ગુજરાતમાં એકસાથે સક્રિય થયેલી અનેક વરસાદી સિસ્ટમોના કારણે રાજ્યભરમાં ધોધમાર વરસાદ વરસી રહ્યો છે. હવામાન વિભાગે આગામી પાંચ દિવસ સુધી રાજ્યમાં સાર્વત્રિક વરસાદની આગાહી વ્યક્ત કરી છે. છેલ્લા 24 કલાક દરમિયાન રાજ્યના 164 તાલુકાઓમાં વરસાદ નોંધાયો હતો. સૌથી વધુ અમરેલી જિલ્લાના રાજુલામાં 10.79 ઇંચ વરસાદ પડ્યો હતો. ભારે વરસાદને કારણે અમરેલી જિલ્લામાં સ્કૂલો અને કોલેજોમાં રજા જાહેર કરવામાં આવી છે. જિલ્લાના અનેક વિસ્તારોમાં નદીઓમાં પૂર આવતાં જનજીવન પ્રભાવિત થયું છે અને ગામડાઓમાં મોટા પ્રમાણમાં નુકસાન થયું હોવાનું સામે આવ્યું છે.
ક્યાં કેટલો પડ્યો વરસાદ?
સ્ટેટ ઈમરજન્સી ઓપરેશન સેન્ટર, ગાંધીનગરના આંકડા મુજબ આજે સવારે 6 વાગ્યા સુધીના છેલ્લા 24 કલાકમાં રાજ્યના 164 તાલુકાઓમાં વરસાદ નોંધાયો હતો. જેમાં એક તાલુકામાં 10 ઇંચથી વધુ, એક તાલુકામાં 9 ઇંચથી વધુ, એક તાલુકામાં 6 ઇંચથી વધુ, બે તાલુકામાં 5 ઇંચથી વધુ, છ તાલુકામાં 4 ઇંચથી વધુ, બે તાલુકામાં 3 ઇંચથી વધુ, 14 તાલુકામાં 2 ઇંચથી વધુ, 32 તાલુકામાં 1 ઇંચથી વધુ અને 105 તાલુકામાં 1 ઇંચથી ઓછો વરસાદ નોંધાયો હતો.
અમરેલી જિલ્લામાં મેઘરાજાની ધમાકેદાર બેટિંગ
અમરેલી જિલ્લાના રાજુલામાં રાજ્યનો સૌથી વધુ 10.79 ઇંચ વરસાદ નોંધાયો હતો. ધારીમાં 9.21 ઇંચ અને ખાંભામાં 6.81 ઇંચ વરસાદ વરસ્યો હતો.
| ક્રમ | તાલુકો / શહેર | વરસાદ (ઇંચ) |
|---|---|---|
| 1 | સુબીર (ડાંગ) | 5.16 |
| 2 | સાવરકુંડલા | 5.04 |
| 3 | જાફરાબાદ | 4.92 |
| 4 | ડાંગ | 4.57 |
| 5 | વિજયનગર | 4.49 |
| 6 | બગસરા | 4.29 |
| 7 | લીલીયા | 4.21 |
| 8 | ઊના | 4.21 |
| 9 | જેસર | 4.21 |
| 10 | ચીખલી | 3.58 |
| 11 | અન્ય એક વિસ્તાર | 3.27 |
છેલ્લા 24 કલાકમાં નોંધાયેલ વરસાદ
| ક્રમ | તાલુકો / શહેર | વરસાદ (ઇંચ) |
|---|---|---|
| 1 | મહુવા (ભાવનગર) | 2.99 |
| 2 | વાપી | 2.95 |
| 3 | ગારિયાધાર | 2.80 |
| 4 | ડોલવણ | 2.76 |
| 5 | ઉમરગામ | 2.72 |
| 6 | ગીર ગઢડા | 2.72 |
| 7 | ગણદેવી | 2.64 |
| 8 | કોડીનાર | 2.60 |
| 9 | વ્યારા | 2.48 |
| 10 | ચુડા | 2.17 |
| 11 | અંબિકા | 2.09 |
| 12 | કપરાડા | 2.09 |
| 13 | અમરેલી | 2.01 |
| 14 | મહેસાણા | 1.97 |
| 15 | વઘઈ | 1.93 |
| 16 | પાલિતાણા | 1.85 |
| 17 | સૂત્રાપાડા | 1.81 |
| 18 | કોટડા સાંગાણી | 1.77 |
| 19 | ઓલપાડ | 1.77 |
| 20 | વિસાવદર | 1.57 |
| 21 | તારાપુર | 1.57 |
| 22 | કુકાવાવ-વડિયા | 1.42 |
| 23 | સિદ્ધપુર | 1.42 |
| 24 | લખતર | 1.38 |
| 25 | પલસાણા | 1.34 |
| 26 | દાંતા | 1.34 |
| 27 | વડગામ | 1.34 |
| 28 | કડી | 1.34 |
| 29 | ગોંડલ | 1.34 |
| 30 | નવસારી | 1.34 |
| 31 | હળવદ | 1.34 |
| 32 | વિસનગર | 1.30 |
| 33 | સાયલા | 1.30 |
આજે ક્યાં છે ભારે વરસાદની આગાહી?
હવામાન વિભાગે આજે સુરત, નવસારી, વલસાડ, તાપી, ડાંગ, દમણ તેમજ દાદરા અને નગર હવેલી માટે રેડ એલર્ટ જાહેર કર્યું છે. જ્યારે ગીર સોમનાથ, અમરેલી, ભાવનગર, ભરૂચ અને નર્મદા જિલ્લામાં ઓરેન્જ એલર્ટ આપવામાં આવ્યું છે. ઉપરાંત જૂનાગઢ, રાજકોટ, વડોદરા, પંચમહાલ, દાહોદ અને છોટા ઉદેપુર જિલ્લામાં યલો એલર્ટ જાહેર કરવામાં આવ્યું છે. હવામાન વિભાગે લોકોને ભારે વરસાદ દરમિયાન નદી-નાળા અને નીચાણવાળા વિસ્તારોમાં જવાનું ટાળવા તેમજ જરૂરી સાવચેતી રાખવા અપીલ કરી છે.
