નવી વેબસાઇટમાં ક્લીન ઇન્ટરફેસ, ઝડપી ચેકઆઉટ અને એક જ સ્ક્રીન પર તમામ ક્લાસની સીટ ઉપલબ્ધતાની સુવિધા મળશે
ભારતીય રેલવે દ્વારા મુસાફરોને વધુ ઝડપી અને સરળ ઓનલાઈન ટિકિટ બુકિંગનો અનુભવ આપવા માટે IRCTC (Indian Railway Catering and Tourism Corporation) ની નવી વેબસાઇટનું બીટા વર્ઝન (Beta Version) લોન્ચ કરવામાં આવ્યું છે. લગભગ 24 વર્ષ બાદ વેબસાઇટના ઈન્ટરફેસ અને બુકિંગ સિસ્ટમમાં મોટા ફેરફારો કરવામાં આવ્યા છે, જેનાથી ટિકિટ બુકિંગની પ્રક્રિયા વધુ સરળ, ઝડપી અને યુઝર-ફ્રેન્ડલી બનશે.
મુસાફરો નવી વેબસાઇટનો અનુભવ www.irctc.co.in/eticket/ પર જઈને કરી શકે છે. હાલ આ બીટા વર્ઝન માટે યૂઝર્સ પાસેથી ફીડબેક લેવામાં આવી રહ્યો છે, ત્યારબાદ તેને સંપૂર્ણ રીતે સત્તાવાર રીતે લોન્ચ કરવામાં આવશે.
રેલવે મંત્રીના વચન મુજબ લોન્ચ થયું Beta વર્ઝન
કેન્દ્રીય રેલવે મંત્રી અશ્વિની વૈષ્ણવે ગત મહિને જયપુરની MNIT કોલેજમાં વિદ્યાર્થીઓ સાથેની ચર્ચા દરમિયાન 15 જુલાઈ સુધી નવી વેબસાઇટ લોન્ચ કરવાનો વિશ્વાસ વ્યક્ત કર્યો હતો. તે મુજબ હવે IRCTCનું નવું બીટા વર્ઝન જાહેર કરવામાં આવ્યું છે.
નવી વેબસાઇટમાં શું બદલાયું?
નવી IRCTC વેબસાઇટમાં મુસાફરોના અનુભવને વધુ સરળ બનાવવા માટે અનેક મહત્વપૂર્ણ સુધારા કરવામાં આવ્યા છે.
- CAPTCHA અને બિનજરૂરી પોપ-અપ્સથી રાહત
જૂની વેબસાઇટમાં લોગિન અથવા ટિકિટ બુકિંગ દરમિયાન વારંવાર આવતા CAPTCHA, પોપ-અપ્સ અને જાહેરાતો મુસાફરો માટે મુશ્કેલીરૂપ બનતા હતા. નવી વેબસાઇટમાં આ પ્રકારની બિનજરૂરી દખલગીરી દૂર કરવામાં આવી છે, જેના કારણે ઇન્ટરફેસ વધુ સ્વચ્છ અને સરળ બની ગયો છે.
- તમામ ક્લાસની સીટ ઉપલબ્ધતા એક જ સ્ક્રીન પર
અગાઉ અલગ-અલગ ક્લાસ જેવી કે Sleeper, 3AC, 2AC અથવા અન્ય કેટેગરી માટે અલગથી ક્લિક કરવું પડતું હતું. હવે તમામ ક્લાસમાં ઉપલબ્ધ સીટોની માહિતી એક જ સ્ક્રીન પર જોઈ શકાશે, જેનાથી નિર્ણય લેવામાં સમય બચશે.
- વધુ ઝડપી Checkout પ્રક્રિયા
ટિકિટ બુકિંગ માટે જરૂરી સ્ટેપ્સમાં ઘટાડો કરવામાં આવ્યો છે અને પેમેન્ટ પ્રક્રિયાને વધુ સ્મૂધ બનાવવામાં આવી છે. ખાસ કરીને તત્કાલ (Tatkal) ટિકિટ બુકિંગ દરમિયાન આ સુધારો મુસાફરો માટે ખૂબ ઉપયોગી સાબિત થઈ શકે છે.
- Passenger Details ફરીથી ભરવાની જરૂર નહીં
નિયમિત મુસાફરી કરતા યૂઝર્સ માટે પેસેન્જરની વિગતો સેવ રાખવાની સુવિધાને વધુ અસરકારક બનાવવામાં આવી છે. પરિણામે દરેક વખતે મુસાફરોને તમામ વિગતો ફરીથી દાખલ કરવાની જરૂર નહીં પડે.
પ્રતિ મિનિટ 1.5 લાખથી વધુ ટિકિટ બુક કરવાની ક્ષમતા
હાલમાં IRCTCનું વર્તમાન પ્લેટફોર્મ દરરોજ સરેરાશ 14.5 લાખ ઓનલાઈન ટિકિટો હેન્ડલ કરે છે અને પ્રતિ મિનિટ આશરે 32,000 ટિકિટો બુક કરવાની ક્ષમતા ધરાવે છે.
નવી વેબસાઇટ સાથે વિકસાવવામાં આવી રહેલું આધુનિક Passenger Reservation Engine સંપૂર્ણ રીતે કાર્યરત થયા બાદ આ ક્ષમતા વધીને પ્રતિ મિનિટ 1.5 લાખથી વધુ ટિકિટ બુકિંગ સુધી પહોંચવાની શક્યતા છે. આથી ખાસ કરીને Tatkal અને પીક અવર્સ દરમિયાન સર્વર પરનો ભાર ઘટશે અને મુસાફરોને વધુ ઝડપી સેવા મળશે.
હાલ Beta તબક્કામાં, યૂઝર્સ પાસેથી માંગ્યો ફીડબેક
રેલવે મંત્રાલયે હાલ નવી વેબસાઇટને Beta Version તરીકે રજૂ કરી છે અને મુસાફરો પાસેથી સૂચનો તથા ફીડબેક માંગ્યા છે. મળેલા પ્રતિસાદના આધારે જરૂરી સુધારા કર્યા બાદ વેબસાઇટનું સંપૂર્ણ અને સત્તાવાર વર્ઝન લોન્ચ કરવામાં આવશે.
