી સુરક્ષા સંબંધિત ટેક્નૉલૉજી વિશે ટેક્નિકલ લોકો પાસેથી સૂચનો મગાવ્યાં છે. તેઓ બેટર આઇડિયા આપી શકે છે કે પછી કોઈ ઇનોવેટિવ હોય તો એ બતાવી શકે છે. રથયાત્રામાં લોકોની સેફ્ટી માટે શું કરી શકાય એ માટે કંઈક નવીન ટેક્નિક હોય તો એનું ડેમોન્સ્ટ્રેશન આગામી 13 જૂને ગાયકવાડ હવેલી ખાતે આવેલી ક્રાઇમ બ્રાન્ચની કચેરીમાં બતાવી શકે છે.’