રાષ્ટ્રવાદી કોંગ્રેસ પાર્ટી (શરદ ચંદ્ર પવાર) ના પ્રમુખ અને રાજ્યસભા સાંસદ શરદ પવારને મંગળવારે મુંબઈની બ્રીચ કેન્ડી હોસ્પિટલમાં દાખલ કરવામાં આવ્યા હતા. અહેવાલો અનુસાર, 85 વર્ષીય પીઢ નેતાને નિયમિત તપાસ માટે હોસ્પિટલમાં લાવવામાં આવ્યા હતા. આ કારણે તેમની બારામતી મુલાકાત રદ કરવામાં આવી હતી.
શરદ પવારની પુત્રી અને સાંસદ સુપ્રિયા સુલેએ જણાવ્યું હતું કે તેમની તબિયત સ્થિર છે અને તેમને ફક્ત નિયમિત તપાસ માટે હોસ્પિટલમાં લઈ જવામાં આવ્યા હતા. પત્રકારો સાથે વાત કરતા સુલેએ કહ્યું, “શરદ પવારને નિયમિત તપાસ અને કેટલાક તબીબી પરીક્ષણો માટે હોસ્પિટલમાં દાખલ કરવામાં આવ્યા છે. તેમની સ્થિતિ વિશે વધુ વિગતો પરીક્ષણ અહેવાલો આવ્યા પછી જ ઉપલબ્ધ થશે.”
હોસ્પિટલના સૂત્રોએ પણ પુષ્ટિ આપી છે કે પવારની સ્થિતિ ગંભીર નથી અને તેઓ ડોકટરોની દેખરેખ હેઠળ છે. અગાઉ, ફેબ્રુઆરીમાં, તેમને છાતીમાં ચેપ અને ઉંમર સંબંધિત સ્વાસ્થ્ય સમસ્યાઓને કારણે પુણેની એક હોસ્પિટલમાં દાખલ કરવામાં આવ્યા હતા.
વરિષ્ઠ નેતાના હોસ્પિટલમાં દાખલ થવાના સમાચારથી તેમના ગૃહ મતવિસ્તાર બારામતી અને રાજ્યભરના પક્ષના કાર્યકરોમાં ચિંતાનું મોજું ફરી વળ્યું હતું. શરદ પવાર મંગળવારે બારામતીની મુલાકાતે આવવાના હતા, જ્યાં તેમના અનેક મહત્વપૂર્ણ કાર્યક્રમો અને બેઠકોનું આયોજન હતું. જોકે, ડોકટરોની સલાહ પર, આ મુલાકાત હાલ પૂરતી મુલતવી રાખવામાં આવી છે. પક્ષના અધિકારીઓએ પક્ષના કાર્યકરોને હોસ્પિટલમાં ભીડ ટાળવા અને અફવાઓ પર ધ્યાન ન આપવાની અપીલ કરી છે.
શરદ પવારને મુંબઈની બ્રીચ કેન્ડી હોસ્પિટલમાં દાખલ કરવામાં આવ્યા
દેશમાં ગરમીનો ત્રાસ વધ્યો: અનેક રાજ્યોમાં લૂનું એલર્ટ, તાપમાન 45 ડિગ્રી પાર
દેશના અનેક રાજ્યોમાં ગરમીનો પ્રકોપ જોવા મળી રહ્યો છે. ઘણા શહેરોમાં તાપમાનનો પારો 45 ડિગ્રી સુધી પહોંચ્યો છે. હવામાન વિભાગે ભીષણ ગરમીનું એલર્ટ જાહેર કર્યું છે. હવામાન વિભાગ મુજબ, હરિયાણા, ચંદીગઢ, દિલ્હી, પંજાબ, પૂર્વ રાજસ્થાન, વિદર્ભ, છત્તીસગઢ, પશ્ચિમ ઉત્તર પ્રદેશ, પશ્ચિમ રાજસ્થાન, પશ્ચિમ બંગાળ, ઝારખંડ, બિહાર, ઓડિશા અને પૂર્વ ઉત્તર પ્રદેશના કેટલાક વિસ્તારોમાં 25 એપ્રિલ સુધી લૂ નું એલર્ટ છે.
