નેપાળમાં અસામાન્ય અને સંવેદનશીલ પરિસ્થિતિઓને ધ્યાનમાં રાખીને, ઉત્તર પ્રદેશના મુખ્યમંત્રી યોગી આદિત્યનાથની સૂચના પર, ઉત્તર પ્રદેશના પોલીસ મહાનિર્દેશક રાજીવ કૃષ્ણાએ નેપાળને અડીને આવેલા ઉત્તર પ્રદેશના તમામ સરહદી જિલ્લાઓમાં પોલીસને 24 કલાક હાઇ એલર્ટ પર રહેવાના આદેશો જારી કર્યા છે. ઉત્તર પ્રદેશના સરહદી જિલ્લાઓમાં સુરક્ષા વ્યવસ્થાને વધુ મજબૂત બનાવવા માટે, વધારાની પોલીસ ફોર્સ તૈનાત કરવામાં આવી છે અને પેટ્રોલિંગ અને દેખરેખ મજબૂત બનાવવામાં આવી છે જેથી કોઈપણ કટોકટીની પરિસ્થિતિનો તાત્કાલિક સામનો કરી શકાય.
લખનૌમાં કંટ્રોલ રૂમની સ્થાપના
નેપાળમાં ફસાયેલા ભારતીય નાગરિકોને મદદ કરવા માટે, લખનૌના પોલીસ મુખ્યાલય ખાતે અધિક પોલીસ મહાનિર્દેશક, કાયદો અને વ્યવસ્થા હેઠળ કાયદો અને વ્યવસ્થા શાખામાં એક ખાસ કંટ્રોલ રૂમ સ્થાપિત કરવામાં આવ્યો છે. અહીં ત્રણ હેલ્પલાઇન નંબર અને એક વોટ્સએપ નંબર 24×7 કાર્યરત રહેશે, જેના દ્વારા નાગરિકો સીધી મદદ મેળવી શકશે.
- 0522-2390257
- 0522-2724010
- 9454401674
- વોટ્સએપ- 9454401674
સંવેદનશીલ માહિતી અથવા પોસ્ટ પર નજર રાખવામાં આવશે
આ ઉપરાંત, પોલીસ મુખ્યાલયના સોશિયલ મીડિયા યુનિટને નેપાળ સંબંધિત કોઈપણ સંવેદનશીલ માહિતી અથવા પોસ્ટ પર સતત નજર રાખવા અને જરૂર પડયે તાત્કાલિક કાર્યવાહી કરવાનો નિર્દેશ આપવામાં આવ્યો છે. ઉત્તર પ્રદેશ પોલીસ રાજ્યનો કાયદો અને વ્યવસ્થા જાળવવા અને નેપાળમાં કસાયેલા ભારતીય નાગરિકોને શક્ય તેટલી તમામ મદદ પૂરી પાડવા માટે સંપૂર્ણપણે પ્રતિબદ્ધ છે.
સરહદ પર દેખરેખ વધારી
ભારતના વડા પ્રધાન નરેન્દ્ર મોદીએ પણ નેપાળમાં થયેલી હિંસાને દુખદ ગણાવી છે. તેમણે નેપાળના લોકોને શાંતિ જાળવવા અપીલ કરી છે. બિહાર, પશ્ચિમ બંગાળ અને યુપીમાં નેપાળ સરહદ પર દેખરેખ વધારી દેવામાં આવી છે. માહિતી અનુસાર, બિહારથી નેપાળ મુસાફરી પર પ્રતિબંધ મૂકવામાં આવ્યો છે. નેપાળથી આવતા વાહનોની તપાસ કરવામાં આવી રહી છે.
