ફેબ્રુઆરીની ગુલાબી ઠંડીમાં જ્યારે હવામાં સ્નેહની સુગંધ ભળે છે, ત્યારે કેલેન્ડરનું 14મું પાનું માત્ર તારીખ નથી રહેતું, પણ એક અહેસાસ બની જાય છે. વેલેન્ટાઈન ડે એટલે માત્ર ગિફ્ટ્સની આપ-લે નહીં, પરંતુ બે દિલોના અતૂટ બંધનનો પુનરોચ્ચાર.

આ વર્ષે ગૂગલે પણ તેના હોમપેજને રોમેન્ટિક રંગોથી સજાવ્યું છે, જે દુનિયાભરના પ્રેમીઓને સંદેશ આપે છે કે સાચો પ્રેમ કિંમતી વસ્તુઓમાં નહીં, પણ નાના પ્રયાસમાં છુપાયેલો હોય છે. ગૂગલે આ વખતે “ગિફ્ટિંગ” એટલે કે ભેટ આપવાની કળાને કેન્દ્રમાં રાખીને ખૂબ જ સુંદર આર્ટવર્ક રજૂ કર્યું છે, જેમાં હાથથી બનાવેલી વસ્તુઓ અને હૃદયસ્પર્શી સંદેશાઓ દ્વારા પ્રેમ વ્યક્ત કરવાની ભાવના દર્શાવવામાં આવી છે.

ગૂગલ ડૂડલ આ વખતે માત્ર એક ગ્રાફિક નથી, પરંતુ એક લાગણી છે. આ વર્ષની થીમ હેન્ડમેડ ગિફ્ટ્સ, પર્સનલ નોટ્સ અને સ્વાદિષ્ટ વાનગીઓ પર આધારિત છે. ગૂગલે જણાવ્યું હતું કે, “આજનું ડૂડલ હાથથી બનાવેલી ભેટોની વિચારશીલતાને સેલિબ્રેટ કરે છે. ભલે તમે પ્રેમથી પત્ર લખતા હોવ કે કોઈના માટે ખાસ જમવાનું બનાવતા હોવ, આ દિવસ આપણે જેની કેર કરીએ છીએ તેને માન આપવાની અદભૂત તક છે.” આ ડૂડલ ભારત સહિત યુકે, મેક્સિકો, ઓસ્ટ્રેલિયા, જાપાન અને તાઈવાન જેવા અનેક દેશોમાં લાઈવ કરવામાં આવ્યું છે.

ગૂગલ દ્વારા વિશેષ પ્રસંગો કે મહાન વિભૂતિઓને સન્માન આપવા માટે હોમપેજ પર ‘ડૂડલ’ મૂકવાની પરંપરા વર્ષો જૂની છે. તેની શરૂઆત 1998માં થઈ હતી, જ્યારે સ્થાપક લેરી પેજ અને સેર્ગેઈ બ્રિને ‘બર્નિંગ મેન’ ફેસ્ટિવલમાં પોતાની હાજરીની જાણકારી આપવા માટે પ્રથમ ડૂડલ બનાવ્યું હતું. ત્યારબાદ વર્ષ 2000માં ફ્રાન્સના બાસ્ટિલ ડે પર પ્રથમ આંતરરાષ્ટ્રીય ડૂડલ રજૂ કરાયું અને 2010માં ‘પેક-મેન’ની વર્ષગાંઠ નિમિત્તે પ્રથમ ઇન્ટરેક્ટિવ ગેમ ડૂડલ લોન્ચ કરવામાં આવ્યું હતું.

મુંબઈ કોસ્ટલ રોડ ભારતનો પહેલો સંગીતમય રસ્તો બન્યો છે. છત્રપતિ સંભાજી મહારાજને સમર્પિત આ કોસ્ટલ રોડ પર ખાસ સંગીત લેન સ્થાપિત કરવામાં આવી છે. જ્યાંથી કોઇ વાહન નિયત કરાયેલ 80 કિમી પ્રતિ કલાકની ગતિથી પસાર થાય ત્યારે સ્લમડોગ મિલિયોનર ફિલ્મનું એ આર રહેમાનનું પ્રસિધ્ધ ગીત જય હો સંભળાય છે. આ વિશ્વનો પાંચમો અને ભારતનો પહેલો સંગીતમય રોડ છે.

મહારાષ્ટ્રના મુખ્યમંત્રી દેવેન્દ્ર ફડણવીસે આ રોડને જનતા માટે ખુલ્લો મુકતાં ખુશી વ્યક્ત કરી કે, આંતરરાષ્ટ્રીય સ્તરની આ નવીનતમ ટેકનિક, ભારતીય સંસ્કૃતિ અને સંગીતનું એક સુંદર મિશ્રણ હોવાને લીધે આ સંગીતમય રસ્તો સમગ્ર દેશમાં જિજ્ઞાસાનું કારણ બનશે.

આ નવીન પ્રયોગ મ્યુનિસિપલ કોર્પોરેશનના મુંબઈ કોસ્ટલ રોડ પર નરીમાન પોઈન્ટથી વરલી સુધીના ઉત્તરીય રુટ પર કરવામાં આવ્યો છે. વરલી તરફ જતી ભૂગર્ભ ટનલમાંથી બહાર નીકળ્યા પછી ડિવાઈડરને અડીને આવેલ પહેલી લેનથી 500 મીટર આગળ સંગીત પટ્ટીઓ લગાવવામાં આવી છે. જો આ પટ્ટીઓ પરથી 70 થી 80 કિમી પ્રતિ કલાકની ઝડપે વાહન ચલાવવામાં આવે તો જય હો ગીતની ધૂન સાંભળી શકાય છે.

જ્યારે કોઇ વાહન નિયત કરાયેલ ચોક્કસ ગતિથી રસ્તા પર લગાવેલી આ સંગીત પટ્ટીઓ પરથી પસાર થાય ત્યારે વાહનથી સંગીત પટ્ટીઓ સાથે પેદા થતા ઘર્ષણથી આ ગીત સંભળાય છે. સંગીત પટ્ટીઓ પર વાહનના ટાયરથી ઘર્ષણ ઉત્પન્ન થતા ધ્વનિ તરંગો પર જય હો ગીતની ધૂન સેટ કરવામાં આવી છે.

સંગીતમય રોડ બનાવવાનો આ નવીન વિચાર 2007 માં જાપાનમાં લોકપ્રિય થયો હતો. જાપાની એંજિનિયર શિઝુઓ શિનોદાએ બુલડોઝરની મદદથી રસ્તા પર કામ કરતી વખતે આ ધ્વનિ અસર શોધી હતી. બાદમાં આ પ્રયોગથી મેલોડી રોડ બનાવવાની ટેકનિક વિકસાવવામાં આવી. અત્યાર સુધી વિશ્વમાં જાપાન, હંગેરી, દક્ષિણ કોરિયા અને સંયુક્ત આરબ અમીરાત આવા પ્રયોગો કરી ચૂક્યા છે. ભારતમાં મુંબઈ ખાતે આ પહેલો પ્રયોગ છે.