ગુજરાત માધ્યમિક અને ઉચ્ચતર માધ્યમિક શિક્ષણ બોર્ડ (GSEB) એ ધોરણ 10 (SSC)નું પરિણામ 2026 જાહેર કરી દીધું છે. ફેબ્રુઆરી–માર્ચ 2026 દરમિયાન યોજાયેલી SSC અને સંસ્કૃત પ્રથમા બોર્ડ પરીક્ષામાં ભાગ લેનારા લાખો વિદ્યાર્થીઓ હવે પોતાનું પરિણામ ઓનલાઈન જોઈ શકે છે. પરિણામ બોર્ડની સત્તાવાર વેબસાઈટ gseb.org પર ઉપલબ્ધ છે.
રેગ્યુલર વિદ્યાર્થીઓનું શાનદાર પ્રદર્શન
આ પરીક્ષામાં કુલ 7,69,993 રેગ્યુલર વિદ્યાર્થીઓએ નોંધણી કરાવી હતી, જેમાંથી 7,56,392 વિદ્યાર્થીઓએ પરીક્ષા આપી અને 6,34,327 વિદ્યાર્થીઓ પાસ થયા છે. આ પ્રમાણે રેગ્યુલર વિદ્યાર્થીઓનું પરિણામ 83.86% રહ્યું છે. જ્યારે 70,934 રિપીટ વિદ્યાર્થીઓમાંથી 67,404એ પરીક્ષા આપી અને 22,598 વિદ્યાર્થીઓ સફળ થયા, જેમનું પરિણામ 33.53% રહ્યું છે. ઉપરાંત GSOS હેઠળ 25,313 વિદ્યાર્થીઓમાંથી 23,353એ પરીક્ષા આપી અને 6,590 વિદ્યાર્થીઓ પાસ થયા, જેમનું પરિણામ 28.22% રહ્યું છે.
ગાંધીનગરના અજોલ સેન્ટરનું 100% પરિણામ
ફેબ્રુઆરી-માર્ચ 2026માં યોજાયેલી સેકન્ડરી સ્કૂલ લીવિંગ એક્ઝામિનેશનના પરિણામ જાહેર થઈ ગયા છે અને તમામ સફળ વિદ્યાર્થીઓને અભિનંદન પાઠવવામાં આવ્યા છે. આ પરીક્ષા રાજ્યભરમાં 1006 કેન્દ્રોમાં લેવામાં આવી હતી. આ વખતે ગાંધીનગર જિલ્લાના અજોલ સેન્ટરે 100% પરિણામ સાથે પ્રથમ સ્થાન મેળવ્યું છે, જ્યારે દાહોદ જિલ્લાના મુખોસલા સેન્ટર 33.74% પરિણામ સાથે સૌથી નીચે રહ્યું છે.
આ વર્ષે પરીક્ષા દરમિયાન ગડબડીના 5 કેસ નોંધાયા હતા અને CCTV ફૂટેજના આધારે 233 પરીક્ષાર્થીઓની તપાસ કરીને યોગ્ય કાર્યવાહી કરવામાં આવી હતી.
આ પરીક્ષામાં અમદાવાદ, વડોદરા, રાજકોટ અને સુરતની જેલોમાં 61 કેદી પરીક્ષાર્થીઓ માટે પણ પરીક્ષા કેન્દ્ર બનાવવામાં આવ્યા હતા, જેમાંથી 51એ પરીક્ષા આપી હતી. ઉપરાંત દિવ્યાંગ વિદ્યાર્થીઓને વધારાનો સમય અને લખનાર (રાઇટર)ની સુવિધા આપવામાં આવી હતી. કુલ 4,449 દિવ્યાંગ વિદ્યાર્થીઓ પરીક્ષામાં સામેલ થયા હતા, જેમાંથી 2,668 વિદ્યાર્થીઓ સર્ટિફિકેટ માટે પાત્ર બન્યા છે.
પરિણામ જાહેર થયા બાદ રાજ્ય શિક્ષણ બોર્ડ પુનર્મૂલ્યાંકન માટે સત્તાવાર સમયપત્રક અને પ્રક્રિયા જાહેર કરશે. ત્યારબાદ વિદ્યાર્થીઓ બોર્ડની સત્તાવાર વેબસાઈટ gseb.org મારફતે અરજી કરી શકશે.
અરજી કરતી વખતે ઉમેદવારોએ નક્કી કરેલ ફી ભરવી પડશે. એક વિષયના પુનર્મૂલ્યાંકન માટે ₹100 ફી નક્કી કરવામાં આવી છે, જ્યારે તમામ વિષયોના પુનર્મૂલ્યાંકન માટે ₹500 ફી નક્કી છે. વિદ્યાર્થીઓ સંપૂર્ણ ઓનલાઈન પ્રક્રિયા દ્વારા જ અરજી કરી શકશે.
આ રીતે જુઓ પરિણામ
- સૌપ્રથમ સત્તાવાર વેબસાઈટ gseb.org પર જાઓ.
- હોમપેજ પર આપવામાં આવેલ “SSC Result 2026” અથવા “Class 10 Result 2026” લિંક પર ક્લિક કરો.
- હવે તમારો સીટ નંબર (Seat Number) દાખલ કરો, જે એડમિટ કાર્ડ પર આપવામાં આવ્યો છે.
- માહિતી ભર્યા બાદ Submit બટન પર ક્લિક કરો.
- તમારું GSEB 10મીનું પરિણામ 2026 સ્ક્રીન પર દેખાશે, જેમાં વિષયવાર ગુણ દર્શાવેલા હશે.
- પરિણામ ડાઉનલોડ કરો અને ભવિષ્ય માટે તેનો પ્રિન્ટઆઉટ કાઢી લો.
