જો તમે પણ દસ્તાવેજો સાચવવામાં બેદરકારી કરતા હોઉં તોહ ચેતવી જજો! અજમેરમાં દર મહિને માત્ર રૂ. 15 હજારની કમાણી કરતા 62 વર્ષીય ટેલરના ઘરે જ્યારે રૂ. 974.97 કરોડની ઈન્કમ ટેક્સ રિકવરી નોટિસ પહોંચી, ત્યારે પરિવારના પગ નીચેથી જમીન સરકી ગઈ હતી. સૌથી ચોંકાવનારી વાત એ છે કે રેખરાજ ઠાડાએ ક્યારેય ડાયમંડનો વ્યવસાય કર્યો હોવાનો ઈનકાર કર્યો છે અને તેઓ ક્યારેય ગુજરાત ગયા જ ન હોવાનું કહે છે. તેમ છતાં ટેક્સ રેકોર્ડમાં તેમનું નામ સુરતની ડાયમંડ કંપનીના ડિરેક્ટર તરીકે સામે આવ્યું છે.
અજમેરના ગોવિંદગઢમાં રહેતા રેખરાજ ઠાડા નાની ભાડાની દુકાનમાં ટેલરિંગનું કામ કરે છે અને સાથે ઈન્શ્યોરન્સ એજન્ટ તરીકે પણ કામ કરે છે. તેમના જણાવ્યા મુજબ 13 ઓગસ્ટે તેમને ઈન્કમ ટેક્સ વિભાગની નોટિસ મળી, જેમાં રૂ. 974 કરોડ 97 લાખ 25 હજાર 457ની ટેક્સ રિકવરીનો ઉલ્લેખ હતો. નોટિસમાં તેમને સુરતની ‘રૂપ રજત ડાયમંડ પ્રાઈવેટ લિમિટેડ’ના ડિરેક્ટર તરીકે દર્શાવવામાં આવ્યા હતા.
મામલો જાણ્યા બાદ પરિવારીએ ચાર્ટર્ડ એકાઉન્ટન્ટની મદદથી કંપની રેકોર્ડ તપાસ્યા તો સુરતની ‘જય બાબેરી ડાયમ પ્રાઈવેટ લિમિટેડ’માં પણ રેખરાજનું નામ ડિરેક્ટર તરીકે નોંધાયેલું હોવાનું સામે આવ્યું હતું. રેખરાજનો આરોપ છે કે તેમના PAN અને અન્ય ઓળખ દસ્તાવેજોનો કથિત દુરુપયોગ કરવામાં આવ્યો છે.
આ મામલે તેમણે પોલીસમાં ફરિયાદ કરી છે અને ઈન્કમ ટેક્સ વિભાગને પણ પોતાનો જવાબ મોકલ્યો છે. હવે તપાસમાં એ સામે આવવાનું બાકી છે કે કંપનીઓમાં તેમનું નામ કેવી રીતે નોંધાયું, દસ્તાવેજોનો ઉપયોગ કોણે કર્યો અને વાસ્તવિક વ્યવહારો પાછળ કોણ હતું.
મહત્વનું એ છે કે માત્ર ટેક્સ નોટિસ મળવી એટલે રૂ. 974.97 કરોડની અંતિમ કાનૂની જવાબદારી સાબિત થઈ ગઈ એવું માનવું યોગ્ય નથી; સમગ્ર મામલો તપાસ અને આગળની કાનૂની પ્રક્રિયાને આધીન છે.