ગુજરાતમાં કેવું રહેશે હવામાન
હવામાન વિભાગે ગુજરાતમાં માવઠાની આગાહી કરી છે. આજે દક્ષિણ ગુજરાતમાં માવઠું થવાની શક્યતાઓ છે. ડાંગ, તાપી, નવસારીમાં વરસાદ થઈ શકે છે. વલસાડ અને દમણમાં પણ વરસાદની શક્યતાઓ છે. દાદરા અને નગર હવેલીમાં પણ માવઠું થવાની સંભાવનાઓ છે. હવામાન વિભાગે છુટાછવાયા વરસાદની આગાહી કરી છે. સૌરાષ્ટ્રના જિલ્લાઓ પણ વરસાદની શક્યતા છે. અમરેલી અને ભાવનગરમાં હળવો વરસાદ થવાની શક્યતાઓ છે.
હવામાન વિભાગે અમદાવાદમાં 27મી એપ્રિલ સોમવાર સુધી પારો 43 ડિગ્રી રહેવાની આગાહી કરી છે. 26મી એપ્રિલ રવિવારે મતદાન યોજાનાર છે ત્યારે અમદાવાદ શહેરમાં ઉનાળાનો પ્રકોપ વધી રહ્યો છે. હવામાન વિભાગ દ્વારા શહેરમાં સેટેલાઈટ ડેટા અને AI ટેકનોલોજી દ્વારા શહેરના 76 વિસ્તારોને હોટસ્પોટ જાહેર કરાયા છે.આગામી એક સપ્તાહ દરમિયાન બપોરે 12 થી 5 દરમિયાન સાવચેત રહેવા મ્યુનિસિપલ કોર્પોરેશને અપીલ કરી છે.
દેશના અન્ય રાજ્યોમાં કેવું રહેશે હવામાન
તમિલનાડુ, પુડ્ડુચેરી, કરાઈકલમાં 22 એપ્રિલ સુધી, કેરળ, તટીય આંધ્રપ્રદેશમાં 24 એપ્રિલ સુધી, ગુજરાતના દરિયાકાંઠાના વિસ્તારોમાં 24 અને 25 એપ્રિલે લૂ ફૂંકાવાની શક્યતા છે. આ ઉપરાંત હરિયણા, ચંદીગઢ, પશ્ચિમ ઉત્તર પ્રદેશ, મધ્ય પ્રદેશ, વિદર્ભમાં 21 એપ્રિલે રાત્રી પણ ગરમ રહેવાની શક્યતા છે.
IMDએ જણાવ્યું કે, દક્ષિણ, મધ્ય, પૂર્વ અને ઉત્તર પશ્ચિમ ભારતના વિવિધ રાજ્યોમાં સોમવારે મધ્યમથી તીવ્ર પવન ફૂંકાઈ શકે છે. મધ્ય મહારાષ્ટ્ર, મરાઠવાડા, મધ્ય પ્રદેશ, વિદર્ભ અને છત્તીસગઢમાં કેટલાક સ્થળો પર આગામી 24 કલાકમાં કરા પડી શકે છે.
કોલકાતાની સોલ્ટ લેક હોસ્પિટલમાં ભીષણ આગ લાગી
કોલકાતાની સોલ્ટ લેકની આનંદલોક હોસ્પિટલમાં ભીષણ આગ લાગી. આખો વિસ્તાર કાળા ધુમાડાથી છવાયેલો છે. દર્દીઓને સુરક્ષિત રીતે બહાર કાઢવામાં આવી રહ્યા છે. બે ફાયર એન્જિન ઘટનાસ્થળે પહોંચી ગયા છે. પ્રારંભિક માહિતી મુજબ આગ શોર્ટ સર્કિટને કારણે લાગી હતી, જેના કારણે હોસ્પિટલમાં ગભરાટ ફેલાયો હતો. આગ બીજા માળે લાગી હતી. એવી આશંકા છે કે તે બિલ્ડિંગના બાકીના ભાગમાં ફેલાઈ શકે છે. અત્યાર સુધી કોઈ જાનહાનિના અહેવાલ નથી. આગ પર કાબુ મેળવવાના પ્રયાસો ચાલુ છે.
