મહિલા એશિયા કપ 2026 હવે ખિતાબથી માત્ર બે જીત દૂર છે અને લીગ તબક્કો પૂરો થતા જ સેમિફાઇનલની ચાર ટીમો નક્કી થઈ ગઈ છે. સૌથી ખાસ વાત એ છે કે ભારત અને શ્રીલંકાએ પોતાના-પોતાના ગ્રુપમાં એકપણ મેચ ગુમાવ્યા વગર ટોચનું સ્થાન મેળવ્યું છે અને બંને ગ્રુપની સરખામણીમાં ભારત નેટ રનરેટમાં આગળ હોવાથી ટોપ પર છે. જ્યારે પાકિસ્તાન અને બાંગ્લાદેશે પણ અંતિમ ચારની ટિકિટ મેળવી છે. હવે તમામની નજર નોકઆઉટ મુકાબલાઓ પર છે.
ગ્રુપ-Aમાં ભારતીય મહિલા ટીમે ત્રણેય લીગ મેચ જીતીને 6 પોઈન્ટ સાથે પ્રથમ સ્થાન મેળવ્યું છે. ભારતનો નેટ રનરેટ +5.471 રહ્યો, જે ગ્રુપમાં સૌથી વધુ છે. પાકિસ્તાન 4 પોઈન્ટ સાથે બીજા ક્રમે રહ્યું. થાઈલેન્ડના 2 પોઈન્ટ રહ્યા, જ્યારે હૉંગકૉંગ ચીનની ટીમને ત્રણેય મેચમાં પરાજય મળ્યો.
ગ્રુપ-Bમાં શ્રીલંકાએ પણ ત્રણેય મેચ જીતી 6 પોઈન્ટ સાથે ટોચનું સ્થાન મેળવ્યું અને +2.730 નેટ રનરેટ નોંધાવ્યો. બાંગ્લાદેશ 4 પોઈન્ટ સાથે બીજા ક્રમે રહ્યું. 8 સપ્ટેમ્બરે બાંગ્લાદેશે UAEને 34 રને હરાવીને સેમિફાઇનલમાં સ્થાન નિશ્ચિત કર્યું હતું. UAE 2 પોઈન્ટ સાથે ત્રીજા ક્રમે રહ્યું, જ્યારે ઇન્ડોનેશિયા કોઈ મેચ જીતી શક્યું નહીં.
હવે 10 સપ્ટેમ્બરે પ્રથમ સેમિફાઇનલમાં ભારત અને બાંગ્લાદેશ આમને-સામને થશે. જ્યારે 11 સપ્ટેમ્બરે બીજી સેમિફાઇનલમાં પાકિસ્તાનનો સામનો શ્રીલંકા સામે થશે. બંને સેમિફાઇનલના વિજેતાઓ 13 સપ્ટેમ્બરે ફાઇનલમાં ટકરાશે.
