અમિતાભ બચ્ચનની એક નાની એવી નંબરિંગની ભૂલે સોશિયલ મીડિયા પર જાણે હાસ્યનું નવું કારણ આપી દીધું હતું. X પર પોતાની દરેક પોસ્ટને ક્રમવાર નંબર આપવાની ખાસ આદત ધરાવતા બિગ બી આ વખતે જ ગણતરીમાં થાપ ખાઈ ગયા હતા. ભૂલ નજરે પડતાં તેમણે તરત જ તેને સ્વીકારીને સુધારી પણ લીધી, પરંતુ ત્યાં સુધીમાં ફેન્સે આ ઘટનાને લઈને મજેદાર કમેન્ટ્સ અને મીમ્સનો મારો શરૂ કરી દીધો હતો.
શું હતી અમિતાભ બચ્ચનની ભૂલ?
અમિતાભ બચ્ચને X પર પોસ્ટ નંબર 5817 બાદની પોસ્ટને ભૂલથી 5718 તરીકે નંબર આપી દીધો. ત્યારબાદની પોસ્ટ્સમાં પણ 5719,5720 ક્રમ આગળ વધાર્યો હતો. એક ફેને તેમની આ ભૂલ તરફ ધ્યાન દોરતાં બિગ બીએ તરત જ નંબરિંગ સુધારી અને માફી માંગી હતી.
અભિનેતાએ ફેન EF Sunilનો આ ભૂલ પકડવા બદલ આભાર પણ માન્યો હતો. અહીં ‘EF’નો અર્થ અમિતાભ બચ્ચન પોતાના ચાહકો માટે વાપરતા Extended Family એટલે કે ‘વિસ્તૃત પરિવાર’ એવો થાય છે.
વર્કફ્રન્ટની વાત કરીએ તો અમિતાભ બચ્ચન ‘Kalki 2898 AD’ની સિક્વલ સાથે જોડાયેલા છે. દિગ્દર્શક નાગ અશ્વિને ફિલ્મના શૂટિંગને લઈને 2026માં આગળ વધતી તૈયારીઓની માહિતી આપી હતી.