સુરતમાં ફોરેક્સ ઠગાઈ: લગ્નના લાલચે રત્ન કલાકાર પાસેથી લાખોની ઠગી
સુરત જિલ્લાના કામરેજ વિસ્તારમાં રહેતાં રત્ન કલાકારને સોશિયલ મીડિયાના માઘ્યમથી સંપર્કમાં આવેલી અજાણી યુવતીએ લગ્નની લાલચ આપી ફોરેક્સ ટ્રેડિંગના બહાને રૂા. 21.55 લાખની ઓનલાઇન છેતરપિંડી કરી હતી. યુવતીએ મિત્ર સાથે મળી રોકાણના નામે કટકે-કટકે રૂપિયા પડાવી લીધા હતા.
કામરેજના ખોલવડ ગામે બંસરી લકઝરીયામા પ્રકાશ લલ્લુભાઈ સુરાણી (ઉ.વ. 43, મૂળ રહે.અમૃતવેલ, જી.ભાવનગર) પરિવાર સાથે રહે છે અને સુરત ખાતે રત્નકલાકાર તરીકે કામ કરે છે. પ્રકાશ સુરાણીની પત્ની મનીષાનું 4 મહિના પહેલા અવસાન થયું હતું અને બે દીકરી તથા દીકરા સાથે રહે છે. પ્રકાશ સુરાણી ગત ઓક્ટોબર માસમાં ફેસબુક પર રિલ્સ જોતાં હતાં ત્યારે અર્પિતા પટેલ નામની યુવતી સાથે મિત્રતા થઈ હતી. વાતચીત આગળ વધતા અર્પિતાએ પોતાની ઓળખ મુંબઈના મીરા રોડની રહેવાસી તરીકે આપી હતી અને પ્રકાશ સાથે લગ્ન કરવાની ઈચ્છા વ્યક્ત કરી વિશ્વાસ જીતી લીધો હતો.
પ્રકાશ સુરાણીનો વિશ્વાસ કેળવ્યા બાદ અર્પિતાએ પોતે ફોરેક્સ ટ્રેડિંગમાં મોટો નફો મેળવતી હોવાનું જણાવી પ્રકાશને પણ રોકાણ કરવા લલચાવ્યા હતા. અર્પિતાએ ભાવેશ સર નામના શખ્સનો સંપર્ક કરાવી સોનીકોઈ નામની વેબસાઈટ અને અન્ય એપ્લિકેશન દ્વારા રોકાણ કરાવવાનું શરૂ કર્યું હતું. શરૂઆતમાં રૂા. 30,000ના રોકાણ સામે વળતર આપીને પ્રકાશનો વિશ્વાસ સંપાદિત કર્યો હતો. વધુ નફાની લાલચમાં પ્રકાશે તા. 05-11-2025થી તા.20-11-2025 દરમિયાન અલગ-અલગ તારીખે આરટીજીએસ અને ફોન-પે દ્વારા કુલ રૂા. 21,55,092 ટ્રાન્સફર કર્યા હતા. જ્યારે પ્રકાશ પોતાનો નફો વિડ્રો (ઉપાડવા)નો પ્રયાસ કર્યો ત્યારે એપ્લિકેશનમાં એરર હોવાનું અને તે દૂર કરવા માટે વધુ રૂા. 6 લાખની માંગણી કરવામાં આવી હતી. જેથી શંકા જતાં પ્રકાશે તપાસ કરી તો પોતાની સાથે છેતરપિંડી થઈ હોવાનું જણાયું હતું. જે અંગે પ્રકાશે સાયબર હેલ્પલાઇન પર ફરિયાદ નોંધાવ્યા બાદ કામરેજ પોલીસે અર્પિતા પટેલ અને ભાવેશ સર વિરૂધ્ધ આઈ.ટી. એક્ટ હેઠળ ગુનો નોંઘ્યો છે.
