અમેરિકાના કેન્સાસ રાજ્યમાં આવેલા અચાનક પૂરના કારણે ભારતીય મૂળના 33 વર્ષીય આઈટી પ્રોફેશનલ વેંકટેશ ડોપ્પલાપુડીનું દુઃખદ અવસાન થયું છે. ભારે વરસાદ બાદ સર્જાયેલા પૂરના પાણીમાં તેમનું વાહન તણાઈ જતાં આ કરુણ ઘટના બની હતી. આ બનાવને પગલે હ્યુસ્ટનમાં સ્થિત ભારતીય કોન્સ્યુલેટે શોક વ્યક્ત કર્યો છે અને પરિવારને જરૂરી સહાય પૂરી પાડવાની ખાતરી આપી છે.
વેંકટેશ ડોપ્પલાપુડી નેબ્રાસ્કાના ઓમાહા શહેરમાં રહેતા હતા અને H-1B વિઝા પર અમેરિકામાં કાર્યરત હતા. શનિવારે તેઓ હ્યુસ્ટનથી ઉત્તર તરફ પરત ફરી રહ્યા હતા ત્યારે દક્ષિણ-મધ્ય કેન્સાસ વિસ્તારમાં 6 ઈંચથી વધુ વરસાદ પડ્યો હતો. ભારે વરસાદ અને વાવાઝોડાના કારણે રસ્તા પર પૂર જેવી સ્થિતિ સર્જાઈ હતી, જેમાં તેમનું વાહન ફસાઈને પૂરના જોરદાર પ્રવાહમાં તણાઈ ગયું હતું.
રેસ્ક્યુ ઓપરેશન બાદ મૃતદેહ મળી આવ્યો
સમનર કાઉન્ટી શેરિફ ઓફિસના જણાવ્યા અનુસાર, એક પ્રત્યક્ષદર્શીએ પુલ નજીક એક વાહન પૂરમાં ડૂબી ગયું હોવાની માહિતી આપી હતી. ત્યારબાદ પોલીસ, કેન્સાસ હાઇવે પેટ્રોલ એર યુનિટ અને ડ્રોન ટીમો દ્વારા તાત્કાલિક બચાવ અને શોધખોળ શરૂ કરવામાં આવી હતી. જોકે પાણીનો પ્રવાહ અત્યંત તેજ હોવાથી શરૂઆતમાં બચાવ કામગીરીમાં મુશ્કેલી પડી હતી. સતત પ્રયાસો બાદ રવિવારે વેંકટેશ ડોપ્પલાપુડીનો મૃતદેહ મળી આવ્યો હતો.
ભારતીય કોન્સ્યુલેટ પરિવારના સંપર્કમાં
હ્યુસ્ટનમાં આવેલા ભારતીય કોન્સ્યુલેટ જનરલે આ ઘટનાને લઈને શોક વ્યક્ત કર્યો છે. કોન્સ્યુલેટે જણાવ્યું છે કે તેઓ મૃતકના પરિવાર અને નજીકના સ્વજનોના સતત સંપર્કમાં છે અને કેન્સાસ રાજ્યના સંબંધિત અધિકારીઓ સાથે સંકલન કરીને તમામ જરૂરી કાનૂની પ્રક્રિયા પૂર્ણ કરવામાં મદદ કરી રહ્યા છે.
મૃતદેહને સ્વદેશ મોકલવાની પ્રક્રિયા શરૂ
હાલ ભારતીય કોન્સ્યુલેટ, સ્થાનિક કાયદા અમલીકરણ એજન્સીઓ અને પરિવારના પ્રતિનિધિઓ સાથે મળીને મૃતદેહને ભારત મોકલવાની પ્રક્રિયા પૂર્ણ કરવા માટે જરૂરી કાર્યવાહી કરી રહ્યું છે. આ દુઃખદ ઘટનાએ અમેરિકામાં વસતા ભારતીય સમુદાયમાં પણ શોકની લાગણી ફેલાવી છે.
