સોનું, ચાંદી કે રોકડની લૂંટ તો તમે ઘણી સાંભળી હશે, પરંતુ 330 કિલો વાળની લૂંટ સાંભળીને કદાચ તમને પણ નવાઈ લાગશે. બાંગ્લાદેશના ચુઆડાંગામાં હથિયારધારી શખ્સોએ રસ્તા પર એક કવરડ વાન અટકાવી વાળના 23 કોથળા લૂંટી લીધા હતા. જોકે, ઘટનાના 24 કલાકમાં જ પોલીસે સમગ્ર કેસનો પર્દાફાશ કરી લૂંટાયેલો માલ પરત મેળવી લીધો અને બે લોકોની ધરપકડ કરી હતી.
ઘટના 22 ઓગસ્ટે બપોરે દમુરહુદા ઉપજિલ્લાના કોષાઘાટા વિસ્તારમાં બની હતી. પોલીસના જણાવ્યા અનુસાર, 7થી 8 હથિયારધારી શખ્સોએ કવરડ વાનને રોકી અંદર રહેલા 23 કોથળા વાળ લઈ ફરાર થઈ ગયા હતા. આ વાળનું કુલ વજન આશરે 330 કિલો હતું અને વેપારીઓએ તેની બજાર કિંમત 1 કરોડ બાંગ્લાદેશી ટકાથી વધુ હોવાનું જણાવ્યું હતું.
આ માલ ચુઆડાંગાના વેપારીઓએ ઢાકાથી ખરીદ્યો હતો અને પ્રોસેસિંગ માટે દમુરહુદાના કાર્પસડાંગા વિસ્તારમાં આવેલી ફેક્ટરીમાં લઈ જવાઈ રહ્યો હતો. ખાસ વાત એ છે કે આ એક જ વેપારીનો માલ નહોતો; 23 કોથળામાં 22 માલિકોનો માલ સામેલ હતો.
તપાસ દરમિયાન પોલીસે કવરડ વાનના ડ્રાઈવર 47 વર્ષીય મોહમ્મદ શાહિદુલ ઈસ્લામ અને ફેક્ટરી મેનેજર 39 વર્ષીય સનવાર હુસૈન સંતુની ધરપકડ કરી હતી. પોલીસે બંને પાસેથી મળેલી માહિતીના આધારે 23 કોથળા વાળ ચુઆડાંગા સર્કિટ હાઉસ વિસ્તારેથી બિનવારસી હાલતમાં જપ્ત કર્યા હતા.
પોલીસે કેસ નોંધ્યો છે અને ઘટનામાં સંડોવાયેલા અન્ય આરોપીઓની ઓળખ તથા ધરપકડ માટે તપાસ ચાલુ રાખી છે.