ચોમાસા પહેલા મુંબઈમાં ભારે વરસાદની આગાહી, હવામાન વિભાગનું એલર્ટ
ચોમાસા પહેલા મુંબઈમાં મોસમનો પહેલો વરસાદ પડવાની શક્યતા છે. ભારતીય હવામાન વિભાગ (IMD)એ આજે મુંબઈ માટે ’યલો એલર્ટ’ જારી કર્યું. આ આગાહી મુંબઈવાસીઓ માટે આશાનું કિરણ આપે છે, જે તાજેતરના દિવસોમાં પ્રવર્તતી તીવ્ર ગરમી અને ભેજથી થોડી રાહત આપે છે.
યલો એલર્ટ જારી કરતી વખતે, હવામાન વિભાગે જણાવ્યું હતું કે મંગળવારે મુંબઈના વિવિધ જિલ્લાઓમાં ગાજવીજ અને વીજળી સાથે વાવાઝોડાની શક્યતા છે. આ સમયગાળા દરમિયાન, 30 થી 40 કિલોમીટર પ્રતિ કલાકની ઝડપે પવન ફૂંકાશે. વધુમાં, મુંબઈના ઘણા વિસ્તારોમાં વરસાદની આગાહી કરવામાં આવી છે.
મુંબઈની સાથે, IMDએ પણ સંકેત આપ્યો છે કે બુધવાર (22 એપ્રિલ) સુધી પાલઘર જિલ્લામાં હળવો વરસાદ અને ગાજવીજ સાથે વરસાદ થવાની શક્યતા છે. દરમિયાન, થાણે અને રાયગઢ જિલ્લામાં પણ યલો એલર્ટ જાહેર કરવામાં આવ્યું છે, જેમાં ગાજવીજ અને મધ્યમ વરસાદની આગાહી કરવામાં આવી છે.
હવામાન આગાહી મુજબ, આ પૂર્વ-ચોમાસાના વરસાદથી ગરમીથી કોઈ નોંધપાત્ર અને કાયમી રાહત મળવાની શક્યતા નથી. મહત્તમ તાપમાન 32-33 ડિગ્રી સેલ્સિયસની આસપાસ રહેવાની ધારણા છે. આ પૂર્વ-ચોમાસાની ઋતુની લાક્ષણિક પેટર્ન સાથે સુસંગત છે, જ્યાં સાંજે વરસાદ તાપમાન ફરી એકવાર વધવા લાગે તે પહેલાં ફક્ત કામચલાઉ રાહત આપે છે.
ગુજરાત ATSની મોટી કાર્યવાહી: સોશિયલ મીડિયા પર દેશ વિરોધી પ્રવૃત્તિ કરનાર 2 યુવકો ઝડપાયા
અમદાવાદમાં ગુજરાત ATSએ બે યુવકોની ધરપકડ કરી છે. પ્રાથમિક તપાસ મુજબ આરોપીઓ સોશિયલ મીડિયા દ્વારા દેશ વિરોધી પ્રવૃત્તિઓમાં સંકળાયેલા હતા. એટીએસની તપાસ દરમિયાન સોશિયલ મીડિયા પર અનેક શંકાસ્પદ અને ઉશ્કેરણીજનક સાહિત્ય મળ્યું હોવાનું સામે આવ્યું છે. હાલ આરોપીઓની પૂછપરછ ચાલી રહી છે અને સમગ્ર મામલે વધુ તપાસ હાથ ધરવામાં આવી છે.
