દિલ્હીથી ચેન્નઈ જઈ રહેલી ઇન્ડિગોની ફ્લાઇટનું હૈદરાબાદમાં ઈમરજન્સી લેન્ડિંગ કરાવવાની ફરજ પડી હતી. ફ્લાઇટમાં એક મુસાફરની પાવર બેંક ફાટતાં તેના સામાનમાં આગ લાગી હતી. બેગમાંથી ધુમાડો નીકળતો જોઈને મુસાફરોએ તરત જ કેબિન ક્રૂને જાણ કરી હતી. ત્યારબાદ વિમાનને હૈદરાબાદ તરફ ડાયવર્ટ કરવામાં આવ્યું હતું અને ત્યાં ઈમરજન્સી લેન્ડિંગ કરાવવામાં આવ્યું હતું. ઇન્ડિગોએ જણાવ્યું હતું કે, આગની જાણ થતાં જ કેબિન ક્રૂએ પરિસ્થિતિને કાબૂમાં લઈ લીધી હતી. ત્યારબાદ પાઇલટ્સે સાવચેતીના ભાગરૂપે વિમાનને ડાયવર્ટ કરવાનો નિર્ણય લીધો હતો. કંપનીએ મુસાફરોને તેમના ગંતવ્ય સ્થાન ચેન્નઈ પહોંચાડવા માટે બીજા વિમાનની વ્યવસ્થા કરી હતી. આ વિમાનમાં આશરે 180 મુસાફરો અને સાત ક્રૂ મેમ્બર સવાર હતા.
DGCAએ પાવર બેંકને લઈને આપી ચેતવણી
DGCA અનુસાર, પાવર બેંક અને અન્ય રિચાર્જ કરી શકાય તેવાં ઉપકરણોમાં વપરાતી લિથિયમ બેટરી આગ લાગવાનું મોટું કારણ બની શકે છે. આવી બેટરીઓને ઓવરહેડ કેબિન અથવા લગેજ રેકમાં રાખવા પર કડક પ્રતિબંધ છે.
વીડિયો વાયરલ, મુસાફરો ‘ફાયર-ફાયર’ બૂમો પાડતા જોવા મળ્યા
આ ઘટનાનો એક વીડિયો સોશિયલ મીડિયા પર સામે આવ્યો છે. વીડિયોમાં મુસાફરો ‘ફાયર-ફાયર’ બૂમો પાડતા જોવા મળી રહ્યા છે. ત્યારબાદ અન્ય મુસાફરો ઓવરહેડ બિનમાંથી પોતાનો સામાન બહાર કાઢતા પણ દેખાય છે. ન્યૂઝ એજન્સીના અહેવાલ મુજબ, છેલ્લા એક વર્ષમાં ઇન્ડિગોના વિમાનમાં પાવર બેંકમાં આગ લાગવાની આ ત્રીજી ઘટના છે.
