સપ્તાહના પ્રથમ કારોબારી દિવસે જ સોના-ચાંદીના બજારમાં ભારે વેચવાલી જોવા મળી છે. વૈશ્વિક બજારમાં કિંમતી ધાતુઓ પર વધેલા દબાણની સીધી અસર ભારતીય વાયદા બજાર એટલે કે MCX પર પડી છે. સોમવારના સત્રમાં ચાંદીમાં રૂ.6,600થી વધુનો ઇન્ટ્રાડે ઘટાડો નોંધાયો, જ્યારે સોનામાં પણ લગભગ રૂ.3,000નો કડાકો જોવા મળ્યો. વધતા ક્રૂડ ઓઇલના ભાવ, મજબૂત અમેરિકન ડૉલર અને અમેરિકામાં વ્યાજદર વધુ સમય સુધી ઊંચા રહેવાની શક્યતાએ રોકાણકારોને સાવચેત કર્યા છે.
સોનામાં મોટો ઘટાડો
28 સપ્ટેમ્બરની સવારે ભારતીય બજારમાં MCX સોનામાં ભારે નરમાઈ જોવા મળી હતી. લાઇવ માર્કેટ અપડેટ મુજબ સવારે 9:24 વાગ્યે સોનું રૂ.1,48,007 પ્રતિ 10 ગ્રામ આસપાસ ટ્રેડ થતું હતું, જે અગાઉના સ્તર કરતાં રૂ.2,874 એટલે કે આશરે 1.90%નો ઘટાડો દર્શાવતું હતું. એટલે સોનું રૂ.3,000ના ઘટાડાની નજીક પહોંચી ગયું હતું. બીજી તરફ, અગાઉના સત્રના ડેટા અને જુદા expiry કોન્ટ્રેક્ટને કારણે MCXમાં અલગ-અલગ ગોલ્ડ કોન્ટ્રેક્ટના ભાવ અલગ જોવા મળી શકે છે.
ચાંદી રૂ.6,600થી વધુ તૂટ્યું
ચાંદીમાં ઘટાડો વધુ તીવ્ર રહ્યો. MCXના ડિસેમ્બર કોન્ટ્રેક્ટમાં અગાઉનો બંધ ભાવ રૂ.2,34,696 હતો, જ્યારે સોમવારે ભાવ રૂ.2,32,300 પર ખુલ્યો અને ઇન્ટ્રાડે રૂ.2,28,035 સુધી તૂટી ગયો. એટલે એક તબક્કે રૂ.6,661નો ઘટાડો નોંધાયો હતો. સવારે 10:47 વાગ્યે ચાંદી આશરે રૂ.2,28,272 પર ટ્રેડ થતી હતી, એટલે અગાઉના બંધની સરખામણીએ 2.74%નો ઘટાડો હતો.
આ કડાકા પાછળ શું છે કારણ?
આંતરરાષ્ટ્રીય બજારમાં સોમવારે સ્પોટ ગોલ્ડ 2.1% ઘટીને લગભગ 4,198 ડૉલર પ્રતિ ઔંસ થયું હતું. એહવાલ મુજબ વધતા ઓઇલના ભાવથી ફુગાવાની ચિંતા વધી રહી છે અને તેના કારણે અમેરિકી ફેડરલ રિઝર્વ વધુ વ્યાજદર વધારી શકે તેવી અપેક્ષા મજબૂત થઈ છે. ઊંચા વ્યાજદર અને બોન્ડ યીલ્ડ સોના જેવા નોન-યીલ્ડિંગ એસેટ પર દબાણ વધારે છે. સાથે જ મજબૂત ડૉલર પણ સોનાની માંગ માટે નકારાત્મક પરિબળ બની રહ્યો છે.
આ ઉપરાંત આગામી અમેરિકન આર્થિક ડેટા પહેલાં રોકાણકારોમાં સાવચેતી જોવા મળી રહી છે. પરિણામે કિંમતી ધાતુઓમાં પ્રોફિટ બુકિંગ અને વેચવાલીનું દબાણ વધ્યું છે.
