ઈઝરાયેલે ઈરાન પર મોટો જવાબી હુમલો કર્યો છે અને રાજધાની તેહરાનમાં ઈરાની સૈન્ય મથકો પર બોમ્બમારો કર્યો છે. આ હુમલાઓના અવાજ આખા તેહરાનમાં સંભળાયા હતા. ઈઝરાયેલની સેનાએ આ હુમલાઓને જવાબી કાર્યવાહી ગણાવી અને કહ્યું કે તે પોતાના દેશની સુરક્ષા અને સાર્વભૌમત્વ માટે કંઈ પણ કરશે.
આ હુમલાને લઈને ઈઝરાયેલના સંરક્ષણ દળો દ્વારા એક ટ્વીટ પણ કરવામાં આવી હતી. આમાં, ઇઝરાયેલી સૈન્યએ જણાવ્યું હતું કે ઇરાની શાસન દ્વારા ઇઝરાયેલ પર મહિનાઓથી સતત હુમલાના જવાબમાં, ઇઝરાયેલી દળો ઇરાનમાં સૈન્ય લક્ષ્યો પર ચોક્કસ હુમલાઓ કરી રહ્યા છે. ઈરાની શાસન અને તેના પ્રોક્સીઓ 7 ઓક્ટોબરથી ઈઝરાયેલ પર સતત હુમલા કરી રહ્યા છે.
ઇઝરાયેલ આર્મી IDF દ્વારા સોશિયલ મીડિયા પ્લેટફોર્મ ‘X’ પર એક તસવીર પણ શેર કરવામાં આવી છે. તેમાં ઇઝરાયેલના આર્મી ચીફ ઓફ જનરલ સ્ટાફ એલટીજી હરઝી હલેવી સામેલ હતા, જે હાલમાં કેમ્પ રાબિન (ધ કિર્યા) ખાતે ઇઝરાઇલી એરફોર્સના ભૂગર્ભ કમાન્ડ સેન્ટરમાંથી ઇરાન પરના હુમલાને કમાન્ડ કરી રહ્યા છે, તેની સાથે ઇઝરાયેલી એરફોર્સના કમાન્ડિંગ ઓફિસર મેજર જનરલ ટોમર બાર પણ સામેલ હતા. મળતી માહિતી મુજબ, ઈરાન વિરુદ્ધ હુમલામાં સોથી વધુ ઈઝરાયેલના સૈન્ય વિમાન સામેલ છે. હુમલા બાદ ઈરાન અને ઈરાકે તમામ એરસ્પેસ બંધ કરી દીધી છે.
ઇઝરાયેલના હુમલા બાદ શનિવારે પૂર્વી તેહરાનમાં વધુ ચાર વિસ્ફોટ થયા હતા. સ્થાનિક મીડિયાએ કહ્યું છે કે રાજધાનીમાં એર ડિફેન્સ સિસ્ટમ સક્રિય થઈ ગઈ છે. હજુ સુધી કોઈ નુકસાનના સમાચાર નથી. તમને જણાવી દઈએ કે ઈઝરાયેલે 1 ઓક્ટોબરે ઈરાન પર થયેલા મિસાઈલ હુમલાનો બદલો લેવા માટે આ હુમલા કર્યા છે. હિઝબુલ્લાના ચીફ હસન નસરાલ્લાહના મોતને લઈને ઈરાને ઈઝરાયેલ પર હુમલો કર્યો હતો.
