સુરત શહેરમાં ચોમાસાના પ્રથમ જ વરસાદે વહીવટીતંત્રની પ્રિ-મોન્સૂન કામગીરીની પોલ ખોલી નાખી છે. ઉધના ગામ નજીક આવેલા મુખ્ય માર્ગનો એક ભાગ અચાનક ધસી પડતાં રસ્તા પર મોટો ભુવો પડ્યો હતો. ઘટનાના સમયે ત્યાંથી પસાર થઈ રહેલી ST બસ રસ્તો બેસી જતાં ફસાઈ ગઈ હતી, જેના કારણે થોડા સમય માટે ટ્રાફિક પણ પ્રભાવિત થયો હતો.
લોકો મોટી સંખ્યામાં સ્થળ પર પહોંચી ગયા
સદનસીબે આ ઘટનામાં કોઈ જાનહાનિ થઈ નથી, પરંતુ મુખ્ય માર્ગ પર પડેલા ભુવાને કારણે વાહનચાલકો માટે ગંભીર જોખમ ઊભું થયું હતું. ઘટનાની જાણ થતાં સ્થાનિક લોકો મોટી સંખ્યામાં સ્થળ પર પહોંચી ગયા હતા અને તંત્ર સામે ભારે રોષ વ્યક્ત કર્યો હતો.
ગંભીર સવાલો ઊભા થયા
સ્થાનિકોના જણાવ્યા મુજબ રોડનું કામ થોડા સમય પહેલાં જ કરવામાં આવ્યું હતું, છતાં પ્રથમ વરસાદમાં જ રસ્તો બેસી જતાં કામની ગુણવત્તા સામે ગંભીર સવાલો ઊભા થયા છે. લોકોએ આક્ષેપ કર્યો કે માર્ગના નિર્માણ દરમિયાન ગુણવત્તા સાથે સમાધાન કરવામાં આવ્યું છે અને કામમાં ભ્રષ્ટાચાર થયો હોવાની શંકા વ્યક્ત કરી છે.
સ્થાનિકોએ કરી છે માગ
જોકે, આ ઘટનાએ ફરી એકવાર પ્રિ-મોન્સૂન તૈયારીઓ અને કોન્ટ્રાક્ટરની કામગીરી પર પ્રશ્નચિહ્ન ઊભું કર્યું છે. સ્થાનિકોની માગ છે કે સમગ્ર મામલે નિષ્પક્ષ તપાસ કરવામાં આવે અને જવાબદાર સામે કડક કાર્યવાહી કરવામાં આવે.
