ટેસ્લા અને સ્પેસએક્સના માલિક એલોન મસ્કે ભારતમાં પોતાની સેટેલાઇટ ઇન્ટરનેટ સેવા ‘સ્ટારલિંક’ શરૂ કરવામાં થઈ રહેલા વિલંબને લઈને ગંભીર આરોપ લગાવ્યો છે. તેમનો દાવો છે કે કેટલાક પસંદગીના ઉદ્યોગપતિઓ પોતાનું એકાધિકાર જાળવી રાખવા માટે ભારતમાં સ્ટારલિંકની એન્ટ્રીમાં અવરોધો ઊભા કરી રહ્યા છે.
‘કેટલાક ખાસ લોકો અમને રોકી રહ્યા છે’ – મસ્ક
સોશિયલ મીડિયા પ્લેટફોર્મ X પર એક પોસ્ટના જવાબમાં એલોન મસ્કે લખ્યું કે, દુર્ભાગ્યે, ભારતીય જનતા પર પોતાનું એકાધિકાર જાળવી રાખવા માટે કેટલાક ખાસ લોકો અમને રોકી રહ્યા છે. તેઓ કોણ છે તેનો તમે અંદાજ લગાવી શકો છો? આ ભારતના લોકો વિરુદ્ધનો ગુનો છે.
ભારત માટે શું છે મસ્કની યોજના?
એલોન મસ્કની યોજના ભારતનાં દૂરનાં ગામડાંઓ અને એવા વિસ્તારોમાં હાઈ-સ્પીડ ઇન્ટરનેટ પહોંચાડવાની છે, જ્યાં હજુ સુધી બ્રોડબેન્ડ કનેક્ટિવિટી ઉપલબ્ધ નથી અથવા હાલની ઇન્ટરનેટ સેવાઓ મોંઘી છે.
સ્ટારલિંકનો દાવો છે કે ભારતમાં સેવા શરૂ કરવા માટે કંપની સંપૂર્ણપણે તૈયાર છે. સરકારની મંજૂરી મળતાં જ સેવા શરૂ કરવામાં આવશે.
ભારતમાં સ્ટારલિંકની તૈયારીઓ કેવી છે?
‘ઇન્ડિયા મોબાઇલ કોંગ્રેસ’ (IMC) દરમિયાન સ્ટારલિંકનાં બિઝનેસ ઓપરેશન્સનાં વાઇસ પ્રેસિડેન્ટ લોરેન ડ્રાયરે જણાવ્યું હતું કે કંપનીએ ભારતમાં 20 ગેટવે સાઇટ્સ તૈયાર કરી છે.
આ ઉપરાંત, ભારતીય વપરાશકર્તાઓનો ડેટા દેશની અંદર જ સુરક્ષિત રાખવા માટે ખાસ સુરક્ષા વ્યવસ્થાઓ પણ કરવામાં આવી છે. હવે ભારતમાં સ્ટારલિંકની સેવા શરૂ કરવા માટે સરકારની મંજૂરી મહત્ત્વપૂર્ણ બની છે.
