સુરત જિલ્લાના ઔદ્યોગિક હબ ગણાતા માંગરોળ તાલુકાના પીપોદરા GIDC વિસ્તારમાં આજે વહેલી સવારે એક મોટી આગની ઘટના સામે આવી છે. ફેક્ટરીઓમાંથી નીકળતા પ્લાસ્ટિક વેસ્ટ અને સ્ક્રેપના વિશાળ જથ્થાને એકત્ર કરવામાં આવેલા ખુલ્લા પ્લોટમાં અચાનક આગ ભભૂકી ઉઠતાં સમગ્ર વિસ્તારમાં દોડધામ મચી ગઈ હતી.
પ્લાસ્ટિક અત્યંત જ્વલનશીલ હોવાથી આગે થોડા જ સમયમાં વિકરાળ સ્વરૂપ ધારણ કર્યું હતું. પવનની ગતિને કારણે આગની જ્વાળાઓ દૂર સુધી ફેલાતી જોવા મળી હતી. ઘટનાસ્થળેથી ઊઠતા ધુમાડાના ગોટેગોટા અને આગના ભયાનક દ્રશ્યો હાઇવે પરથી પણ સ્પષ્ટ દેખાતા હતા, જેના કારણે આસપાસના ઉદ્યોગકારો અને શ્રમિકોમાં ચિંતાનો માહોલ સર્જાયો હતો.
સરકારી અને ખાનગી ફાયર બ્રિગેડની ટીમો એક્શનમાં
આગની જાણ થતાં જ નજીકની ફેક્ટરીઓના સંચાલકોએ તાત્કાલિક ફાયર કંટ્રોલ રૂમનો સંપર્ક કર્યો હતો. આગની ગંભીરતાને ધ્યાનમાં રાખીને સરકારી ફાયર બ્રિગેડની સાથે પીપોદરા વિસ્તારની અનેક મોટી કંપનીઓના પ્રાઇવેટ ફાયર સ્ટેશનોને પણ મદદ માટે બોલાવવામાં આવ્યા હતા.
‘સુમિલોન ફાયર’ અને ‘રાજહંસ ફાયર’ સહિતની ટીમોએ અત્યાધુનિક ફાયર ટેન્ડર અને વોટર બ્રાઉઝરો સાથે ઘટનાસ્થળે પહોંચી આગ પર કાબૂ મેળવવા માટે સંયુક્ત કામગીરી શરૂ કરી હતી. ફાયર ફાઇટરો દ્વારા કેમિકલ ફોમ અને પાણીના સતત મારો ચલાવી આગને કાબૂમાં લેવાના પ્રયાસો હાથ ધરાયા હતા.
આસપાસની ફેક્ટરીઓને બચાવવા ખાસ તકેદારી
પીપોદરા GIDCમાં અનેક ઉદ્યોગો નજીક આવેલા હોવાથી આગ અન્ય ફેક્ટરીઓ કે ગોડાઉનો સુધી ન પહોંચે તે માટે વિશેષ સાવચેતી રાખવામાં આવી રહી છે. ફાયર બ્રિગેડની ટીમોએ આગગ્રસ્ત પ્લોટની ચારેય તરફ ઘેરાબંધી કરીને કુલિંગ ઓપરેશન શરૂ કર્યું છે. આગ હાલમાં ખુલ્લા પ્લોટ સુધી મર્યાદિત રાખવા માટે સતત પ્રયાસો કરવામાં આવી રહ્યા છે, જેથી નજીકની ઔદ્યોગિક એકમોને કોઈ નુકસાન ન પહોંચે.
પ્રાથમિક માહિતી મુજબ, આગ ખુલ્લા પ્લોટમાં લાગી હોવાથી અત્યાર સુધી કોઈ જાનહાનિ કે કોઈ શ્રમિક ફસાયા હોવાના અહેવાલ મળ્યા નથી. આ સમગ્ર ઘટનામાં સૌથી મોટી રાહતની વાત એ છે કે કોઈ માનવહાનિ નોંધાઈ નથી. જો કે, આગ સંપૂર્ણપણે કાબૂમાં આવ્યા બાદ જ નુકસાનનો સાચો આંકડો અને આગ લાગવાનું ચોક્કસ કારણ સામે આવી શકશે. હાલ ફાયર બ્રિગેડની ટીમો સતત કામગીરીમાં વ્યસ્ત છે અને પરિસ્થિતિ પર નજર રાખી રહી છે.
