ઉત્તરાખંડમાં મેઘરાજાએ ફરી રૌદ્ર રૂપ ધારણ કર્યું છે. ભારે વરસાદના રેડ એલર્ટ વચ્ચે ચારધામ યાત્રા પર પણ અસર પડી છે અને ગંગોત્રી-યમુનોત્રી ધામ તરફ જતા શ્રદ્ધાળુઓને સુરક્ષાના કારણોસર રોકી દેવામાં આવ્યા છે. ઉત્તરકાશી જિલ્લા પ્રશાસને હીના અને ડોબાટા હોલ્ડિંગ પોઈન્ટ્સ પર યાત્રિકોની આગળની અવરજવર અસ્થાયી રીતે અટકાવવાના નિર્દેશ આપ્યા છે.
ભારતીય હવામાન વિભાગે 26 સપ્ટેમ્બરે ઉત્તરાખંડના બાગેશ્વર, નૈનીતાલ, પિથોરાગઢ, ચંપાવત અને ઉધમસિંહનગરમાં ભારેથી અતિ ભારે વરસાદ સાથે કેટલાક વિસ્તારોમાં અત્યંત ભારે વરસાદની શક્યતા દર્શાવીને રેડ એલર્ટ જાહેર કર્યું છે. જ્યારે દેહરાદૂન, પૌડી, ચમોલી, રુદ્રપ્રયાગ અને અલ્મોડા માટે ઓરેન્જ એલર્ટ આપવામાં આવ્યું છે.
હવામાન વિભાગે ગાજવીજ અને આકાશીય વીજળી સાથે 40થી 50 કિમી પ્રતિ કલાકની ઝડપે પવન ફૂંકાવાની તથા ઝાપટામાં 60 કિમી પ્રતિ કલાક સુધીની ઝડપ પહોંચવાની ચેતવણી આપી છે. રાજ્યના 4,000 મીટરથી વધુ ઊંચાઈ ધરાવતા વિસ્તારોમાં હિમવર્ષાની શક્યતા પણ છે.
પિથોરાગઢમાં ખરાબ હવામાનને કારણે આદિ કૈલાસ યાત્રા માટે 26 સપ્ટેમ્બરે ઇનર લાઇન પરમિટ જારી કરવાની પ્રક્રિયા રોકવામાં આવી છે. ઊંચાઈવાળા વિસ્તારોમાં વરસાદ અને બરફવર્ષાને કારણે યાત્રિકોને સાવચેતી રાખવા જણાવાયું છે.
મુખ્યમંત્રી પુષ્કર સિંહ ધામીએ 26 અને 27 સપ્ટેમ્બરના હવામાનને ધ્યાનમાં રાખીને લોકોને બિનજરૂરી મુસાફરી ટાળવા અને હવામાન વિભાગની સલાહનું પાલન કરવા અપીલ કરી છે.
