ભારતમાં ગાયને ધાર્મિક અને સાંસ્કૃતિક રીતે વિશેષ સ્થાન આપવામાં આવે છે, જ્યારે પશ્ચિમ દેશોમાં હવે ગાય સાથે સમય વિતાવવાનો આ અનુભવ વેલનેસ અને થેરાપીના નવા ટ્રેન્ડ તરીકે લોકપ્રિય બની રહ્યો છે.
અમેરિકા સહિત અનેક દેશોમાં છેલ્લા કેટલાક વર્ષોથી ‘કાઉ કડલિંગ’ (Cow Cuddling) નામની એક અનોખી પ્રવૃત્તિ લોકપ્રિય બની રહી છે. આ પ્રવૃત્તિમાં લોકો ગાય સાથે થોડો સમય વિતાવે છે, તેને પ્રેમથી સ્પર્શ કરે છે, ગળે મળે છે અને શાંતિપૂર્ણ વાતાવરણમાં બેસે છે. માનવામાં આવે છે કે ગાયનો શાંત સ્વભાવ અને તેની નજીક રહેવાથી માનસિક તણાવ ઓછો થાય છે અને મનને શાંતિ મળે છે.
વાયરલ થયેલા અહેવાલ મુજબ, અમેરિકાના ન્યૂયોર્કમાં કેટલીક ફાર્મ્સ આ માટે ખાસ સેશન યોજે છે, જેમાં ભાગ લેવા માટે લોકો અંદાજે 60 ડોલર (ભારતીય ચલણ મુજબ લગભગ ₹5,200) સુધીની ફી ચૂકવે છે. આ સેશન સામાન્ય રીતે 45થી 60 મિનિટનું હોય છે. તેમાં ગાય સાથે સમય પસાર કરવો, તેને સ્પર્શ કરવો અને કુદરતી વાતાવરણમાં આરામનો અનુભવ કરાવવામાં આવે છે.
નિષ્ણાતોનું કહેવું છે કે પ્રાણીઓ સાથે સમય વિતાવવાથી શરીરમાં ઓક્સિટોસિન (Oxytocin) નામના હોર્મોનનું સ્તર વધી શકે છે, જે તણાવ ઘટાડવામાં અને આનંદની લાગણી વધારવામાં મદદરૂપ બને છે. જોકે, આ અંગેના વૈજ્ઞાનિક પુરાવા હજુ મર્યાદિત છે અને તેને કોઈ ચિકિત્સાકીય સારવારનો વિકલ્પ માનવામાં આવતો નથી.
