ભારતમાં પાઇપવાળા કુદરતી ગેસ (PNG)ના ઉપયોગમાં નોંધપાત્ર વધારો જોવા મળી રહ્યો છે. માર્ચથી અત્યાર સુધીમાં 5.01 લાખથી વધુ નવા PNG કનેક્શન આપવામાં આવ્યા છે, જ્યારે આશરે 5.68 લાખ લોકોએ નવા કનેક્શન માટે નોંધણી કરાવી છે. વધતી માંગ દર્શાવે છે કે લોકો હવે ગેસ માટે વધુ સુવિધાજનક અને સ્થિર વિકલ્પ તરફ વળી રહ્યા છે.

આ વધારો એવા સમયમાં નોંધાયો છે જ્યારે પશ્ચિમ એશિયામાં ચાલી રહેલી તંગદિલીને કારણે LPGના પુરવઠા અંગે ચિંતા વ્યક્ત થઈ રહી છે. સંભવિત વિક્ષેપોને ધ્યાનમાં રાખીને સરકાર ઉદ્યોગો અને ઘરેલુ વપરાશકારોને PNG અપનાવવા પ્રોત્સાહિત કરી રહી છે, કારણ કે તેની સપ્લાય પર વૈશ્વિક પરિસ્થિતિઓનો ઓછો પ્રભાવ પડે છે.

સરકારે એવા વપરાશકારોને પણ સૂચના આપી છે જેમણે PNG કનેક્શન લીધું છે પરંતુ તેનો ઉપયોગ કરતા નથી, તેઓએ LPG પરની નિર્ભરતા ઘટાડીને PNGનો ઉપયોગ શરૂ કરવો જોઈએ. સાથે જ PNG પાઇપલાઇન બિછાવવા માટેની મંજૂરી પ્રક્રિયા ઝડપી બનાવવા માટે પણ પગલાં લેવામાં આવી રહ્યા છે.

પેટ્રોલિયમ અને કુદરતી ગેસ મંત્રાલયના સંયુક્ત સચિવ સુજાતા શર્માના જણાવ્યા મુજબ, 19 એપ્રિલ સુધીમાં લગભગ 39,400 ગ્રાહકોએ પોતાનું LPG કનેક્શન સરેન્ડર કરી દીધું છે. તેમ છતાં, સરકારએ સ્પષ્ટ કર્યું છે કે ઘરેલુ LPGનો પુરવઠો હાલ સ્થિર છે અને દેશમાં ગેસની કોઇ અછત નથી.

દેશના અનેક રાજ્યોમાં ગરમીનો પ્રકોપ જોવા મળી રહ્યો છે. ઘણા શહેરોમાં તાપમાનનો પારો 45 ડિગ્રી સુધી પહોંચ્યો છે. હવામાન વિભાગે ભીષણ ગરમીનું એલર્ટ જાહેર કર્યું છે. હવામાન વિભાગ મુજબ, હરિયાણા, ચંદીગઢ, દિલ્હી, પંજાબ, પૂર્વ રાજસ્થાન, વિદર્ભ, છત્તીસગઢ, પશ્ચિમ ઉત્તર પ્રદેશ, પશ્ચિમ રાજસ્થાન, પશ્ચિમ બંગાળ, ઝારખંડ, બિહાર, ઓડિશા અને પૂર્વ ઉત્તર પ્રદેશના કેટલાક વિસ્તારોમાં 25 એપ્રિલ સુધી લૂ નું એલર્ટ છે.

ગુજરાતમાં કેવું રહેશે હવામાન
હવામાન વિભાગે ગુજરાતમાં માવઠાની આગાહી કરી છે. આજે દક્ષિણ ગુજરાતમાં માવઠું થવાની શક્યતાઓ છે. ડાંગ, તાપી, નવસારીમાં વરસાદ થઈ શકે છે. વલસાડ અને દમણમાં પણ વરસાદની શક્યતાઓ છે. દાદરા અને નગર હવેલીમાં પણ માવઠું થવાની સંભાવનાઓ છે. હવામાન વિભાગે છુટાછવાયા વરસાદની આગાહી કરી છે. સૌરાષ્ટ્રના જિલ્લાઓ પણ વરસાદની શક્યતા છે. અમરેલી અને ભાવનગરમાં હળવો વરસાદ થવાની શક્યતાઓ છે.

હવામાન વિભાગે અમદાવાદમાં 27મી એપ્રિલ સોમવાર સુધી પારો 43 ડિગ્રી રહેવાની આગાહી કરી છે. 26મી એપ્રિલ રવિવારે મતદાન યોજાનાર છે ત્યારે અમદાવાદ શહેરમાં ઉનાળાનો પ્રકોપ વધી રહ્યો છે. હવામાન વિભાગ દ્વારા શહેરમાં સેટેલાઈટ ડેટા અને AI ટેકનોલોજી દ્વારા શહેરના 76 વિસ્તારોને હોટસ્પોટ જાહેર કરાયા છે.આગામી એક સપ્તાહ દરમિયાન બપોરે 12 થી 5 દરમિયાન સાવચેત રહેવા મ્યુનિસિપલ કોર્પોરેશને અપીલ કરી છે.

દેશના અન્ય રાજ્યોમાં કેવું રહેશે હવામાન
તમિલનાડુ, પુડ્ડુચેરી, કરાઈકલમાં 22 એપ્રિલ સુધી, કેરળ, તટીય આંધ્રપ્રદેશમાં 24 એપ્રિલ સુધી, ગુજરાતના દરિયાકાંઠાના વિસ્તારોમાં 24 અને 25 એપ્રિલે લૂ ફૂંકાવાની શક્યતા છે. આ ઉપરાંત હરિયણા, ચંદીગઢ, પશ્ચિમ ઉત્તર પ્રદેશ, મધ્ય પ્રદેશ, વિદર્ભમાં 21 એપ્રિલે રાત્રી પણ ગરમ રહેવાની શક્યતા છે.

IMDએ જણાવ્યું કે, દક્ષિણ, મધ્ય, પૂર્વ અને ઉત્તર પશ્ચિમ ભારતના વિવિધ રાજ્યોમાં સોમવારે મધ્યમથી તીવ્ર પવન ફૂંકાઈ શકે છે. મધ્ય મહારાષ્ટ્ર, મરાઠવાડા, મધ્ય પ્રદેશ, વિદર્ભ અને છત્તીસગઢમાં કેટલાક સ્થળો પર આગામી 24 કલાકમાં કરા પડી શકે છે.