મુંબઈમાં SIR મુદ્દે રાજકીય ગરમાવો વધ્યો છે. મુખ્ય ચૂંટણી કમિશનર (CEC) જ્ઞાનેશ કુમારના રાજીનામાની માંગ સાથે Cockroach Janta Party (CJP)એ શિવાજી પાર્ક ખાતે ‘જેલ ભરો આંદોલન’ શરૂ કર્યું છે. પોલીસે આ પ્રદર્શનને મંજૂરી ન આપી હોવા છતાં કાર્યકરો અને સમર્થકો શિવાજી પાર્કમાં એકત્ર થયા છે અને સ્થળ પર ભારે પોલીસ બંદોબસ્ત ગોઠવાયો છે.
CJPનું કહેવું છે કે Special Intensive Revision (SIR) દરમિયાન મતદાર યાદીમાં થયેલા ફેરફારો અંગે ગંભીર સવાલો ઊભા થયા છે. સંગઠને SIR પ્રક્રિયા રોકવાની, જૂની મતદાર યાદી પુનઃસ્થાપિત કરવાની અને મુખ્ય ચૂંટણી કમિશનરની નિમણૂક તથા ચૂંટણી પંચની કામગીરીમાં વધુ પારદર્શિતાની માંગ કરી છે.
મુંબઈ પોલીસ દ્વારા શિવાજી પાર્કમાં પ્રદર્શન માટે પરવાનગી નકારવામાં આવી હતી. પોલીસએ 2013ના બોમ્બે હાઈકોર્ટના આદેશ સહિત કાયદો-વ્યવસ્થા અને સ્થળ સંબંધિત કારણોનો ઉલ્લેખ કર્યો હતો. તેમ છતાં CJPએ આંદોલન આગળ વધારવાનો નિર્ણય લીધો હતો. શિવાજી પાર્ક અને દાદર સ્ટેશન આસપાસ પોલીસ તથા અન્ય સુરક્ષા દળોની તૈનાતી વધારવામાં આવી છે.
આ દરમિયાન અભિનેતા નસીરુદ્દીન શાહ પણ CJPના આંદોલન સ્થળે પહોંચ્યા અને સંસ્થાના સ્થાપક અભિજીત દીપકે સાથે મુલાકાત કરી છે. CJP દ્વારા શેર કરવામાં આવેલા વીડિયોમાં બંને વચ્ચે મુલાકાત જોવા મળી છે.
બીજી તરફ, સ્થાનિક રહેવાસીઓના એક વર્ગે શિવાજી પાર્કમાં રાજકીય પ્રદર્શન સામે વાંધો વ્યક્ત કર્યો છે. તેમનો દાવો છે કે મોટા કાર્યક્રમોથી ટ્રાફિક અને રોજિંદા જનજીવન પર અસર પડી શકે છે.
ચૂંટણી પંચે જોકે SIR સંબંધિત નિર્ણયોમાં ત્રણેય ચૂંટણી કમિશનરોની સર્વસંમતિ હોવાનું સ્પષ્ટ કર્યું છે. આથી હવે મુંબઈમાં શરૂ થયેલા આ વિરોધનો આગળનો તબક્કો અને પોલીસની કાર્યવાહી પર નજર રહેશે.
