રાજસ્થાનમાં એક ભયાનક માર્ગ અકસ્માતમાં સાત લોકોના મોત થયા છે, જ્યારે એક વ્યક્તિ ગંભીર રીતે ઘાયલ થયો છે. રામગઢ જિલ્લાના રાજરપ્પા પોલીસ સ્ટેશન વિસ્તારમાં આવેલા લારી નજીક રાત્રે એક પેસેન્જર કાર અને ટ્રક વચ્ચે જોરદાર અથડામણ સર્જાતા આ દુર્ઘટના બની હતી. અકસ્માત એટલો ભયાનક હતો કે કારના ફુરચેફુરચા ઉડી ગયા હતા.
અહેવાલો અનુસાર, રામગઢ-બોકારો રોડ પર મધરાતે આશરે 12 વાગ્યે ટ્રક અને કાર વચ્ચે અથડામણ થઈ હતી. કારમાં સવાર તાશા પાર્ટીના સભ્યો ગંભીર રીતે ઘાયલ થયા હતા. અકસ્માતમાં સાત લોકોના મોત થયા છે, જ્યારે એક વ્યક્તિને ગંભીર હાલતમાં સારવાર માટે રામગઢ સદર હોસ્પિટલમાં ખસેડવામાં આવ્યો હતો.
રામગઢ પોલીસના જણાવ્યા અનુસાર, મૃતકોમાં રાજરપ્પા પોલીસ સ્ટેશન વિસ્તારના મારંગમાર્ચા ગામના રહેવાસીઓનો પણ સમાવેશ થાય છે. મૃતકો હજારીબાગ જિલ્લાના ગિદ્દી વિસ્તારની જાણીતી રૂપાલી તાશા પાર્ટી સાથે સંકળાયેલા હતા અને એક લગ્ન સમારોહમાંથી પરત ફરી રહ્યા હતા. સ્થાનિક લોકોના જણાવ્યા મુજબ, અકસ્માતમાં છ લોકોના મોત ઘટનાસ્થળે જ થયા હતા, જ્યારે એક વ્યક્તિએ હોસ્પિટલ પહોંચતા પહેલા રસ્તામાં જ દમ તોડ્યો હતો.
ત્રણ દિવસથી અકસ્માતોની હારમાળા
આ દુર્ઘટના બાદ સ્થાનિક લોકોમાં ભારે રોષ જોવા મળી રહ્યો છે. રહેવાસીઓનો આક્ષેપ છે કે બારલોંગ વિસ્તારમાં છેલ્લા ત્રણ દિવસથી સતત માર્ગ અકસ્માતો થઈ રહ્યા છે, છતાં પ્રશાસન દ્વારા પૂરતા સુરક્ષા પગલાં લેવામાં આવ્યા નથી.
બુધવારે પણ આ જ માર્ગ પર ઓમ ટ્રાવેલ્સની બસ અને ઓટો-રિક્ષા વચ્ચે અકસ્માત સર્જાયો હતો, જેમાં બે લોકોના મોત થયા હતા. છેલ્લા ત્રણ દિવસમાં કુલ 11 લોકોના જીવ ગયા હોવાના કારણે સ્થાનિકો રસ્તા પર ઉતરી આવ્યા હતા અને તંત્ર સામે નારાજગી વ્યક્ત કરી હતી. હાલમાં પોલીસ દ્વારા ટ્રાફિક વ્યવસ્થા પુનઃસ્થાપિત કરવામાં આવી રહી છે તેમજ સમગ્ર અકસ્માતની તપાસ શરૂ કરવામાં આવી છે. અકસ્માતના ચોક્કસ કારણો જાણવા માટે વધુ તપાસ હાથ ધરવામાં આવી રહી છે.
