ભારતીય રિઝર્વ બેંક (RBI)એ ફરી એક વખત રેપો રેટમાં કોઈ ફેરફાર ન કરતાં કરોડો હોમ લોન, કાર લોન અને અન્ય લોનધારકોને તાત્કાલિક રાહત મળી છે. જો તમે નજીકના સમયમાં લોન લેવાનું વિચારી રહ્યા છો અથવા હાલ EMI ચૂકવી રહ્યા છો, તો તમારા માટે આ મહત્વપૂર્ણ સમાચાર છે. RBIએ વ્યાજદર 5.25 ટકા પર યથાવત રાખવાનો નિર્ણય લીધો છે, એટલે હાલ બેંકો તરફથી લોનના વ્યાજદરમાં વધારો થવાની શક્યતા ઓછી છે. જોકે, વૈશ્વિક આર્થિક અનિશ્ચિતતા અને વધતી મોંઘવારીને ધ્યાનમાં રાખીને કેન્દ્રીય બેંકે સાવચેતીભર્યો અભિગમ જાળવી રાખ્યો છે.
RBIના ગવર્નર સંજય મલ્હોત્રાએ ત્રણ દિવસ ચાલેલી મોનેટરી પોલિસી કમિટી (MPC)ની બેઠક બાદ જાહેરાત કરી હતી કે રેપો રેટ 5.25 ટકા પર જ રહેશે. સાથે જ પોલિસી સ્ટાન્સ ‘ન્યુટ્રલ’ રાખવામાં આવ્યો છે. સ્ટેન્ડિંગ ડિપોઝિટ ફેસિલિટી (SDF)નો દર 5 ટકા અને માર્જિનલ સ્ટેન્ડિંગ ફેસિલિટી (MSF) તેમજ બેંક રેટ 5.50 ટકા પર યથાવત રાખવામાં આવ્યા છે. આ નિર્ણય સર્વાનુમતે લેવામાં આવ્યો હોવાનું RBIએ જણાવ્યું.
RBIએ જણાવ્યું કે પશ્ચિમ એશિયામાં વધતું ભૂરાજકીય તણાવ, વૈશ્વિક વેપારમાં અનિશ્ચિતતા, કાચા તેલના ભાવ અને ચોમાસાની સ્થિતિ જેવા પરિબળો અર્થતંત્ર પર અસર કરી શકે છે. જૂન 2026માં ભારતની રિટેલ મોંઘવારી વધીને 4.38 ટકા પહોંચી હતી, જે RBIના 4 ટકાના લક્ષ્યાંકથી ઉપર છે. ખાદ્યપદાર્થો અને ઇંધણના ભાવમાં દબાણને કારણે આગામી ત્રિમાસિકમાં પણ મોંઘવારી ઊંચી રહેવાની શક્યતા વ્યક્ત કરવામાં આવી છે, જોકે ત્યારબાદ તેમાં ઘટાડાની અપેક્ષા છે.
ગવર્નર મલ્હોત્રાએ કહ્યું કે ભારતીય અર્થતંત્રની વૃદ્ધિ મજબૂત છે અને બેંકિંગ ક્ષેત્રની મૂડી, લિક્વિડિટી, એસેટ ક્વોલિટી તથા નફાકારકતા સંતોષજનક છે. NBFC ક્ષેત્રની સ્થિતિ પણ અગાઉ કરતાં વધુ મજબૂત હોવાનું તેમણે જણાવ્યું. સાથે જ તેમણે ભારપૂર્વક કહ્યું કે ભવિષ્યમાં વ્યાજદર અંગેનો કોઈપણ નિર્ણય મોંઘવારી, વૈશ્વિક પરિસ્થિતિ અને આર્થિક આંકડાઓને આધારે લેવામાં આવશે. હાલ માટે સામાન્ય ગ્રાહકોની EMIમાં કોઈ ફેરફાર નહીં થાય અને લોનધારકોને રાહત યથાવત રહેશે.
