સુરત શહેરના પાલ વિસ્તારમાં મોર્નિંગ વોક માટે નીકળેલા દંપતીને નિશાન બનાવી સોનાની ચેન છીનવી ભાગી ગયેલા રીઢા ગુનેગારને ક્રાઈમ બ્રાન્ચે ઝડપી લીધો છે. શહેરમાં છેલ્લા કેટલાક સમયથી વહેલી સવારે વોકિંગ માટે નીકળતા નાગરિકોને ટાર્ગેટ કરતી ગેંગ સક્રિય હોવાનું સામે આવી રહ્યું છે, જેના કારણે લોકોમાં ભયનો માહોલ છે.
તાજેતરની ઘટનામાં, એક દંપતી સવારના સમયે પાલ વિસ્તારમાં વોકિંગ કરી રહ્યું હતું, ત્યારે બાઇક સવાર બદમાશોએ તેમની સોનાની ચેન તોડી ભાગી છૂટ્યા હતા. ઘટનાની ગંભીરતા ધ્યાનમાં રાખીને ક્રાઈમ બ્રાન્ચે તરત જ તપાસ શરૂ કરી અને ટેકનિકલ સર્વેલન્સ તથા સીસીટીવી ફૂટેજના આધારે આરોપીની ઓળખ કરી.
પોલીસને મળેલી બાતમીના આધારે ભેસ્તાન આવાસ પાસે વોચ ગોઠવવામાં આવી અને ત્યાંથી સાહિલ શેખ નામના શખ્સની ધરપકડ કરવામાં આવી. પૂછપરછ દરમિયાન બહાર આવ્યું કે આરોપી પાસે રહેલા ત્રણ મોબાઈલ ફોન અને મોપેડ પણ ચોરીના હતા. પોલીસે તેની પાસેથી કુલ ₹3.38 લાખનો મુદ્દામાલ જપ્ત કર્યો છે.
આરોપી પાસેથી વધુ ગુનાઓ અંગે માહિતી મેળવવા પોલીસે તપાસ આગળ ધપાવી છે, જ્યારે શહેરમાં વધતી ચીલઝડપની ઘટનાઓને ધ્યાનમાં રાખીને પોલીસ પેટ્રોલિંગ પણ વધારવામાં આવી રહી છે.
