સુરત શહેરના વરાછા વિસ્તારમાં આવેલ SBI બેંકમાં થયેલી 50 લાખ રૂપિયાની સનસનીખેજ લૂંટના ગુનામાં સુરત ક્રાઇમ બ્રાન્ચ (DCB) ને મોટી સફળતા હાથ લાગી છે. સઘન તપાસ અને ઇન્ટેલિજન્સના આધારે ક્રાઇમ બ્રાન્ચની ટીમે ઉત્તરપ્રદેશના અયોધ્યા અને ગોંડા વિસ્તારમાંથી 2 આરોપીઓની ધરપકડ કરી છે.
પકડાયેલા આરોપીઓના નામ:
- શુભમ કુમાર અજીત ઠાકુર
- વિકાસ સિંઘ અરુણ કુમાર સિંઘ
પકડાયેલા બંને આરોપીઓને કાયદેસરની પ્રક્રિયા અંતર્ગત ટ્રાન્ઝિટ રિમાન્ડ મેળવવાના હેતુથી આજે ગોંડા કોર્ટ (ઉત્તરપ્રદેશ) માં રજૂ કરવામાં આવશે. ટ્રાન્ઝિટ રિમાન્ડ મંજૂર થયા બાદ આરોપીઓને સઘન પૂછપરછ અને વધુ તપાસ માટે સુરત લાવવાની આગળની તજવીજ હાથ ધરવામાં આવશે.
લુંટના આરોપીઓએ બોગસ આધારકાર્ડનો ઉપયોગ કર્યાનો પોલીસ તપાસમાં ખુલાસો થયો છે. વપરાયેલી અપાચે બાઈક લૂંટારૂઓએ તેલંગાણાથી ડુપ્લિકેટ આધારકાર્ડથી ખરીદી હતી. ચોરીમાં વપરાયેલી ત્રણેય બાઈક પહેલીવાર સામે આવી. આ સાથે જ રાંદેર વિસ્તારમાં ભાડે રહેવા માટે પણ બોગસ આધારકાર્ડનો ઉપયોગ કર્યો હોવાનું સામે આવ્યું છે.
પ્રાપ્ત માહિતી અનુસાર વરાછા એલ.એચ.રોડ સ્થિત SBI બેંકની વરાછા બ્રાન્ચમાં સોમવારે ભરબપોરે પાંચથી વધુ લૂંટારૂઓ ખુલ્લા ચેહરામાં હથિયાર સાથે બેંકમાં ઘૂસ્યા હતા અને પિસ્તોલના નાળચે બેંકના સર્વિસ મેનેજર કિરણ પ્રકાશ ભોગે, કેશિયર અનિલ રાઠોડ, જુનિયર એસોસિએટ કાર્તિક પ્રજાપતિ ઉપરાંત ક્રેડિક કાર્ડનું કામ કરતી રિદ્ધિબેન અને પટાવાળા ગૌરવ ચૌધરી તથા ATMનો ગાર્ડ ગજેન્દ્ર પાટિલ ઉપરાંત બીજા છથી સાત ગાહકોને બંધક બનાવી અને ડરાવી ધમકાવી રોકડા 50 લાખ, બેંકકર્મી અને ગ્રાહકોના મોબાઈલ ફોન લૂંટી ત્રણ બાઈક પર નાસી ગયા હતા.
