થાઈલેન્ડમાં સ્કૂલની સામાન્ય સવાર અચાનક ગોળીઓના ધડાકાથી દહેશતમાં ફેરવાઈ ગઈ હતી. બેંગકોક નજીક નોનથાબુરીના ડેબસિરિન નોનથાબુરી સ્કૂલમાં એક કિશોર વિદ્યાર્થીએ ગોળીબાર કરતાં અનેક લોકોના મોત થયા અને 20થી વધુ લોકો ઘાયલ થયા છે. ઘટનાએ ફરી એકવાર થાઈલેન્ડમાં હથિયારોની ઉપલબ્ધતા અને સ્કૂલની સુરક્ષા અંગે ગંભીર સવાલો ઊભા કર્યા છે.
14 વર્ષના વિદ્યાર્થીએ સ્કૂલ પહોંચતા પહેલાં પોતાના દાદા-દાદીની પણ ગોળી મારી હત્યા કરી હતી. ત્યારબાદ તે ડેબસિરિન નોનથાબુરી સ્કૂલ પહોંચ્યો અને ગોળીબાર કર્યો હતો. સ્કૂલમાં થયેલા હુમલામાં 5 શિક્ષકો અને સ્ટાફના સભ્યોના મોત થયા હતા. હુમલાખોરે બાદમાં પોતાને પણ ગોળી મારી હતી. આમ, હુમલાખોર સહિત કુલ આઠ લોકોના મોત થયા છે.
પોલીસના જણાવ્યા મુજબ હુમલાખોરે ઓછામાં ઓછી 26 ગોળીઓ ચલાવી હતી. તેની પાસે વધુ 34 કારતૂસ પણ મળી આવ્યા હતા. ઉપયોગમાં લેવાયેલી બંદૂક તેના દાદાના નામે નોંધાયેલી હતી. હુમલાખોરે પોતાને ગોળી માર્યા બાદ ઈમરજન્સી ટીમે તેને બચાવવાનો પ્રયાસ કર્યો હતો, પરંતુ તેનું મોત થયું હતું.
ઘટના સમયે સ્કૂલમાં અફરાતફરી મચી ગઈ હતી. એક 18 વર્ષીય વિદ્યાર્થીએ જણાવ્યું કે શરૂઆતમાં તેને ગોળીબારના અવાજ ફટાકડા ફૂટતા હોય તેવો લાગ્યો હતો. જોકે, સતત અનેક ધડાકા થયા બાદ સ્થિતિની ગંભીરતા સમજાઈ હતી.
આ હુમલામાં 23 લોકો ઘાયલ થયા હોવાનું તાજેતરના રિપોર્ટમાં જણાવાયું છે. ઘટનાનું કારણ જાણવા પોલીસ તપાસ કરી રહી છે. શિક્ષણ મંત્રાલયે પણ મામલાની તપાસ શરૂ કરી છે.
થાઈલેન્ડમાં હથિયારોના કાયદા કડક હોવા છતાં દેશમાં નાગરિકો પાસે મોટી સંખ્યામાં બંદૂકો હોવાને કારણે ગન હિંસા લાંબા સમયથી ચિંતાનો વિષય છે. ફેબ્રુઆરી 2026માં પણ દક્ષિણ થાઈલેન્ડની એક સ્કૂલમાં ગોળીબારની ઘટના બની હતી.