દેશ વિરોધી પ્રવૃત્તિનો ગંભીર આરોપ
પ્રાપ્ત માહિતી અનુસાર, આરોપીઓ સોશિયલ મીડિયા પર દેશવિરોધી પ્રવૃત્તિમાં સક્રિય રીતે સંકળાયેલા હતા. ગુજરાત ATS દ્વારા કરવામાં આવેલી સઘન તપાસ દરમિયાન આરોપીઓના સોશિયલ મીડિયા એકાઉન્ટ્સ પરથી અત્યંત શંકાસ્પદ અને ઉશ્કેરણીજનક સાહિત્ય મળી આવ્યું છે. આ સાહિત્યનો ઉપયોગ લોકોમાં અશાંતિ ફેલાવવા માટે કરવામાં આવતો હોવાની આશંકા છે.
હાલમાં ગુજરાત ATS દ્વારા સિદ્ધપુરથી પકડાયેલા બે અને મુંબઈથી પકડાયેલા એક એમ કુલ ત્રણ આરોપીઓની સઘન પૂછપરછ ચાલુ છે. આ યુવકો પાછળ અન્ય કોઈ સંગઠનનો હાથ છે કે કેમ, અને તેમના નેટવર્કમાં અન્ય કેટલા લોકો સંકળાયેલા છે, તે દિશામાં વધુ તપાસ હાથ ધરવામાં આવી રહી છે. આ ઘટના બાદ સાયબર ક્રાઈમ અને ATS ટીમ સોશિયલ મીડિયા પર વધુ બાજ નજર રાખી રહી છે.
ભારતના અનેક રાજ્યોમાં તીવ્ર ભૂકંપના આંચકા, જાણો રિક્ટર સ્કેલ પર તેની તીવ્રતા
મંગળવારે વહેલી સવારે 5.59 વાગ્યે પૂર્વોત્તર ભારતના અનેક રાજ્યોમાં ભૂકંપના જોરદાર આંચકા અનુભવાયા હતા. રિક્ટર સ્કેલ પર આ ભૂકંપની તીવ્રતા 5.2 માપવામાં આવી છે. ભૂકંપનું કેન્દ્ર મણિપુરનું કામજોંગ હતું, જ્યાં જમીનથી 62 કિમી ઊંડાઈએ હિલચાલ નોંધાઈ હતી.
રિક્ટર સ્કેલ પર ભૂકંપની તીવ્રતાનો અંદાજ કેવી રીતે લગાવી શકાય?
- 0 થી 1.9: સીસ્મોગ્રાફથી મળતી માહિતી
- 2 થી 2.9: ખૂબ જ ઓછું કંપન જાણવા મળે છે
- 3 થી 3.9: એવું લાગે કે કોઈ ભારે વાહન પાસથી પસાર થયું
- 4 થી 4.9: ઘરમાં રાખેલું સામાન તેની જગ્યાએથી નીચે પડી શકે
- 5 થી 5.9: ભારે સામાન અને ફર્નિચર પણ હલી શકે
- 6 થી 6.9: ઈમારતનો પાયો ફટી શકે
- 7 થી 7.9: ઈમારતો તૂટી પડે
- 8 થી 8.9: સુનામીનું જોખમ, વધુ વિનાશ
- 9 અથવા વધુ: સૌથી ભયાનક વિનાશ, ધરતીનું કંપન સ્પષ્ટ અનુભવાય
સુરત PSI પરીક્ષામાં ચીટિંગ કાંડ: મોબાઈલથી ગૂગલ પર જવાબ શોધતો ઉમેદવાર ઝડપાયો
ગુજરાત પોલીસ ભરતી બોર્ડ દ્વારા રવિવારે યોજાયેલી PSI કેડરની પરીક્ષામાં સુરતમાંથી એક ચોંકાવનારો કિસ્સો સામે આવ્યો છે. સુરતના અમરોલી વિસ્તારમાં આવેલી એક સ્કૂલમાં કડક સુરક્ષા અને સીસીટીવીની દેખરેખ વચ્ચે એક ઉમેદવાર મોબાઈલ ફોન ચોરી છુપે અંદર લઈ જવામાં સફળ રહ્યો હતો. જોકે, ગૂગલ પરથી જવાબ શોધવાની લાલચમાં આ ઉમેદવાર રંગેહાથ ઝડપાઈ ગયો છે.
