સુરત શહેરમાં ગ્લોબલ માર્કેટ વિસ્તારમાં વેપારીઓને ધમકી આપતો નકલી ઇન્કમટેક્સ અધિકારી બની ફરતો શખ્સ વરાછા પોલીસે ઝડપી લીધો છે. બ્લીસ હોટલ નજીકથી ધરપકડ કરાયેલા આરોપીની ઓળખ વિજયસિંહ રાવતસિંહ ચૌહાણ તરીકે કરવામાં આવી છે. વરાછા પોલીસની સતર્કતા અને ઝડપી કાર્યવાહીથી વેપારીઓને મોટી રાહત મળી છે.
પોલીસ કમિશનર અનુપમ સિંહ ગહલૌત, વિશેષ પોલીસ કમિશનર સેક્ટર-1 વાંબાગ જામીર અને ડીસીપી ઝોન-1 આલોક કુમારના માર્ગદર્શન હેઠળ શહેરમાં ગુનાઓ અટકાવવા તથા ફરાર અને અજાણ્યા આરોપીઓને ઝડપી લેવા સૂચનાઓ આપવામાં આવી હતી. આ અંતર્ગત વરાછા પોલીસ સ્ટેશનના ઇન્સપેક્ટર આર.બી. ગોજિયા અને એચ.બી. પટેલે સ્ટાફને વિસ્તારમાં સતર્ક રહી પેટ્રોલિંગ રાખવા જણાવ્યું હતું.
આ દરમિયાન ગ્લોબલ માર્કેટના વેપારીઓ તરફથી માહિતી મળી હતી કે એક શખ્સ ઇન્કમટેક્સ અધિકારી બની માર્કેટમાં ફરતો હોય છે અને વેપારીઓને ભયમાં મૂકતો હોય છે. આ માહિતીના આધારે સર્વેલન્સ પીએસઆઇ એ.જી. પરમારની ટીમને તપાસ માટે મોકલવામાં આવી હતી.
તપાસ દરમિયાન માહિતી મળી કે નકલી ઇન્કમટેક્સ અધિકારી થોડીવારમાં ગ્લોબલ માર્કેટ નજીક આવેલી બ્લીસ હોટલ ખાતે આવનાર છે. ત્યારબાદ સર્વેલન્સ ટીમ તથા પી.સી.આર સ્ટાફે હોટલ પાસે નજર રાખી હતી અને વેપારીઓ સાથે સંકલન કરી શખ્સની ઓળખ પુષ્ટિ કરી હતી.
ખાતરી થયા બાદ નકલી ઇન્કમટેક્સ અધિકારી બની ફરતો વિજયસિંહ રાવતસિંહ ચૌહાણને બ્લીસ હોટલ ખાતેથી ઝડપી લેવામાં આવ્યો હતો. સમગ્ર કાર્યવાહી વરાછા પોલીસ સ્ટેશનના સર્વેલન્સ સ્ટાફ તથા પી.સી.આર ટીમ દ્વારા કરવામાં આવી હતી.
વરાછા પોલીસે આરોપી વિરુદ્ધ આગળની કાયદેસર કાર્યવાહી હાથ ધરી છે અને તે અગાઉ પણ ક્યાં-ક્યાં વેપારીઓને ઠગવાનો પ્રયાસ કર્યો હતો તે બાબતે વધુ તપાસ શરૂ કરવામાં આવી છે.