ગુજરાત પોલીસ બેડામાં લાંબા સમયથી રાહ જોવાઈ રહેલા પ્રમોશનના મહત્વપૂર્ણ આદેશો આખરે જાહેર કરવામાં આવ્યા છે. કેન્દ્ર સરકારના ગૃહ મંત્રાલય અને રાષ્ટ્રપતિ ભવન દ્વારા ગુજરાત પોલીસ સેવા (GPS)ના છ વરિષ્ઠ અધિકારીઓને ભારતીય પોલીસ સેવા (IPS) કેડરમાં પ્રમોશન આપવામાં આવ્યું છે. ભારતીય પોલીસ સેવા (ભરતી) નિયમો, 1954 અને ભારતીય પોલીસ સેવા (પદોન્નતિ દ્વારા નિયુક્તિ) નિયમો, 1955 હેઠળ આ નિયુક્તિઓ કરવામાં આવી છે. પ્રમોશન મેળવનારા તમામ અધિકારીઓને ગુજરાત કેડર ફાળવવામાં આવ્યું છે.
પ્રમોશન મેળવનારા 6 અધિકારીઓની યાદી
કેન્દ્ર સરકાર દ્વારા જાહેર કરાયેલી Select List-2025 મુજબ નીચેના અધિકારીઓને IPS કેડરમાં સ્થાન આપવામાં આવ્યું છે:
- રાજદીપસિંહ એન. નકુમ – ડીસીપી, સ્પેશિયલ ઓપરેશન ગ્રુપ (SOG), સુરત શહેર
- ભરતકુમાર બી. રાઠોડ – ડીસીપી, ઝોન-2, અમદાવાદ શહેર
- રાકેશ ડી. દેસાઈ – ડીસીપી, ઝોન-2, રાજકોટ શહેર
- કલ્પેશકુમાર ટી. ચાવડા – કમાન્ડન્ટ, એસઆરપી ગ્રુપ, ગોંડલ
- પ્રફુલ વી. વાનિયા
- રાજેશકુમાર ટી. પરમાર
એક વર્ષનું પ્રોબેશન અને ઇન્ડક્શન ટ્રેનિંગ ફરજિયાત
સત્તાવાર આદેશ મુજબ તમામ અધિકારીઓને શરૂઆતમાં એક વર્ષ માટે પ્રોબેશન પર રાખવામાં આવશે. ત્યારબાદ ભારતીય પોલીસ સેવા (પરિવીક્ષા) નિયમો મુજબ નિર્ધારિત ઇન્ડક્શન ટ્રેનિંગ પૂર્ણ કરવી ફરજિયાત રહેશે. તાલીમ સફળતાપૂર્વક પૂર્ણ થયા બાદ તેઓને નિયમિત રીતે IPS અધિકારી તરીકે સેવા આપવાનો દરજ્જો મળશે.
પોલીસ બેડામાં ખુશીનો માહોલ
આ પ્રમોશન બાદ રાજ્યના પોલીસ બેડામાં ખુશીનો માહોલ જોવા મળી રહ્યો છે. ગૃહ વિભાગ અને પોલીસ તંત્ર દ્વારા તમામ અધિકારીઓને અભિનંદન પાઠવવામાં આવ્યા છે. હવે આગામી દિવસોમાં તેમને નવા IPS હોદ્દા અનુસાર પોસ્ટિંગ આપવામાં આવશે, જેને લઈને પોલીસ વિભાગમાં ઉત્સુકતા જોવા મળી રહી છે.