ઘટનાની વિગત એવી છે કે, અમરોલીની મધુવન ઈન્ટરનેશનલ સ્કૂલ ખાતે શિવમ રામકુમાર યાદવ નામનો ઉમેદવાર પરીક્ષા આપી રહ્યો હતો. પરીક્ષા શરૂ થયા બાદ જ્યારે અન્ય ઉમેદવારો પેપર લખવામાં વ્યસ્ત હતા, ત્યારે શિવમ પોતાની બેઠક પાસે છુપાવેલા મોબાઈલ ફોન દ્વારા ગૂગલ સર્ચ કરી પ્રશ્નોના જવાબ શોધી રહ્યો હતો. સુપરવાઈઝરની નજર પડતા જ શિવમની કરતૂત પકડાઈ ગઈ હતી.
આ ઘટનાએ પરીક્ષા કેન્દ્ર પરની સુરક્ષા વ્યવસ્થા સામે ગંભીર સવાલો ઊભા કર્યા છે. પરીક્ષા કેન્દ્રો પર મેટલ ડિટેક્ટર અને સઘન શારીરિક ચેકિંગ હોવા છતાં આ ઉમેદવાર મોબાઈલ ફોન જેવું ઉપકરણ વર્ગખંડ સુધી કેવી રીતે પહોંચાડી શક્યો? શું ચેકિંગ કરનાર સ્ટાફની કોઈ બેદરકારી હતી કે પછી આમાં કોઈ મોટી સંડોવણી છે, તે દિશામાં હવે તપાસ તેજ થઈ છે.
પરીક્ષા સંચાલકોએ તુરંત પોલીસને જાણ કરતા સુરતસાયબર ક્રાઈમ પોલીસ કાફલો ઘટનાસ્થળે દોડી આવ્યો હતો. પોલીસ દ્વારા આરોપી શિવમ યાદવ વિરુદ્ધ પરીક્ષામાં ગેરરીતિ અને પ્રતિબંધિત સાધનોના ઉપયોગ બદલ ગુનો દાખલ કરી તેની ધરપકડ કરવામાં આવી છે
જાપાનમાં ૭.૪ ની તીવ્રતાનો ભૂકંપને પગલે સુનામીની ચેતવણી
જાપાનમાં ૭.૪ ની તીવ્રતાનો ભૂકંપ આવતાં ઉત્તરી દરિયાકાંઠાના વિસ્તારોમાં સુનામીનું જોખમ વધ્યું હતું. જાપાનના બે સૌથી મોટા શહેરો, ઇવાતે પ્રીફેક્ચર અને હોક્કાઇડોમાં ૩ મીટર સુધી ઊંચા મોજાની ચેતવણી આપવામાં આવી છે. સરકારે લોકોને તાત્કાલિક ઊંચા સ્થળે ખસી જવા અને મોજાઓથી સાવધ રહેવા માટે ભારપૂર્વક વિનંતી કરી છે જે ઘણી વખત આવવાની ધારણા છે.
સોમવારે જાપાનમાં એક શક્તિશાળી ભૂકંપ આવ્યો, જેના કારણે લોકોમાં ગભરાટ જોવા મળ્યો હતો. ઉત્તરી જાપાનમાં ૭.૪ ની તીવ્રતાનો ભૂકંપ આવ્યો, જેના કારણે દરિયાકાંઠાના વિસ્તારો માટે સુનામીની ચેતવણી આપવામાં આવી છે. અધિકારીઓએ રહેવાસીઓને, ખાસ કરીને ઇવાતે પ્રીફેક્ચર અને હોક્કાઇડોના રહેવાસીઓને તાત્કાલિક સુરક્ષિત જમીન અથવા ઊંચા સ્થળે ખસી જવા વિનંતી કરી છે. અધિકારીઓનું કહેવું છે કે ૩ મીટર ઊંચા મોજા દરિયાકાંઠે પહોંચી શકે છે અને નુકસાન પહોંચાડી શકે છે.
