સીબીઆઈએ આજે દેશના 16 રાજ્યોમાં 80થી વધુ સ્થળોએ દરોડા પાડ્યા છે. આ કાર્યવાહી ડિજિટલ અરેસ્ટ સ્કેમ સાથે જોડાયેલા કેસમાં કરવામાં આવી છે. સીબીઆઈએ ‘ઓપરેશન ચક્ર’ અંતર્ગત આ એક્શન હાથ ધર્યું છે. આ ઓપરેશન દ્વારા સાયબર ગુનાખોરીના માળખા સામે સંકલિત કાર્યવાહી કરવામાં આવી રહી છે.
ઓપરેશન ચક્ર હેઠળ CBIની મોટી કાર્યવાહી
ઓપરેશન ચક્ર અંતર્ગત સીબીઆઈએ 60 વિશેષ ટીમોનું ગઠન કર્યું હતું. આ ટીમોએ પંજાબ, ગુજરાત, દિલ્હી, મહારાષ્ટ્ર, હરિયાણા, તમિલનાડુ, તેલંગાણા, આંધ્ર પ્રદેશ, ઉત્તર પ્રદેશ, મધ્ય પ્રદેશ, રાજસ્થાન, આસામ, પશ્ચિમ બંગાળ, મણિપુર, કર્ણાટક અને ઓડિશા સહિત 16 રાજ્યોમાં 80થી વધુ સ્થળોએ દરોડા અને તપાસ અભિયાન હાથ ધર્યું હતું.
સીબીઆઈની આ કાર્યવાહી ડિજિટલ અરેસ્ટ સ્કેમની તપાસનો એક ભાગ છે, જેનો હેતુ દેશભરમાં નોંધાયેલા 200થી વધુ ડિજિટલ અરેસ્ટ કૌભાંડના કેસોમાં સંડોવાયેલા ઓપરેશનલ નેટવર્કને નાબૂદ કરવાનો છે. આ કેસમાં શેલ કંપનીઓ બનાવવી અને ગેરકાયદેસર બેંક ખાતાઓ ખોલવાના આરોપસર સીબીઆઈએ બે શંકાસ્પદોની ધરપકડ કરી છે. આ ખાતાઓનો ઉપયોગ ડિજિટલ અરેસ્ટ દ્વારા મેળવાયેલી ઠગાઈની રકમને મની લોન્ડરિંગ કરવા માટે કરવામાં આવતો હોવાનું સામે આવ્યું છે.
ભારતીયો ઉપરાંત વિદેશી નાગરિકો પણ બન્યા શિકાર
સીબીઆઈએ તાજેતરમાં ડિજિટલ અરેસ્ટ કૌભાંડ સાથે જોડાયેલી એક નકલી વેબસાઇટનો પર્દાફાશ કર્યો હતો. આ વેબસાઇટનો URL સુપ્રીમ કોર્ટની સત્તાવાર વેબસાઇટ જેવો જ દેખાતો હતો અને તેના માધ્યમથી લોકોને ઠગવામાં આવતા હતા. સુપ્રીમ કોર્ટના રજિસ્ટ્રારે આ વેબસાઇટ અંગે ફરિયાદ નોંધાવ્યા બાદ સીબીઆઈએ એફઆઈઆર દાખલ કરી તપાસ શરૂ કરી હતી.
તપાસ દરમિયાન સીબીઆઈને એવા પુરાવા પણ મળ્યા છે કે આ સાયબર કૌભાંડમાં માત્ર ભારતીય નાગરિકો જ નહીં, પરંતુ વિદેશી નાગરિકોને પણ નિશાન બનાવવામાં આવ્યા હતા. સમગ્ર મામલે વધુ તપાસ ચાલુ છે.
