અમેરિકાએ સતત પાંચમા દિવસે ઈરાનના સૈન્ય ઠેકાણાઓ પર હવાઈ હુમલાઓ ચાલુ રાખતા વળતા જવાબમાં ઈરાને પણ કુવેત અને જોર્ડન ખાતેની અમેરિકાની સૈન્ય છાવણીઓ ઉપર હુમલા કર્યા હતા. તાજેતરના હુમલાઓમાં ઈરાનના કમાન્ડ સેન્ટરો, એર ડિફેન્સ સિસ્ટમો, મિસાઇલ અને ડ્રોન ક્ષમતાઓ તેમજ તટીય દેખરેખ સંબંધિત સુવિધાઓને નિશાન બનાવવામાં આવી હતી. અમેરિકાનો દાવો છે કે આ કાર્યવાહીનો મુખ્ય હેતુ હોર્મુઝ જળમાર્ગમાંથી પસાર થતા આંતરરાષ્ટ્રીય જહાજોને ધમકી પહોંચાડવાની ઈરાનની ક્ષમતાને નબળી બનાવવાનો છે.
અમેરિકી હુમલાઓના જવાબમાં ઈરાનના રિવોલ્યુશનરી ગાર્ડ્સે દાવો કર્યો છે કે તેમણે કુવૈતમાં આવેલા અમેરિકી સૈન્ય એરબેસને નિશાન બનાવ્યો છે. ઈરાનના જણાવ્યા અનુસાર, હુમલામાં અમેરિકી સૈનિકો સાથે જોડાયેલા અર્લી વોર્નિંગ રડાર સિસ્ટમને પણ લક્ષ્ય બનાવવામાં આવી હતી.
ઈરાને વધુમાં એવો પણ દાવો કર્યો છે કે જોર્ડનના અલ-અઝરક એરબેસ પર અમેરિકી સેનાના કોમ્યુનિકેશન સિસ્ટમો અને ઇંધણ સંગ્રહ ટાંકો પર પણ હુમલો કરવામાં આવ્યો છે. આ એરબેસનો ઉપયોગ અમેરિકી દળો દ્વારા પ્રાદેશિક સૈન્ય કામગીરી માટે કરવામાં આવે છે.
બીજી તરફ, અમેરિકાએ ઈરાનના કેટલાક બંદરો પર ફરીથી નાકાબંધી લાગુ કરી હોવાનું અહેવાલોમાં જણાવાયું છે. તેના જવાબમાં ઈરાને ચેતવણી આપી છે કે જો હુમલાઓ ચાલુ રહેશે તો તે સમગ્ર વિસ્તારમાં ઊર્જા નિકાસને અસર પહોંચાડી શકે છે. ઈરાને આ સંઘર્ષને પોતાના અસ્તિત્વની લડાઈ ગણાવ્યો છે.
આ દરમિયાન અમેરિકાના રાષ્ટ્રપતિએ ફરી એકવાર જણાવ્યું છે કે ઈરાન આ સંઘર્ષમાં લાંબા સમય સુધી ટકી શકશે નહીં અને અંતે તેને સમજૂતી માટે આગળ આવવું પડશે.
આ સમગ્ર ઘટનાક્રમને કારણે મધ્ય પૂર્વમાં તણાવ વધુ ઘેરો બન્યો છે અને આંતરરાષ્ટ્રીય સમુદાય પરિસ્થિતિ પર નજીકથી નજર રાખી રહ્યો છે.
