દેશભરના અનેક રાજ્યોમાં હવામાનમાં મોટો ફેરફાર જોવા મળી રહ્યો છે. India Meteorological Department (IMD) એ ઉત્તરપૂર્વ ભારત સહિત દેશના અનેક વિસ્તારોમાં ભારે વરસાદની આગાહી કરી છે. હવામાન વિભાગના જણાવ્યા અનુસાર આગામી ચારથી પાંચ દિવસ દરમિયાન તમિલનાડુ, પુડુચેરી, કરાઈકલ, કેરળ, માહે અને દક્ષિણ કર્ણાટકમાં તેજ પવન સાથે ભારે વરસાદ પડી શકે છે.
હવામાન વિભાગે દક્ષિણ પશ્ચિમ ચોમાસાને લઈને પણ મહત્વપૂર્ણ અપડેટ જાહેર કર્યું છે. IMD અનુસાર 16 મે, 2026 આસપાસ દક્ષિણ બંગાળની ખાડી, આંદામાન સમુદ્ર તેમજ આંદામાન અને નિકોબાર ટાપુઓના કેટલાક વિસ્તારોમાં ચોમાસું આગળ વધવા માટે અનુકૂળ પરિસ્થિતિઓ સર્જાઈ રહી છે.
ચોમાસા માટે અનુકૂળ વાતાવરણ બનતા સમુદ્રમાંથી ભેજવાળા પવનો સક્રિય થાય છે, જેના કારણે વાદળોની રચના વધે છે અને અનેક વિસ્તારોમાં વરસાદની તીવ્રતા વધી શકે છે. સાથે જ તાપમાનમાં પણ ઘટાડો નોંધાઈ શકે છે.
આગામી દિવસોમાં પંજાબ, હરિયાણા, ચંદીગઢ, રાજસ્થાન અને ઉત્તર પ્રદેશના કેટલાક વિસ્તારોમાં પણ વરસાદ અને તેજ પવનની શક્યતા વ્યક્ત કરવામાં આવી છે. હવામાન વિભાગે જણાવ્યું છે કે આ વિસ્તારોમાં પવનની ગતિ 40થી 50 કિલોમીટર પ્રતિ કલાક સુધી પહોંચી શકે છે.
પહાડી રાજ્યો માટે પણ એલર્ટ જાહેર કરવામાં આવ્યું છે. ગુરુવારે હિમાચલ પ્રદેશ અને ઉત્તરાખંડમાં વરસાદ અને વીજળી સાથે વાવાઝોડાની આગાહી કરવામાં આવી છે. જ્યારે 15 અને 16 મે દરમિયાન જમ્મુ-કાશ્મીર, લદ્દાખ, ગિલગિટ-બાલ્ટિસ્તાન અને મુઝફ્ફરાબાદમાં પણ ખરાબ હવામાનની સંભાવના વ્યક્ત કરવામાં આવી છે.
બીજી તરફ દેશના અનેક વિસ્તારોમાં ગરમીનું મોજું યથાવત છે. ઉત્તર ભારત સહિત ઉત્તરપશ્ચિમ અને મધ્ય ભારતના રાજ્યોમાં ભારે ગરમીનો પ્રકોપ ચાલુ રહેવાની શક્યતા છે. હવામાન વિભાગે ચેતવણી આપી છે કે આગામી કેટલાક દિવસો સુધી ગરમીનું મોજું યથાવત રહી શકે છે, જેના કારણે લોકોને સાવચેત રહેવાની સલાહ આપવામાં આવી છે.
