દિલ્હીના જંતર-મંતર ખાતે આજે, 10 ઓક્ટોબરે યોજાનારા CJPના વિરોધ પ્રદર્શન પહેલાં દિલ્હી પોલીસે મોટી કાર્યવાહી કરી છે. ધ્રુવ રાઠી બાદ હવે અભિજીત દીપકે, સૌરભ દાસ, આશુતોષ રાંકા અને તેમના સાથીઓને પણ અટકાયતમાં લેવામાં આવ્યા હોવાની માહિતી સામે આવી છે. પોલીસ સૂત્રોના જણાવ્યા અનુસાર, દિલ્હી એરપોર્ટ પર ઉતર્યા બાદ તેમને નવી દિલ્હી વિસ્તારમાં ન જવાની સલાહ આપવામાં આવી હતી. જોકે, આ સૂચનનું પાલન ન કરતાં પોલીસે તેમને અટકાયતમાં લીધા હતા.
CJPના જંતર-મંતર ખાતેના પ્રસ્તાવિત વિરોધ પ્રદર્શન પહેલાં જ દિલ્હી પોલીસની કાર્યવાહી તેજ બની છે. ધ્રુવ રાઠી બાદ હવે અભિજીત દીપકે, સૌરભ દાસ અને આશુતોષ રાંકા સહિતના નેતાઓ સામે પણ કાર્યવાહી કરવામાં આવી છે. અહેવાલો અનુસાર, જંતર-મંતર પહોંચે તે પહેલાં જ અભિજીત દીપકે અને તેમના સાથીઓને વિમાનમાંથી જ અટકાયતમાં લેવામાં આવ્યા હતા.
દિલ્હી પોલીસના સૂત્રોના જણાવ્યા મુજબ, IGI એરપોર્ટ પર પોલીસની ટીમ વિમાનની અંદર પહોંચી હતી. ત્યારબાદ અભિજીત દીપકે અને તેમના સાથીઓને સમજાવવામાં આવ્યું હતું કે તેઓ નવી દિલ્હી વિસ્તારમાં ન જાય અને જંતર-મંતર ખાતે યોજાનારા વિરોધ પ્રદર્શનમાં ભાગ લેવા ન પહોંચે. જોકે, તેમણે પોલીસની સલાહ ન માનતાં તેમને વિમાનમાંથી જ અટકાયતમાં લેવામાં આવ્યા હતા.
વિમાનમાંથી જ અભિજીત દીપકેની અટકાયત
સૂત્રોના જણાવ્યા અનુસાર, દિલ્હી પોલીસે IGI એરપોર્ટ પર વિમાનની અંદરથી જ અભિજીત દીપકેને અટકાયતમાં લીધા હતા. અહેવાલ લખાય છે ત્યાં સુધી તેમને એરપોર્ટની બહાર લઈ જવામાં આવ્યા ન હોવાની માહિતી સામે આવી હતી. અભિજીત દીપકેની સાથે CJPના અન્ય કેટલાક નેતાઓને પણ અટકાયતમાં લેવામાં આવ્યા છે.
પોલીસની ટીમ જ્યારે તેમને સમજાવવા માટે વિમાનમાં પહોંચી હતી, ત્યારે અભિજીત દીપકેએ કહ્યું હોવાનું જાણવા મળ્યું છે કે, “તમે મને ધરપકડ કરવા આવ્યા છો? હું તો પોતે જ ધરપકડ વહોરવા આવ્યો છું.” અહેવાલો અનુસાર, ત્યારબાદ તેમને ડિટેન્શન સેન્ટરમાં લઈ જવાની તૈયારી કરવામાં આવી રહી હતી.
CJPએ એક નિવેદન જાહેર કરીને અભિજીત દીપકે અને તેમની ટીમને અટકાયતમાં લેવાની કાર્યવાહીની નિંદા કરી છે. કોકરોચ જનતા પાર્ટી (CJP)એ આક્ષેપ કર્યો છે કે, તેના નેતાઓને પ્રસ્તાવિત વિરોધ પ્રદર્શનના સ્થળે પહોંચતા અટકાવવા માટે આ કાર્યવાહી પૂર્વઆયોજિત રીતે કરવામાં આવી છે.
પાર્ટીએ આ કાર્યવાહીને નાગરિકોની અવરજવરની સ્વતંત્રતાનું ઉલ્લંઘન ગણાવ્યું છે અને ત્રણેય નેતાઓને તાત્કાલિક તથા બિનશરતી મુક્ત કરવાની માંગ કરી છે. ઉલ્લેખનીય છે કે અભિજીત દીપકે સહિતના CJPના નેતાઓ મુંબઈથી દિલ્હી પહોંચ્યા હતા.
ધ્રુવ રાઠીને પણ વહેલી સવારે અટકાયતમાં લેવાયા
અભિજીત દીપકે પહેલાં દિલ્હી પોલીસે યુટ્યુબર ધ્રુવ રાઠીને પણ અટકાયતમાં લીધા હતા. શનિવારે સવારે ગુરુગ્રામના સેક્ટર-56માં આવેલા તેમના નિવાસસ્થાનેથી તેમને અટકાયતમાં લેવામાં આવ્યા હતા. ધ્રુવ રાઠી પણ CJPના વિરોધ પ્રદર્શનમાં ભાગ લેવા માટે આવ્યા હતા.
જંતર-મંતર ખાતે યોજાનારા વિરોધ પ્રદર્શનને ધ્યાનમાં રાખીને સમગ્ર રાષ્ટ્રીય રાજધાની વિસ્તારમાં સુરક્ષાનાં કડક પગલાં લેવામાં આવ્યાં છે. દિલ્હી પોલીસ દ્વારા વિવિધ સ્થળોએ સુરક્ષા વ્યવસ્થા વધારવામાં આવી છે અને પ્રદર્શનકારીઓને પ્રદર્શન સ્થળ સુધી પહોંચતા અટકાવવા માટે કાર્યવાહી કરવામાં આવી રહી છે.
જંતર-મંતર પર વિરોધ પ્રદર્શનને મંજૂરી નહીં
દિલ્હી પોલીસે સુરક્ષાનાં કારણો અને પ્રક્રિયાગત આવશ્યકતાઓનો હવાલો આપીને જંતર-મંતર ખાતે યોજાનારા આ વિરોધ પ્રદર્શનને મંજૂરી આપવાનો ઇનકાર કર્યો હતો. આ ઉપરાંત, દિલ્હી મેટ્રોના 45 સ્ટેશનો બંધ કરવામાં આવ્યાં હોવાના અને અનેક ટ્રેનો રદ કરવામાં આવી હોવાના અહેવાલો પણ સામે આવ્યા છે.
દરમિયાન, પોલીસે સાવચેતીના પગલાંરૂપે અટકાયતની કાર્યવાહી તેજ કરી છે. પ્રદર્શનકારીઓને સ્થળ પર પહોંચતા રોકવા માટે વ્યૂહાત્મક સ્થળોએ પોલીસ જવાનો તહેનાત કરવામાં આવ્યા છે. અત્યાર સુધીમાં નવી દિલ્હી વિસ્તારનાં વિવિધ સ્થળોએથી આશરે 150 પ્રદર્શનકારીઓને અટકાયતમાં લેવામાં આવ્યા હોવાનો અહેવાલ છે.
ઉલ્લેખનીય છે કે CJP મુખ્ય ચૂંટણી કમિશનર જ્ઞાનેશ કુમારના રાજીનામાની માંગ કરી રહી છે.
