અમદાવાદની સેવન્થ ડે સ્કૂલ ફરી એક વખત વિવાદમાં આવી છે. સ્કૂલમાં ધોરણ 7ના વિદ્યાર્થીને 3 વિદ્યાર્થીઓએ માર મારી શર્ટના બટન તોડી નાખ્યા છે. વિદ્યાર્થીએ મોનીટર હોવાથી અન્ય વિદ્યાર્થીઓને લાઇનમાં આવવા કહ્યું હતું જેની અદાવત રાખીને ત્રણ વિદ્યાર્થીઓએ એક વિદ્યાર્થીને શર્ટ પર બ્લેડ મારી બટન તોડી નાખી માર માર્યો હતો. મહત્વનું છે કે સેવેન્થ ડે સ્કૂલનો વહીવટ સરકાર હસ્તક છે છતાં આ પ્રકારની ઘટના બની છે. ખોખરા પોલીસ સ્ટેશનમાં ભોગ બનનાર વિદ્યાર્થીના પિતાએ ત્રણ વિદ્યાર્થીઓ સામે ફરિયાદ નોંધાવી છે.
DEO કચેરીની એક ટીમ સ્કૂલમાં પહોંચી
બનાવની જાણ થતા DEO કચેરીની એક ટીમ સ્કૂલમાં પહોંચી છે. આ ટીમ દ્વારા આક્ષેપિત બાળકોને બોલાવીને નિવેદન લેવામાં આવશે અમદાવાદ શહેર DEO રોહિત ચૌધરીએ બનાવને લઈને સ્કૂલના પ્રિન્સિપલ અને એડમીનને નોટિસ ફટકારી છે. આ બનાવ બનતા તેમની બેદરકારી બદલ સસ્પેન્ડ કેમ ના કરવા તે અંગેનો નોટિસમાં ખુલાસો માંગવામાં આવ્યો છે.
