કચ્છના પશ્ચિમ વિસ્તારમાં ખાવડા નજીક RE પાર્ક પાસે આજે વહેલી સવારે બોલેરો અને ટ્રક વચ્ચે ભીષણ અકસ્માત સર્જાયો હતો. આ દુર્ઘટનામાં પ્રાથમિક માહિતી મુજબ 7 લોકોનાં મોત નીપજ્યાં છે, જ્યારે આશરે 20 શ્રમિકો ઘાયલ થયા હોવાની વિગતો સામે આવી છે.
પ્રાપ્ત માહિતી અનુસાર, બંને વાહનો વચ્ચે થયેલી જોરદાર ટક્કર બાદ ઘટનાસ્થળે અફરાતફરી મચી ગઈ હતી. અકસ્માતની ગંભીરતા એટલી હતી કે કેટલાક શ્રમિકો વાહનોમાં ફસાઈ ગયા હતા, જ્યારે કેટલાક ટ્રક નીચે દબાયા હોવાની પ્રાથમિક વિગતો મળી રહી છે. ઇજાગ્રસ્ત શ્રમિકોની ચીસોથી સમગ્ર હાઇવે ગુંજી ઊઠ્યો હતો.
અકસ્માાતની જાણ થતાં સંબંધિત તંત્ર દ્વારા બચાવ અને રાહત કામગીરી હાથ ધરવામાં આવી હતી. ઇજાગ્રસ્તોને સારવાર માટે હોસ્પિટલ ખસેડવાની કામગીરી કરવામાં આવી હતી. આ દુર્ઘટનાને પગલે સમગ્ર વિસ્તારમાં શોક અને ચિંતાનો માહોલ ફેલાયો છે.
હાલ પશ્ચિમ કચ્છ પોલીસ દ્વારા સમગ્ર ઘટનાની તપાસ હાથ ધરવામાં આવી છે. અકસ્માત કયા સંજોગોમાં સર્જાયો, વાહનો વચ્ચે ટક્કર થવાનું ચોક્કસ કારણ શું હતું અને મૃતકોની ઓળખ સહિતની વિગતો અંગે સત્તાવાર માહિતીની રાહ જોવાઈ રહી છે.