જાપાન સરકારે ચેતવણી આપી છે કે સુનામીના મોજા ફક્ત એક જ વાર નહીં પરંતુ ઘણી વખત અથડાવી શકે છે. તેથી, બધી ચેતવણીઓ પસાર ન થાય ત્યાં સુધી લોકોએ સુરક્ષિત વિસ્તારોમાં રહેવું જોઈએ. એવું પણ કહેવામાં આવ્યું છે કે મોજા અપેક્ષા કરતા વહેલા અથવા મોડા આવી શકે છે અને તેમની ઊંચાઈ અપેક્ષા કરતા વધુ હોઈ શકે છે.
દક્ષિણ કોરિયાના રાષ્ટ્રપતિ ભારત પ્રવાસે: પીએમ મોદી સાથે કરશે દ્વિપક્ષીય બેઠક
દક્ષિણ કોરિયાના રાષ્ટ્રપતિ લી જે મ્યુંગ અત્યારે ભારતના પ્રવાસે આવ્યાં છે. આજે રાષ્ટ્રપતિ ભવનમાં તેમને સ્વાગત કરવામાં આવ્યું હતું. રાષ્ટ્રપતિ દ્રૌપદી મૂર્મુ અને પ્રધાનમંત્રી નરેન્દ્ર મોદીએ દક્ષિણ કોરિયાથી આવેલા રાજ્ય મહેમાનોનું ઉષ્માભર્યું સ્વાગત કર્યું છે. સૂત્રોના જણાવ્યાં પ્રમાણે કોરિયાઈ રાષ્ટ્રપતિ લી જે મ્યુંગ નવી દિલ્હી ખાતે આવેલા રાજઘાટે જઈને મહાત્મા ગાંધીને શ્રદ્ધાંજલિ અર્પણ કરી હતી. રાષ્ટ્રપતિ લી જે મ્યુંગ સાથે દક્ષિણ કોરિયાની પ્રથમ મહિલા કિમ હી ક્યૂંગ પણ ભારત આવ્યાં છે.
ભારતીય વિદેશ મંત્રાયલ દ્વારા રાષ્ટ્રપતિની આ ભારત યાત્રાને ખૂબ જ મહત્વપૂર્ણ ગણાવી છે અને વ્યૂહાત્મક ભાગીદારીને આગળ વધારવામાં એક મહત્વપૂર્ણ સીમાચિહ્નરૂપ ગણાવવામાં આવ્યું છે. આજે પીએમ મોદી રાષ્ટ્રપતિ લી સાથે દ્વિપક્ષીય બેઠક પણ કરવાના છે. આ બેઠક દરમિયાન જહાજ નિર્માણ, વેપાર, રોકાણ, એઆઈ અને સેમીકંડક્ટર અંગે ખાસ ચર્ચા કરવામાં આવશે તેવું સૂત્રો દ્વારા જાણવા મળ્યું છે. આ સાથે અન્ય કેટલાક વિષયો પર પણ ચર્ચા થઈ શકે છે.
કોરિયાઈ રાષ્ટ્રપતિ ગઈકાલે રાતે ભારત પહોંચ્યાં હતા. તે દરમિયાન દિલ્હી એરપોર્ટ પર કેન્દ્રીય રાજ્ય પ્રધાન હર્ષ મલ્હોત્રાએ તેમનું સ્વાગત કર્યું હતું. તે પછી વિદેશ પ્રધાન એસ જયશંકર સાથે પણ મુલાકાત થઈ હોવાનું સૂત્રો દ્વારા જાણવા મળ્યું છે. ભારત અને કોરિયાના સંબંધો વધારે મજબૂત બને તે માટે આ યાત્રાને ખાસ ગણવામાં આવી રહી છે. આજે બપોરે પીએમ મોદી સાથે દક્ષિણ કોરિયાઈ રાષ્ટ્રપતિ ભોજન કરશે. તે પછી કોરિયાઈ રાષ્ટ્રપતિ ભારતના રાષ્ટ્રપતિ દ્રૌપદી મૂર્મુ સાથે વાતચીત કરશે.
