મહારાષ્ટ્રના પુણે જિલ્લાના ભોર તાલુકામાં એક દિલ દહોળી નાખે તેવી ઘટના સામે આવી છે, જેમાં 4 વર્ષની બાળકી સાથે દુષ્કર્મ કરી તેની હત્યા કરવામાં આવી હોવાનો આરોપ છે. પોલીસ મુજબ, આ મામલે 65 વર્ષીય વ્યક્તિની ધરપકડ કરવામાં આવી છે. ઘટના શુક્રવારે બની હોવાનું જણાવાયું છે.
પોલીસ અધિકારીઓના જણાવ્યા મુજબ, આરોપીએ બાળકીને ખાવાનું આપવાની લાલચ આપી તેને ગાયોના શેડમાં લઈ ગયો, જ્યાં તેના પર દુષ્કર્મ કરીને તેની હત્યા કરી નાખી. જ્યારે બાળકી ગાયબ થઈ, ત્યારે પરિવારજનો તેની શોધખોળમાં લાગ્યા. તપાસ દરમિયાન એક ખાનગી ઘરના CCTV ફૂટેજમાં આરોપી બાળકી સાથે દેખાયો, જેના આધારે પોલીસને મહત્વપૂર્ણ પુરાવા મળ્યા.
આ ઘટના સામે આવતા જ સૈંકડો ગામલોકો પોલીસ ચોકી પર ભેગા થયા અને આરોપી સામે કડક કાર્યવાહી કરવાની માંગ કરી. ત્યારબાદ ભીડે મુંબઈ-બેંગલુરુ હાઈવે પર ચક્કાજામ કરીને વિરોધ નોંધાવ્યો, જેના કારણે ભારે ટ્રાફિક જામ સર્જાયો.
પુણે ગ્રામ્ય પોલીસના સુપરિન્ટેન્ડન્ટ સંદિપસિંહ ગિલએ લોકોમાં શાંતિ જાળવવાની અપીલ કરી અને આશ્વાસન આપ્યું કે આ કેસમાં 15 દિવસની અંદર ચાર્જશીટ દાખલ કરવામાં આવશે.
