સુરત મહાનગરપાલિકાની ચૂંટણીને અનુલક્ષીને ભારતીય જનતા પાર્ટી (BJP) દ્વારા આખરે 30 વોર્ડ માટે કુલ 107 ઉમેદવારોના નામોની જાહેરાત કરવામાં આવી છે. છેલ્લા બે દિવસથી ચાલી રહેલી અટકળો અને ચર્ચાઓનો અંત આવ્યો છે. આ યાદીમાં નવા અને જૂના ચહેરાઓ વચ્ચે સંતુલન સાધવાનો પ્રયાસ કરવામાં આવ્યો છે, જેમાં મોટાભાગે નવા ચહેરાઓને તક આપવામાં આવી છે.
પ્રાપ્ત વિગતો મુજબ, જાહેર કરાયેલા 107 ઉમેદવારોમાંથી અંદાજે 15 થી 20 જેટલા જૂના અને અનુભવી કોર્પોરેટરોને ફરીથી રિપીટ કરવામાં આવ્યા છે. જ્યારે 90થી વધુ ઉમેદવારો નવા છે, જે દર્શાવે છે કે ભાજપે નવી પેઢીને આગળ લાવવા અને નવા ચહેરાઓને પ્રોત્સાહન આપવાનું નક્કી કર્યું છે. પાર્ટીએ સ્થાનિક ધારાસભ્યો અને નેતાઓની ભલામણોને પણ મહત્વ આપ્યું હોવાનું સૂત્રો જણાવે છે.
આ યાદીમાં પૂર્વ મેયર, પૂર્વ ડેપ્યુટી મેયર, સ્ટેન્ડિંગ કમિટી ચેરમેન તેમજ વિવિધ સમિતિઓના ચેરમેન જેવા અગ્રણીઓના નામોને ફરીથી સ્થાન આપવામાં આવ્યું છે. જેમાં દક્ષેશ માવાણી, નરેન્દ્ર પાટીલ, રાજન પટેલ, મનીષા આહીર, વૈશાલી શાહ, ઉર્વશી પટેલ, ચિરાગ સોલંકી, ભાવિશા પટેલ, રાજેન્દ્ર પાટીલ, જયશ્રી વોરા, જયશ્રી વરિયા, ની શાહ, નિલેશ પટેલ, આર.પી. પટેલ અને કિશોર મિયાણી જેવા નામોનો સમાવેશ થાય છે.
મહત્વપૂર્ણ છે કે કેટલાક વિસ્તારોમાં, ખાસ કરીને જ્યાં આમ આદમી પાર્ટીનો પ્રભાવ જોવા મળ્યો હતો, ત્યાં ભાજપે નવા ચહેરાઓને પ્રાધાન્ય આપ્યું છે. કતારગામ-ડભોળી વિસ્તારમાં જૂના ચહેરાઓને બદલીને નવા ઉમેદવારોને મેદાનમાં ઉતારવામાં આવ્યા છે. ઉપરાંત વરાછા, સરથાણા, સીમાડા અને અમરોલી છાપરા પાટા જેવા વિસ્તારોમાં પણ નવા ચહેરાઓને ટિકિટ આપવામાં આવી છે.
