સુરત શહેરમાં ટેક્સટાઈલ ઉદ્યોગની આડમાં ચાલતા બાળ મજૂરીના એક મોટા નેટવર્કનો પર્દાફાશ થયો છે. ઉદયપુરની માનવ તસ્કરી વિરોધી યુનિટ (AHTU) અને રાજસ્થાન રાજ્ય બાળ આયોગની ટીમે આજે, 13 મેના રોજ પુણા પોલીસ સાથે મળીને સંયુક્ત કાર્યવાહી હાથ ધરી હતી. આ દરોડા દરમિયાન શહેરની વિવિધ ફેક્ટરીઓમાંથી 84 આદિવાસી બાળકોને રેસ્ક્યુ કરવામાં આવ્યા છે.
રાજસ્થાનથી આવેલી 20 સભ્યોની વિશેષ ટીમે પૂર્વ આયોજિત વ્યૂહરચના મુજબ પુણા પોલીસ સ્ટેશન વિસ્તાર હેઠળની સીતારામ સોસાયટી અને મુક્તિધામ સોસાયટી સહિત અંદાજે 6 સ્થળોએ એકસાથે સર્ચ ઓપરેશન હાથ ધર્યું હતું. તપાસમાં બહાર આવ્યું છે કે આ ટીમો છેલ્લા એક મહિનાથી બાળકોને મજૂરીમાં ધકેલતા એજન્ટોના નેટવર્ક પર નજર રાખી રહી હતી. આ તમામ બાળકો ઉદયપુર જિલ્લાના આદિવાસી વિસ્તારોના વતની હોવાનું જાણવા મળ્યું છે.
રેસ્ક્યુ કરવામાં આવેલા બાળકોની ઉંમર માત્ર 7 થી 14 વર્ષની વચ્ચે છે. ટેક્સટાઈલ યુનિટોમાં આ માસૂમ બાળકો પાસે સાડીના વધારાના દોરા કાપવા તેમજ જોખમી મશીનો ચલાવવા જેવા કામો કરાવવામાં આવતા હતા. અત્યંત ધૂળ અને અવાજવાળા વાતાવરણમાં બાળકો પાસે આખો દિવસ કામ કરાવીને મહિનાના માત્ર 5,000 થી 8,000 રૂપિયા આપી તેમનું આર્થિક શોષણ કરવામાં આવતું હતું. આશ્ચર્યની વાત એ છે કે આ બાળકો ગરીબીને કારણે અભ્યાસ છોડીને એજન્ટોની જાળમાં ફસાયા હતા.
સુરતમાં બાળકો પાસે મજૂરી કરાવવાની આ પ્રથમ ઘટના નથી. અગાઉ 2019માં પણ બાળ આયોગે સુરતમાં દરોડા પાડીને ઉદયપુરના અનેક બાળકોને મુક્ત કરાવ્યા હતા. હાલમાં, પોલીસ અને બાળ આયોગ દ્વારા સંચાલકોની કડક પૂછપરછ કરવામાં આવી રહી છે અને બાળકોના વાલીઓનો સંપર્ક કરવાની પ્રક્રિયા હાથ ધરાઈ છે. મુક્ત કરાયેલા તમામ બાળકોને વિશેષ બસ મારફતે સુરતથી રાજસ્થાન પરત રવાના કરવામાં આવ્યા છે.
